"Алтыналмас АК" АҚ бұған дейін "Rense Enterprises Limited-ке" тиесілі болған "Майқайыңалтын" АҚ-тың жарғылық капиталындағы 100% үлесін сатып алу жөніндегі мәмілені сәтті аяқтады. Осылайша еліміздегі жетекші алтын өндіруші компания Павлодар облысындағы алтын кен байыту комбинатының иесі атанды, деп хабарлайды Dalanews.kz.
"Майқайыңалтын" компаниясын сатып алу – "Алтыналмас" тобының Қазақстанның алтын өндіру саласындағы позицияларын нығайтуға бағытталған стратегиялық маңызды қадамы. "Майқайыңалтын" компаниясының "Алтыналмас" тобына қосылуы компанияның ресурстық базасын кеңейту, орнықты өсуін қамтамасыз ету және өңірдің әлеуметтік-экономикалық дамуы үшін жаңа мүмкіндіктер ашады", делінген компания баспасөз қызметінің хабарламасында.
Тура бір жыл бұрын, яғни 2024 жылдың сәуір айында "Майқайыңалтын" АҚ акционерлері мен "Алтыналмас АК" АҚ арасында келісім жасалғаннан кейін кәсіпорынға "Алтыналмас" тобының жоғары білікті мамандары тартылды. Олардың басты міндеті – апат салдарын жою, өндірістік қуатты қалпына келтіру, инфрақұрылымды жаңғырту және барлық процестерді жоғары қауіпсіздік стандарттарына сәйкес келетіндей ету болды.
2024 жылдың тамыз айында кәсіпорында құрылыс-жөндеу жұмыстары басталды, ал қазан айында "Майқайыңалтын" АҚ кен орыны қызметін қайта жандандырып, қараша айына қарай жоспарланған көрсеткіштерге қол жеткізді. Бұған қоса, бетон толтыру кешені іске қосылып, қызметкерлердің әкімшілік-тұрмыстық жағдайларын жақсарту бойынша жұмыстар жүргізілуде. Келешекте өндірісті одан әрі жаңғырту және еңбек тиімділігі мен қауіпсіздігін арттыруға бағытталған инновациялық технологияларды енгізу жоспарлануда.
Қазіргі уақытта кәсіпорында өнеркәсіптік қауіпсіздік деңгейін арттыру, өндірістік әлеуетті дамыту, сондай-ақ қызметкерлердің еңбек жағдайларын жақсарту және әлеуметтік қолдау шараларын іске асыру бойынша жұмыстар жүргізілуде. Бүгінде компания қызметкерлерінің 95%-ы аймақтың жергілікті тұрғындары болып табылады.
"Алтыналмас АК" АҚ – Қазақстанның жетекші алтын өндіруші компанияларының бірі және елдегі ең ірі алтын өндірушілері үштігінің қатарына кіреді. Компания геологиялық барлау жұмыстарынан бастап бағалы металды өңдеуге дейінгі толық өндірістік циклді жүзеге асырады, бұл оның тұрақтылығы мен тиімділігін қамтамасыз етеді.
Байбатша Әділхан, геолог-ғалым:
"Майқайыңалтын" АҚ-тың жұмысы соңғы кездері тұралап қалған. Сөйтіп 2-3 мың халқы бар елдімекен бір күнде жұмыссыздық мәселесіне тап келіп, абдырап қалған еді. Сондықтан оны "Алтыналмас" тобының сатып алуы жақсы нышан деп білемін. Елдімекенге қайта "қан жүгіретін" болады. Ал оны сатып алған компания ұтпаса, ұтылмайды. Себебі, Бақыршықты ашқан кезде 1 грамм алтынның бағасы 9-10 доллар болған. Ал қазір алтынның бағасы шарықтап тұр: 1 граммы 100 доллар. Жалпы, кеніш қазба байлыққа бай, ол өзінің потенциалын түгеспеген. Сатып алып отырғандар оның барлығын есептеп, біліп отыр ғой. Әлеуметтік тұрғыдағы пайданы жалпы экономикалыққа ұластыру үшін компания IPO-ға шығуы керек. Сонда онда істейтін жұмысшылар да акцияға аздап болсын, үлестес болар еді. Бұл болашақтың еншісіндегі дүние деп білемін".
