ۋكراينانىڭ ۇرىس ءجۇرىپ جاتقان اۋماقتارىنان 667 وتباسى،  احىسكا  تۇرىكتەرى تۇركياعا قونىس تەبەتىن بولدى. تۇركيا سىرتقى ىستەر مينيسترلىگىنىڭ كوشىرىپ الۋ ۇسىنىسىن تۇرىك ءماجىلىسى ماقۇلداعان. 1992 جىلى قابىلدانعان زاڭعا سايكەس كوشىپ كەلگەن احىسكا تۇرىكتەرىن بەلگىلى ءبىر ايماقتارعا قونىستاندىرۋ ەرەجەسى بەكىتىلگەن. مينيسترلىكتەن حابار شىعىسىمەن تۇرىك باسپاسوزىندە 667 وتباسىمەن شەكتەلمەۋ كەرەكتىگىن، ۋكرايناداعى بارلىق 8 مىڭعا جۋىق احىسكا تۇرىكتەرىن كوشىرىپ الۋ تۋرالى ۇسىنىستار ايتىلىپ جاتىر.  مۇنىڭ ءبىرقاتار سەبەبى ءسوز بولدى.  21 yüzyıl ينستيتۋتىنىڭ زەرتتەۋشىسى سابىر اسكەروگلۋ  ءوزىنىڭ ماقالاسىندا سەبەپتەرىن ۇشكە بولگەن. بىرىنشىدە، ۋكراينا داعدارىسى سوعىس جاعدايىنا جاقىن،  اسكەرگە جاپپاي الۋ ءجۇرىپ جاتىر. ەكىنشىدەن، احىسكا تۇرىكتەرى ۇرىستار ءجۇرىپ جاتقان دونباسقا جاقىن حاركوۆ، حەرسون، نيكولايەۆكا سياقتى قالالاردا تۇرادى. ۇشىنشىدەن، ۋكراينا داعدارىسى ەل ەكونوميكاسىنا اسەر ەتۋدە. ەلدە حالىقتىڭ ءال-اۋقاتى ناشارلاپ، جۇمىسسىزدىق كوبەيىپ كەلەدى. ۋكراينا ازاماتتارى سىرت مەملەكەتتەرگە قونىس اۋدارۋدا.

«احىسكا» تۇرىكتەرى - 1944 جىلدىڭ قاراشا ايىندا ءستاليننىڭ وكتەمدىگى كەزىندە ورتا ازيا مەن قازاقستان اۋماعىنا قونىس اۋدارىلعان حالىقتاردىڭ ءبىرى. ولاردىڭ تاريحي وتانى – قازىرگى گرۋزيانىڭ وڭتۇستىك-باتىس اۋداندارى سانالادى. كەزىندە وسى اۋداندار وسمان يمپەرياسىنىڭ قۇرامىنا ەنىپ، احىسك پاتشالىعىن قۇراعان. 1829 جىلعى تۇرىك-ورىس سوعىسىنان كەيىن اتالمىش جەرلەر رەسەي يمپەرياسىنىڭ قول استىنا ءوتىپ، احالسيح ۋەزد اتاعىن العان. وسى كەزەڭدە شەكارا جابىلىپ، تۇرىك حالقىمەن قارىم قاتىناس ءۇزىلىپ قالادى. سول ۋاقىتتان باستاپ “احىسكا” تۇرىكتەرى دەپ اتالىپ، جاڭا تۇرىكتەر تاريحى باستالدى. ولار وزدەرىنىڭ ءتۇپ تامىرى تۇرىك ۇلتىنان تاراعاندىقتارىن مويىندايدى.

قازىرگى تاڭدا قازاقستاندا 180 مىڭ، رەسەيدە 95مىڭ، ءازىربايجان 87 مىڭ، قىرعىزستاندا 42 مىڭ،  تۇركيادا 76 مىڭ، اقش-تا 16 مىڭ،  ۋكرياندا 8 مىڭ احىسكا تۇرىكتەرى تۇرادى.

نازار تۇرىقباي ۇلى