Астанада мәдениет және спорт вице-министрі болған Ерлан Қожагапановқа қатысты сот процесі жалғасуда. Ол 1 миллиард теңгеден астам қаржы жымқырды деп айыпталуда. Кезекті сот отырысында істің екінші фигуранты, SUCCESS K компаниясының директоры Ләззат Көккөзова куәлік берді, деп хабарлайды Dalanews.kz.
Көккөзоваға ҚР Қылмыстық кодексінің 189-бабы, 4-бөлігі, 2-тармағы бойынша “өзіне сеніп тапсырылған мүлікті аса ірі көлемде иемдену немесе ысырап ету” айыбы тағылған. Ол сотта бастапқы коммерциялық ұсыныс 2,9 млрд теңгеге бағаланғанын, бірақ бұл тек ұсыныс болғанын, нақты бекітілген смета еместігін айтты. Оның сөзінше, жобаны Мәдениет және спорт министрлігінен, Президент әкімшілігінен және экс-президент Нұрсұлтан Назарбаевтың өзі мақұлдаған.
“Маған 1 миллиард теңгеден астам зиян келтірді деп айып тағылып отыр. Бірақ мен министрлік қызметкері емеспін, мемлекеттік қызметші де емеспін. Мен – жеке коммерциялық компанияның директорымын, келісімшарт жасап, орындалған жұмыстар актісіне қол қойдым. Маған сеніп тапсырылған мүлікті жымқырды деп айыптау қисынсыз”, – деді Көккөзова сотта.
Тергеу нұсқасы бойынша, 2018 жылы өткен Қазақстан мен Ресейдің XV Өңіраралық ынтымақтастық форумын ұйымдастыру шығындары айтарлықтай артық көрсетілген. Мемлекетке келген шығын көлемі 1 миллиард теңгеден асады.
