Qazaqstan Iran portynda terminal salyp, Aziia men Afrika naryǵyna shyǵýdy kózdep otyr, dep habarlaidy dalanews.kz.
Qazaqstan Irandaǵy Bender-Abbas qalasynda ornalasqan Shahid Radjai portynda júk aýystyryp tieýge arnalǵan terminal salýdy josparlap otyr. Bul joba elimizdiń Ońtústik jáne Ońtústik-Shyǵys Aziia elderine eksporttyq jetkizilimderin keńeitýge múmkindik beredi. Bul týraly Premer-ministrdiń orynbasary – ulttyq ekonomika ministri Serik Jumanǵarin málimdedi.
Ministrdiń aitýynsha, terminal Bender-Abbas portyndaǵy 15 gektar aýmaqta boi kóteredi. Joba memlekettik biýdjet esebinen emes, jeke investorlardyń qarjysyna júzege asyrylady.
«Qazir kelisimniń sońǵy kezeńi júrip jatyr. Jerdi jalǵa alý sharttary kelisildi. Meniń bilýimshe, qujattarǵa qol qoiýǵa az qaldy», – dedi Serik Jumanǵarin.
Sondai-aq ministr búginde Qazaqstannan Túrikmenstan men Iran arqyly Parsy shyǵanaǵyna shyǵatyn temirjol baǵyty jumys istep turǵanyn aitty.
Onyń sózinshe, temirjol Aqtaýdan bastalyp, Túrikmenstan arqyly ótedi. Baǵytta Etrek jáne Serahs atty eki shekaralyq ótkel bar. Eki baǵyt ta Parsy shyǵanaǵyndaǵy óńirdegi eń iri teńiz qaqpalarynyń biri sanalatyn Bender-Abbas portyna alyp barady.
«Bul Qazaqstanǵa Úndistan, Shyǵys Afrika, Parsy shyǵanaǵy elderi men Ońtústik-Shyǵys Aziia naryqtaryna tikelei shyǵýǵa jol ashady. Jobanyń basty maqsaty – osy», – dedi ministr.
