Prezident Toqaev Úkimettiń keńeitilgen otyrysynda eldegi avtotasymal múmkindikteriniń jetkilikti deńgeide paidalanylmai otyrǵanyn málimdedi, dep habarlaidy Dalanews.kz.
Sonymen qatar, Memleket basshysy jahandyq elektrondy kommertsiianyń qarqyndy damýyna nazar aýdaryp, bul úrdisti Qazaqstan ekonomikasynyń ósýi úshin tiimdi paidalanýǵa shaqyrdy.
Toqaevtyń pikirinshe, Qazaqstanda damyǵan logistikalyq júie qalyptastyrý – strategiialyq mindet. Qazirgi halyqaralyq naryqtyń ereksheligin eskere otyryp, avtotasymalǵa arnalǵan «jasyl dálizdiń» tiimdi jumys isteýi jáne josparlanǵan avtojoldardy der kezinde salyp, jóndeý qajet.
“Biz avtotasymaldyń áleýetin áli tolyq paidalanǵan joqpyz. Logistikany damytpaiynsha, memlekettik deńgeidegi maqsatymyzǵa qol jetkize almaimyz”, – dedi Prezident.
Logistikanyń tabysty damýy úshin qoima jumystaryn avtomattandyrý, marshrýttardy tsifrlandyrý jáne jasandy intellekt múmkindikterin paidalanýdyń mańyzy zor. Toqaev bul baǵytta Úkimettiń turaqty nazar aýdarýy qajet ekenin aitty.
Qazaqstanda halyqaralyq aerohab qalyptastyrý da kún tártibinde tur. Prezidenttiń aitýynsha, keshendi ekojúie qurý úshin júk jáne jolaýshylar terminaldaryn, logistikalyq ortalyqtar men qazirgi zamanǵa sai qyzmet túrlerin damytý kerek.
“Júkterdi tasymaldaýǵa qatysty barlyq rásimderdi ońtailandyrý qajet, sondai-aq aviakerosin baǵasyn qoljetimdi etý mańyzdy. Ásirese elorda áýejaiyndaǵy aviajanarmai quny shekten tys joǵary”, – dedi Toqaev.
Ol Monopoliiaǵa qarsy organ men Úkimetke osy máseleni jyldyń alǵashqy jartysynda sheshýdi tapsyrdy.
Jalpy, Prezidenttiń sózinshe, álemdik júk avianaryǵy qazirgi tańda 140 milliard dollar shamasynda baǵalanady. Bul – orasan zor múmkinshilik. Degenmen, ázirge qazaqstandyq aviakompaniialardyń eshqaisysy bul naryqqa tolyqqandy kire almai otyr.
“Biz bul áleýetti júzege asyrýymyz kerek. Qazaqstandyq tasymaldaýshylar jahandyq úrdisterden shet qalmaýy tiis”, – dep túiindedi Toqaev.
