Болат Назарбаевтың қолшоқпары болып саналған Елдос Қоспаев пен оның қылмыстық тобынан қандай мүліктер тәркіленгені белгілі болды, деп хабарлайды Dalanews.kz.
Тәркіленген мүліктер:
- 78 пәтер, 6 жер учаскесі, қойма ғимараты, 10 коммерциялық нысан, 2 көпқабатты үй (жалпы ауданы – 2 482 м²);
- 5 гараж, 3 коммерциялық нысан, 5 сауда нысаны (жер телімдерімен бірге), 80 автокөлік, 2 қару бірлігі, ақшалай қаражат пен құнды заттар.
Сондай-ақ, сот сотталушылардан жәбірленушілердің пайдасына 6,5 млрд теңге мөлшерінде материалдық және моральдық зиянды өтеуге шешім шығарды.
Еске салайық, Елдос Қоспаев 28 қаңтарда 15 жылға бас бостандығынан айырылды.
2023 жылдың қыркүйегінде Елдос Қоспаев пен оның топ мүшелері Солтүстік Кипрде ұсталып, Қазақстанға экстрадицияланды. Оларға рейдерлік, ұйымдасқан қылмыстық топ құру және оған қатысу айыптары тағылды.
Қаржылық мониторинг агенттігінің мәліметінше, Қоспаевтың ұйымдасқан қылмыстық тобына 11 адам кірген. Оларға келесі компанияларды басып алу бойынша айып тағылды:
AV-Construction;
Profit Trade LTD;
Azovita Aktau;
Azovita Atyrau.
Елдос Қоспаев өзіне сенімді өкілдері – ұйымдасқан қылмыстық топ мүшелері арқылы 7 жылға сотталған кәсіпкер Алмас Әбдіғаппаровтың бизнесінің 75%-ын тартып алған, кейін оның анасына қысым көрсету арқылы қалған 25%-ын да иемденген.
Бұл істің тергеуі 2024 жылдың көктемінде аяқталған болатын.
