Qazaqstan Ishki ister ministrligi Kyzdar.net internet-resýrsynyń zańsyz qyzmetin toqtatý maqsatynda birqatar memlekettik organdarmen birlesip aýqymdy jedel jáne tergeý sharalaryn júrgizip jatqanyn málimdedi, dep habarlaidy dalanews.kz.
Vedomstvonyń habarlaýynsha, Mádeniet jáne aqparat ministrligimen birlesip atalǵan saitqa Qazaqstan aýmaǵynda qoljetimdilik shektelgen. Sonymen qatar, Bas prokýratýramen birlesip halyqaralyq quqyqtyq kómek tetikteri iske qosylǵan. Onyń aiasynda sheteldik quzyrly organdardan elektrondyq dáleldemeler alý, serverlik infraqurylymǵa qatysty protsessýaldyq tapsyrmalardy oryndaý jáne ózge de tergeý áreketteri júrgizilýde.
Qazirgi ýaqytta Kyzdar.net saitynyń uiymdastyrýshylaryna qatysty Qylmystyq kodekstiń 309-baby («Jezókshelikpen ainalysýǵa arnalǵan pritondardy uiymdastyrý nemese ustaý, seksýaldyq sipattaǵy ózge de qyzmetter kórsetý jáne jeńgetailyq») boiynsha sotqa deiingi tergeý jalǵasyp jatyr. Isti IIM qyzmetkerleri, Qarjylyq monitoring agenttiginiń «Kripton» arnaiy bólimshesi jáne prokýratýra organdarynyń protsessýaldyq baqylaýymen qurylǵan vedomstvoaralyq tergeý-jedel toby qarap jatyr.
Ministrliktiń málimetinshe, maýsym aiynyń basynda júrgizilgen arnaiy operatsiia barysynda qylmystyq is boiynsha negizgi kúdiktiler ustalǵan. Qazir qajetti tergeý jáne protsessýaldyq is-sharalar jalǵasýda. Tergeý aiasynda saittyń jumysyna qatysy bolýy múmkin jeke jáne zańdy tulǵalardyń áreketteri, sondai-aq internet-resýrsty qurý men júrgizýde qoldanylǵan aqparattyq tehnologiialar tekserilýde.
Sonymen birge Qarjylyq monitoring agenttigi kúdiktilerdiń qarjy aǵyndaryn, múlikterin jáne qarjylyq-sharýashylyq qyzmetin zerttep jatyr. Qylmystyq is úshin mańyzy bar múlikti anyqtaý jáne onyń saqtalýyn qamtamasyz etý boiynsha zańda kózdelgen sharalar qabyldanǵan.
IIM-niń málimetinshe, internet-resýrsty uiymdastyrýǵa, tehnikalyq súiemeldeýge jáne onyń jumysyn qamtamasyz etýge qatysy bar barlyq tulǵalarǵa qatysty keshendi tergeý jumystary jalǵasýda.
Alty menedjer sottaldy
Budan bólek, biyl maýsym aiynda Soltústik Qazaqstan oblysynyń mamandandyrylǵan aýdanaralyq qylmystyq soty Kyzdar.net saitynyń qyzmetine yqpal etken alty «top-menedjerge» qatysty aiyptaý úkimin shyǵardy. Olar transulttyq uiymdasqan qylmystyq top qurý jáne oǵan qatysý, jeńgetailyq pen jezókshelik qyzmetin uiymdastyrý baptary boiynsha kináli dep tanyldy. Sondai-aq sottalýshylardyń biri zańsyz kásipkerlikpen ainalysý jáne qylmystyq jolmen alynǵan qarajatty zańdastyrý baptary boiynsha da jaýapqa tartylǵan.
Sot úkimimen bir adam 10 jylǵa, al taǵy bes adam 8 jylǵa bas bostandyǵynan aiyrylyp, olardyń múlki tárkilendi.
Grýziiada izdeýde júrgen kúdikti ustaldy
IIM málimetinshe, shilde aiynyń basynda Interpoldyń Ulttyq ortalyq biýrosynyń kómegimen Grýziia aýmaǵynda halyqaralyq izdeýde júrgen shetel azamaty ustalǵan. Ol da sait menedjerleriniń biri sanalady jáne joǵaryda atalǵan tulǵalarmen bailanysy bolǵan. Qazirgi ýaqytta ony Qazaqstanǵa ekstraditsiialaý máselesi qaralyp jatyr. Sot úkiminiń oryndalýyn jáne múlikti tárkileýdi qamtamasyz etý maqsatynda kúdiktilerdiń múlkine, aqshalai qarajatyna jáne basqa da aktivterine tyiym salynǵan.
IIM Qylmystyq-protsestik kodekstiń 201-babyna sáikes sotqa deiingi tergeýdiń ózge málimetteri jariia etilmeitinin atap ótti.
