Búgin, 2025 jyly 4 aqpanda Ulttyq Banktiń eski úlgidegi qolma-qol AQSH dollarlaryn satyp alý máselesine qatysty málimdeme jasady. Sóıtip retteýshi organ bul rette tikeleı AQSH-tyń Federaldy rezervtik júıesimen "eski aqshany" qabyldaý jóninde ýaǵdalastyqqa qol jetkizgenin jarıalady, dep jazady Dalanews.kz.
Aıta ketsek, eski úlgidegi AQSH dollaryna qatysty jaǵdaı Qazaqstanda ózekti bola bastaǵanyna biraz boldy. Óıtkeni jyly eski "aq dollardy" bankterdiń basym bóligi qabyldaýdy doǵarǵan nemese naryq qunynan arzanǵa satyp ala bastady. Bul jaǵdaıǵa Ulttyq bank aralasyp, ekinshi deńgeıdegi bankter mundaı kýpúralardy qabyldaýǵa mindetti ekenin, sodan keıin olardan ony ózi satyp alatynyn málimdegen edi. Alaıda, keıinnen belgili bolǵandaı, Ulttyq Banktiń ózi mundaı valútany qabyldaýda 1% komısıa alatyn bolyp shyqty. Bul rette Ulttyq Bank mynany habarlaıdy:
"2024 jyly Ulttyq Bank suranystan tys qalǵan eski úlgidegi qolma-qol AQSH dollarlaryn keıin shetelge shyǵarý úshin ekinshi deńgeıli bankterden satyp alý týraly sheshim qabyldady. Sheteldik kontrseriktesterdiń naryqtyq baǵamy negizinde komısıalyq syıaqy belgilendi. Ótken jyldyń sońynda Ulttyq Bank 48 mln AQSH dollary somasyna EDB-dan qabyldanǵan suranysta joq qolma-qol AQSH dollarlaryn shyǵardy. Júrgizilgen jumystyń nátıjesinde Ulttyq Bank tikeleı AQSH-tyń Federaldy rezervtik júıesimen eski úlgidegi qolma-qol AQSH dollarlaryn qabyldaý jóninde ýaǵdalastyqqa qol jetkizdi. Bul óz kezeginde tasymaldaý, saqtandyrý sekildi basqa da potensıaldy shyǵyndardy azaıtýǵa múmkindik berdi. Osylaısha atalǵan operasıalar boıynsha komısıalyq syıaqy 0,3%-ǵa deıin tómendetildi".
Iaǵnı, bul arada komısıa mólsherlemesi 1%-dan 0,3%-ǵa deıin tómendetildi. Osy jaǵynan alǵanda, Ulttyq Bank eski kýpúraǵa qatysty máseleni belgili bir deńgeıde sheshti dep aıtýǵa bolady.
Suranysta joq jınalyp qalǵan qolma-qol AQSH dollarlarynyń máselesin sheshý úshin Ulttyq Bank bul operasıalardy EDB-nyń tıisti suraý salýyna sáıkes ýaqytsha shara túrinde júrgizetinin de naqtylaıdy.
Buǵan deıin saıtymyzda: "Joq emes, bar, biraq eskisi. Elimizde dollar satyp alǵysy kelgender abdyrap qaldy" degen maqala jarıalanǵan edi. Shetelde eski dollardy esh jer qabyldamaıtyny belgili bolyp otyr. Bastapqyda, 2003 jáne 2006 jyldary shyqqan 100 jáne 50 dollarlyqtar "kereksiz bolsa", endi 2009 jylǵysyna da kóshken.
