شىعىس قازاقستان وبلىسىنىڭ اكىمى نۇرىمبەت ساقتاعانوۆ زايسان اۋدانىنا جۇمىس ساپارى بارىسىندا ءساتپاي ەلدى مەكەنىندە ورنالاسقان اۋەجاي قۇرىلىسىنىڭ جۇمىس بارىسىمەن تانىستى، – دەپ حابارلايدى Dalanews.kz
«اۋەجاي قۇرىلىسى جوسپارعا سايكەس، كەيبىر جۇمىستار ءتىپتى كەستەدەن وزىق جۇرگىزىلۋدە. قازىرگى تاڭدا نىساندا 275 مامان جۇمىس ىستەۋدە، قاجەت بولعان جاعدايدا جۇمىسشىلار سانى كوبەيتىلەتىن بولادى. ۇشۋ-قونۋ جولاعىنىڭ ۇزىندىعى 2200 مەتردى قۇرايدى، جولاۋشىلار اعىنى ارتسا، بۇل كورسەتكىش تە ۇلعايتىلاتىن بولادى. بيىل العاشقى اۋە رەيستەرىن ىسكە قوسامىز دەپ جوسپارلاپ وتىرمىز»، – دەدى وبلىس اكىمى.
اۋەجاي قۇرامىنا 4000 شارشى مەترلىك اەروۆوكزال، ۇشاق جۇرەتىن جولاقتار، ءتورت اۋە كەمەسىنە ارنالعان پەررون، كوماندالىق-ديسپەچەرلىك پۋنكت، اپاتتىق-قۇتقارۋ قىزمەتى، مەتەوستانسيالار جانە راديوناۆيگاسيالىق جابدىقتار كىرەدى.
اۋەجاي ىسكە قوسىلعاننان كەيىن استانا، الماتى جانە وسكەمەن قالالارىنا ىشكى رەيستەر ۇشىرىلاتىن بولادى. سونىمەن قاتار، قىتايدىڭ ءۇرىمشى قالاسىنا، التاي اۋدانىنا جانە قاناس كولىنە حالىقارالىق باعىتتار اشۋ جوسپارلانعان.
بۇل اۋەجاي Bombardier Q400، ATR-72 جانە وسىعان ۇقساس وڭىرلىك دەڭگەيدەگى اۋە كەمەلەرىن قابىلداي الادى.
اتالعان جوبا – مەملەكەت باسشىسى قاسىم-جومارت توقايەۆتىڭ باستاماسىمەن جۇزەگە اسىرىلىپ وتىرعان، قازاقستاننىڭ كۋرورتتىق ايماقتارىندا ءۇش جاڭا اۋەجاي (زايسان، كاتونقاراعاي، كەندىرلىك) سالۋعا باعىتتالعان اۋقىمدى باعدارلامانىڭ ءبىر بولىگى.
