بۇگىن، 2025 جىلى 4 اقپاندا ۇلتتىق بانكتىڭ ەسكى ۇلگىدەگى قولما-قول اقش دوللارلارىن ساتىپ الۋ ماسەلەسىنە قاتىستى مالىمدەمە جاسادى. ءسويتىپ رەتتەۋشى ورگان بۇل رەتتە تىكەلەي اقش-تىڭ فەدەرالدى رەزەرۆتىك جۇيەسىمەن "ەسكى اقشانى" قابىلداۋ جونىندە ۋاعدالاستىققا قول جەتكىزگەنىن جاريالادى، دەپ جازادى Dalanews.kz.
ايتا كەتسەك، ەسكى ۇلگىدەگى اقش دوللارىنا قاتىستى جاعداي قازاقستاندا وزەكتى بولا باستاعانىنا ءبىراز بولدى. ويتكەنى جىلى ەسكى "اق دوللاردى" بانكتەردىڭ باسىم بولىگى قابىلداۋدى دوعارعان نەمەسە نارىق قۇنىنان ارزانعا ساتىپ الا باستادى. بۇل جاعدايعا ۇلتتىق بانك ارالاسىپ، ەكىنشى دەڭگەيدەگى بانكتەر مۇنداي كۋپيۋرالاردى قابىلداۋعا مىندەتتى ەكەنىن، سودان كەيىن ولاردان ونى ءوزى ساتىپ الاتىنىن مالىمدەگەن ەدى. الايدا، كەيىننەن بەلگىلى بولعانداي، ۇلتتىق بانكتىڭ ءوزى مۇنداي ۆاليۋتانى قابىلداۋدا 1% كوميسسيا الاتىن بولىپ شىقتى. بۇل رەتتە ۇلتتىق بانك مىنانى حابارلايدى:
"2024 جىلى ۇلتتىق بانك سۇرانىستان تىس قالعان ەسكى ۇلگىدەگى قولما-قول اقش دوللارلارىن كەيىن شەتەلگە شىعارۋ ءۇشىن ەكىنشى دەڭگەيلى بانكتەردەن ساتىپ الۋ تۋرالى شەشىم قابىلدادى. شەتەلدىك كونترسەرىكتەستەردىڭ نارىقتىق باعامى نەگىزىندە كوميسسيالىق سىياقى بەلگىلەندى. وتكەن جىلدىڭ سوڭىندا ۇلتتىق بانك 48 ملن اقش دوللارى سوماسىنا ەدب-دان قابىلدانعان سۇرانىستا جوق قولما-قول اقش دوللارلارىن شىعاردى. جۇرگىزىلگەن جۇمىستىڭ ناتيجەسىندە ۇلتتىق بانك تىكەلەي اقش-تىڭ فەدەرالدى رەزەرۆتىك جۇيەسىمەن ەسكى ۇلگىدەگى قولما-قول اقش دوللارلارىن قابىلداۋ جونىندە ۋاعدالاستىققا قول جەتكىزدى. بۇل ءوز كەزەگىندە تاسىمالداۋ، ساقتاندىرۋ سەكىلدى باسقا دا پوتەنسيالدى شىعىنداردى ازايتۋعا مۇمكىندىك بەردى. وسىلايشا اتالعان وپەراسيالار بويىنشا كوميسسيالىق سىياقى 0،3%-عا دەيىن تومەندەتىلدى".
ياعني، بۇل ارادا كوميسسيا مولشەرلەمەسى 1%-دان 0،3%-عا دەيىن تومەندەتىلدى. وسى جاعىنان العاندا، ۇلتتىق بانك ەسكى كۋپيۋراعا قاتىستى ماسەلەنى بەلگىلى ءبىر دەڭگەيدە شەشتى دەپ ايتۋعا بولادى.
سۇرانىستا جوق جينالىپ قالعان قولما-قول اقش دوللارلارىنىڭ ماسەلەسىن شەشۋ ءۇشىن ۇلتتىق بانك بۇل وپەراسيالاردى ەدب-نىڭ ءتيىستى سۇراۋ سالۋىنا سايكەس ۋاقىتشا شارا تۇرىندە جۇرگىزەتىنىن دە ناقتىلايدى.
بۇعان دەيىن سايتىمىزدا: "جوق ەمەس، بار، ءبىراق ەسكىسى. ەلىمىزدە دوللار ساتىپ العىسى كەلگەندەر ابدىراپ قالدى" دەگەن ماقالا جاريالانعان ەدى. شەتەلدە ەسكى دوللاردى ەش جەر قابىلدامايتىنى بەلگىلى بولىپ وتىر. باستاپقىدا، 2003 جانە 2006 جىلدارى شىققان 100 جانە 50 دوللارلىقتار "كەرەكسىز بولسا"، ەندى 2009 جىلعىسىنا دا كوشكەن.
