Қазақстан Иран портында терминал салып, Азия мен Африка нарығына шығуды көздеп отыр, деп хабарлайды dalanews.kz.
Қазақстан Ирандағы Бендер-Аббас қаласында орналасқан Шахид Раджаи портында жүк ауыстырып тиеуге арналған терминал салуды жоспарлап отыр. Бұл жоба еліміздің Оңтүстік және Оңтүстік-Шығыс Азия елдеріне экспорттық жеткізілімдерін кеңейтуге мүмкіндік береді. Бұл туралы Премьер-министрдің орынбасары – ұлттық экономика министрі Серік Жұманғарин мәлімдеді.
Министрдің айтуынша, терминал Бендер-Аббас портындағы 15 гектар аумақта бой көтереді. Жоба мемлекеттік бюджет есебінен емес, жеке инвесторлардың қаржысына жүзеге асырылады.
«Қазір келісімнің соңғы кезеңі жүріп жатыр. Жерді жалға алу шарттары келісілді. Менің білуімше, құжаттарға қол қоюға аз қалды», – деді Серік Жұманғарин.
Сондай-ақ министр бүгінде Қазақстаннан Түрікменстан мен Иран арқылы Парсы шығанағына шығатын теміржол бағыты жұмыс істеп тұрғанын айтты.
Оның сөзінше, теміржол Ақтаудан басталып, Түрікменстан арқылы өтеді. Бағытта Етрек және Серахс атты екі шекаралық өткел бар. Екі бағыт та Парсы шығанағындағы өңірдегі ең ірі теңіз қақпаларының бірі саналатын Бендер-Аббас портына алып барады.
«Бұл Қазақстанға Үндістан, Шығыс Африка, Парсы шығанағы елдері мен Оңтүстік-Шығыс Азия нарықтарына тікелей шығуға жол ашады. Жобаның басты мақсаты – осы», – деді министр.
