"التىنالماس اك" اق بۇعان دەيىن "Rense Enterprises Limited-كە" تيەسىلى بولعان "مايقايىڭالتىن" اق-تىڭ جارعىلىق كاپيتالىنداعى 100% ۇلەسىن ساتىپ الۋ جونىندەگى مامىلەنى ءساتتى اياقتادى. وسىلايشا ەلىمىزدەگى جەتەكشى التىن ءوندىرۋشى كومپانيا پاۆلودار وبلىسىنداعى التىن كەن بايىتۋ كومبيناتىنىڭ يەسى اتاندى، دەپ حابارلايدى Dalanews.kz.
"مايقايىڭالتىن" كومپانياسىن ساتىپ الۋ – "التىنالماس" توبىنىڭ قازاقستاننىڭ التىن ءوندىرۋ سالاسىنداعى پوزيسيالارىن نىعايتۋعا باعىتتالعان ستراتەگيالىق ماڭىزدى قادامى. "مايقايىڭالتىن" كومپانياسىنىڭ "التىنالماس" توبىنا قوسىلۋى كومپانيانىڭ رەسۋرستىق بازاسىن كەڭەيتۋ، ورنىقتى ءوسۋىن قامتاماسىز ەتۋ جانە ءوڭىردىڭ الەۋمەتتىك-ەكونوميكالىق دامۋى ءۇشىن جاڭا مۇمكىندىكتەر اشادى"، دەلىنگەن كومپانيا باسپا ءسوز قىزمەتىنىڭ حابارلاماسىندا.
تۋرا ءبىر جىل بۇرىن، ياعني 2024 جىلدىڭ ءساۋىر ايىندا "مايقايىڭالتىن" اق اكسيونەرلەرى مەن "التىنالماس اك" اق اراسىندا كەلىسىم جاسالعاننان كەيىن كاسىپورىنعا "التىنالماس" توبىنىڭ جوعارى بىلىكتى ماماندارى تارتىلدى. ولاردىڭ باستى مىندەتى – اپات سالدارىن جويۋ، وندىرىستىك قۋاتتى قالپىنا كەلتىرۋ، ينفراقۇرىلىمدى جاڭعىرتۋ جانە بارلىق پروسەستەردى جوعارى قاۋىپسىزدىك ستاندارتتارىنا سايكەس كەلەتىندەي ەتۋ بولدى.
2024 جىلدىڭ تامىز ايىندا كاسىپورىندا قۇرىلىس-جوندەۋ جۇمىستارى باستالدى، ال قازان ايىندا "مايقايىڭالتىن" اق كەن ورىنى قىزمەتىن قايتا جانداندىرىپ، قاراشا ايىنا قاراي جوسپارلانعان كورسەتكىشتەرگە قول جەتكىزدى. بۇعان قوسا، بەتون تولتىرۋ كەشەنى ىسكە قوسىلىپ، قىزمەتكەرلەردىڭ اكىمشىلىك-تۇرمىستىق جاعدايلارىن جاقسارتۋ بويىنشا جۇمىستار جۇرگىزىلۋدە. كەلەشەكتە ءوندىرىستى ودان ءارى جاڭعىرتۋ جانە ەڭبەك تيىمدىلىگى مەن قاۋىپسىزدىگىن ارتتىرۋعا باعىتتالعان يننوۆاسيالىق تەحنولوگيالاردى ەنگىزۋ جوسپارلانۋدا.
قازىرگى ۋاقىتتا كاسىپورىندا ونەركاسىپتىك قاۋىپسىزدىك دەڭگەيىن ارتتىرۋ، وندىرىستىك الەۋەتتى دامىتۋ، سونداي-اق قىزمەتكەرلەردىڭ ەڭبەك جاعدايلارىن جاقسارتۋ جانە الەۋمەتتىك قولداۋ شارالارىن ىسكە اسىرۋ بويىنشا جۇمىستار جۇرگىزىلۋدە. بۇگىندە كومپانيا قىزمەتكەرلەرىنىڭ 95%-ى ايماقتىڭ جەرگىلىكتى تۇرعىندارى بولىپ تابىلادى.
"التىنالماس اك" اق – قازاقستاننىڭ جەتەكشى التىن ءوندىرۋشى كومپانيالارىنىڭ ءبىرى جانە ەلدەگى ەڭ ءىرى التىن وندىرۋشىلەرى ۇشتىگىنىڭ قاتارىنا كىرەدى. كومپانيا گەولوگيالىق بارلاۋ جۇمىستارىنان باستاپ باعالى مەتالدى وڭدەۋگە دەيىنگى تولىق وندىرىستىك سيكلدى جۇزەگە اسىرادى، بۇل ونىڭ تۇراقتىلىعى مەن تيىمدىلىگىن قامتاماسىز ەتەدى.
بايباتشا ءادىلحان، گەولوگ-عالىم:
"مايقايىڭالتىن" اق-تىڭ جۇمىسى سوڭعى كەزدەرى تۇرالاپ قالعان. ءسويتىپ 2-3 مىڭ حالقى بار ەلدىمەكەن ءبىر كۇندە جۇمىسسىزدىق ماسەلەسىنە تاپ كەلىپ، ابدىراپ قالعان ەدى. سوندىقتان ونى "التىنالماس" توبىنىڭ ساتىپ الۋى جاقسى نىشان دەپ بىلەمىن. ەلدىمەكەنگە قايتا "قان جۇگىرەتىن" بولادى. ال ونى ساتىپ العان كومپانيا ۇتپاسا، ۇتىلمايدى. سەبەبى، باقىرشىقتى اشقان كەزدە 1 گرامم التىننىڭ باعاسى 9-10 دوللار بولعان. ال ءقازىر التىننىڭ باعاسى شارىقتاپ تۇر: 1 گراممى 100 دوللار. جالپى، كەنىش قازبا بايلىققا باي، ول ءوزىنىڭ پوتەنسيالىن تۇگەسپەگەن. ساتىپ الىپ وتىرعاندار ونىڭ بارلىعىن ەسەپتەپ، ءبىلىپ وتىر عوي. الەۋمەتتىك تۇرعىداعى پايدانى جالپى ەكونوميكالىققا ۇلاستىرۋ ءۇشىن كومپانيا IPO-عا شىعۋى كەرەك. سوندا وندا ىستەيتىن جۇمىسشىلار دا اكسياعا ازداپ بولسىن، ۇلەستەس بولار ەدى. بۇل بولاشاقتىڭ ەنشىسىندەگى دۇنيە دەپ بىلەمىن".
