Қазақстан Ішкі істер министрлігі Kyzdar.net интернет-ресурсының заңсыз қызметін тоқтату мақсатында бірқатар мемлекеттік органдармен бірлесіп ауқымды жедел және тергеу шараларын жүргізіп жатқанын мәлімдеді, деп хабарлайды dalanews.kz.
Ведомствоның хабарлауынша, Мәдениет және ақпарат министрлігімен бірлесіп аталған сайтқа Қазақстан аумағында қолжетімділік шектелген. Сонымен қатар, Бас прокуратурамен бірлесіп халықаралық құқықтық көмек тетіктері іске қосылған. Оның аясында шетелдік құзырлы органдардан электрондық дәлелдемелер алу, серверлік инфрақұрылымға қатысты процессуалдық тапсырмаларды орындау және өзге де тергеу әрекеттері жүргізілуде.
Қазіргі уақытта Kyzdar.net сайтының ұйымдастырушыларына қатысты Қылмыстық кодекстің 309-бабы («Жезөкшелікпен айналысуға арналған притондарды ұйымдастыру немесе ұстау, сексуалдық сипаттағы өзге де қызметтер көрсету және жеңгетайлық») бойынша сотқа дейінгі тергеу жалғасып жатыр. Істі ІІМ қызметкерлері, Қаржылық мониторинг агенттігінің «Криптон» арнайы бөлімшесі және прокуратура органдарының процессуалдық бақылауымен құрылған ведомствоаралық тергеу-жедел тобы қарап жатыр.
Министрліктің мәліметінше, маусым айының басында жүргізілген арнайы операция барысында қылмыстық іс бойынша негізгі күдіктілер ұсталған. Қазір қажетті тергеу және процессуалдық іс-шаралар жалғасуда. Тергеу аясында сайттың жұмысына қатысы болуы мүмкін жеке және заңды тұлғалардың әрекеттері, сондай-ақ интернет-ресурсты құру мен жүргізуде қолданылған ақпараттық технологиялар тексерілуде.
Сонымен бірге Қаржылық мониторинг агенттігі күдіктілердің қаржы ағындарын, мүліктерін және қаржылық-шаруашылық қызметін зерттеп жатыр. Қылмыстық іс үшін маңызы бар мүлікті анықтау және оның сақталуын қамтамасыз ету бойынша заңда көзделген шаралар қабылданған.
ІІМ-нің мәліметінше, интернет-ресурсты ұйымдастыруға, техникалық сүйемелдеуге және оның жұмысын қамтамасыз етуге қатысы бар барлық тұлғаларға қатысты кешенді тергеу жұмыстары жалғасуда.
Алты менеджер сотталды
Бұдан бөлек, биыл маусым айында Солтүстік Қазақстан облысының мамандандырылған ауданаралық қылмыстық соты Kyzdar.net сайтының қызметіне ықпал еткен алты «топ-менеджерге» қатысты айыптау үкімін шығарды. Олар трансұлттық ұйымдасқан қылмыстық топ құру және оған қатысу, жеңгетайлық пен жезөкшелік қызметін ұйымдастыру баптары бойынша кінәлі деп танылды. Сондай-ақ сотталушылардың бірі заңсыз кәсіпкерлікпен айналысу және қылмыстық жолмен алынған қаражатты заңдастыру баптары бойынша да жауапқа тартылған.
Сот үкімімен бір адам 10 жылға, ал тағы бес адам 8 жылға бас бостандығынан айырылып, олардың мүлкі тәркіленді.
Грузияда іздеуде жүрген күдікті ұсталды
ІІМ мәліметінше, шілде айының басында Интерполдың Ұлттық орталық бюросының көмегімен Грузия аумағында халықаралық іздеуде жүрген шетел азаматы ұсталған. Ол да сайт менеджерлерінің бірі саналады және жоғарыда аталған тұлғалармен байланысы болған. Қазіргі уақытта оны Қазақстанға экстрадициялау мәселесі қаралып жатыр. Сот үкімінің орындалуын және мүлікті тәркілеуді қамтамасыз ету мақсатында күдіктілердің мүлкіне, ақшалай қаражатына және басқа да активтеріне тыйым салынған.
ІІМ Қылмыстық-процестік кодекстің 201-бабына сәйкес сотқа дейінгі тергеудің өзге мәліметтері жария етілмейтінін атап өтті.
