Президент Тоқаев Үкіметтің кеңейтілген отырысында елдегі автотасымал мүмкіндіктерінің жеткілікті деңгейде пайдаланылмай отырғанын мәлімдеді, деп хабарлайды Dalanews.kz.

Сонымен қатар, Мемлекет басшысы жаһандық электронды коммерцияның қарқынды дамуына назар аударып, бұл үрдісті Қазақстан экономикасының өсуі үшін тиімді пайдалануға шақырды.

Тоқаевтың пікірінше, Қазақстанда дамыған логистикалық жүйе қалыптастыру – стратегиялық міндет. Қазіргі халықаралық нарықтың ерекшелігін ескере отырып, автотасымалға арналған «жасыл дәліздің» тиімді жұмыс істеуі және жоспарланған автожолдарды дер кезінде салып, жөндеу қажет.

“Біз автотасымалдың әлеуетін әлі толық пайдаланған жоқпыз. Логистиканы дамытпайынша, мемлекеттік деңгейдегі мақсатымызға қол жеткізе алмаймыз”, – деді Президент.

Логистиканың табысты дамуы үшін қойма жұмыстарын автоматтандыру, маршруттарды цифрландыру және жасанды интеллект мүмкіндіктерін пайдаланудың маңызы зор. Тоқаев бұл бағытта Үкіметтің тұрақты назар аударуы қажет екенін айтты.

Қазақстанда халықаралық аэрохаб қалыптастыру да күн тәртібінде тұр. Президенттің айтуынша, кешенді экожүйе құру үшін жүк және жолаушылар терминалдарын, логистикалық орталықтар мен қазіргі заманға сай қызмет түрлерін дамыту керек.

“Жүктерді тасымалдауға қатысты барлық рәсімдерді оңтайландыру қажет, сондай-ақ авиакеросин бағасын қолжетімді ету маңызды. Әсіресе елорда әуежайындағы авиажанармай құны шектен тыс жоғары”, – деді Тоқаев.

Ол Монополияға қарсы орган мен Үкіметке осы мәселені жылдың алғашқы жартысында шешуді тапсырды.

Жалпы, Президенттің сөзінше, әлемдік жүк авианарығы қазіргі таңда 140 миллиард доллар шамасында бағаланады. Бұл – орасан зор мүмкіншілік. Дегенмен, әзірге қазақстандық авиакомпаниялардың ешқайсысы бұл нарыққа толыққанды кіре алмай отыр.

“Біз бұл әлеуетті жүзеге асыруымыз керек. Қазақстандық тасымалдаушылар жаһандық үрдістерден шет қалмауы тиіс”, – деп түйіндеді Тоқаев.