سيفرلاندىرۋ جۇيەسى – جاھاندىق باسەكەدە ايرىقشا قابىلەتتىلىككە جەتۋدىڭ تاپتىرماس جولى. سوندىقتان دا ەلىمىزدە سيفرلىق تەحنولوگيالاردى دامىتۋ ارقىلى حالىقتىڭ ءومىر ساپاسىن جاقسارتۋعا، ەكونوميكانى نىعايتۋعا جانە دەنساۋلىق ساقتاۋ سالاسىنىڭ تيىمدىلىگىن ارتتىرۋعا باسا نازار اۋدارىلۋدا. اسىرەسە اۋىلدىق جەرلەردەگى دەنساۋلىق ساقتاۋ قىزمەتتەرىنىڭ ساپاسىن ارتتىرۋ سيفرلاندىرۋدىڭ باستى جەتىستىكتەرىنىڭ ءبىرى بولىپ وتىر.
مەملەكەت باسشىسى قاسىم-جومارت توقايەۆ بيىل عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا سويلەگەن سوزىندە: «بۇكىل الەمدە جاساندى ينتەللەكت ادام ەڭبەگىن الماستىرىپ جاتىر. مەديسينالىق دياگنوستيكا جانە زاڭگەرلىك كەڭەس بەرۋ سياقتى كۇردەلى سالالاردا دا كەڭىنەن قولدانىلا باستادى. ءتىپتى، نەيروجەلىلەر سۋرەت سالىپ، مۋزىكا، ولەڭ جازادى.
ەلىمىزدە جاساندى ينتەللەكت قاۋىپسىزدىك جۇيەسى، مەديسينا، بانك قىزمەتى، لوگيستيكا، ءبىلىم بەرۋ سالالارىنا ويداعىداي ەنگىزىلىپ جاتىر. وسى تەحنولوگيانى مەڭگەرگەن مىقتى كومپانيالار دا پايدا بولدى. سوعان قاراماستان، جاساندى ينتەللەكت يندۋسترياسىن ودان ءارى دامىتۋ ءۇشىن مەملەكەت كەشەندى قولداۋ كورسەتۋى كەرەك.
مالىمەتتەر مەن تەحنولوگيالىق ينفراقۇرىلىم بارىنشا قولجەتىمدى بولۋى كەرەك. سوندىقتان قولايلى ەكوجۇيە قالىپتاستىرۋ قاجەت»، – دەگەن ەدى.
راسىندا دا جاساندى ينتەللەكت قازىرگى مەديسينالىق دياگنوستيكادا قولدانىلۋى بويىنشا ۇلكەن سەرپىلىس جاساپ وتىر. ول ءداستۇرلى ادىستەرمەن سالىستىرعاندا مەديسينالىق قىزمەت كورسەتۋ ساپاسىن ارتتىرۋعا، ۋاقىت پەن رەسۋرستاردى ۇنەمدەۋگە مۇمكىندىك بەرەدى. جاساندى ينتەللەكت ادام اعزاسىنىڭ كۇردەلى جۇيەلەرىن تەرەڭ تالداۋ، اۋرۋلاردى انىقتاۋ جانە ەمدەۋ ادىستەرىن وڭتايلاندىرۋ ءۇشىن قولدانىلاتىن ماڭىزدى قۇرال بولىپ وتىر.
جالپى جاساندى ينتەللەكت ناۋقاستىڭ مەديسينالىق دەرەكتەرىن، ياعني رەنتگەن سۋرەتتەرى، ماگنيتتىك-رەزونانستىق توماگرافيا، ،كومپيۋتەرلىك تومورافيا سەكىلدى قۇرالداردىڭ سكانەرلەۋ ناتيجەلەرىن جىلدام جانە ساپالى تالداي الادى. بۇل دارىگەرلەرگە ۋاقىت ۇنەمدەۋگە جانە دياگنوز قويۋدا دالدىك پەن تيىمدىلىكتى ارتتىرۋعا كومەكتەسەدى. جاساندى ينتەلەكت دارىگەرلەردىڭ قاتەسىن ازايتىپ، ادامدارعا ءتان شارشاۋ، نازاردىڭ باسا جاققا ۋۋى سياقتى كەمشىلىكتەردى جويادى. بۇل اسىرەسە شۇعىل جانە ءبىر توپ دارىگەردىڭ كومەگىن قاجەت ەتەتىن جاعدايلاردا ماڭىزدى رولگە يە.
پرەزيدەنتتىڭ تاپسىرماسىنان كەيىن تۇركىستان وبلىسىنىڭ دەنساۋلىق ساقتاۋ سالاسىندا جاساندى ينتەللەكت تەحنولوگيالارىن قولدانۋ مۇمكىندىگى ارتىپ، بۇل ايماقتا مەديسينالىق قىزمەت كورسەتۋدىڭ ساپاسى ايتارلىقتاي جاقسارتۋعا ىقپال ەتۋى عاجاپ ەمەس. ويتكەنى جاڭاشىلدىققا ۇمتىلۋدا بۇل وبلىستىڭ بەلسەندىلىگى جوعارى. تۇركىستان وبلىسىندا جاساندى ينتەللەكت قولدانىسقا كەڭىنەن ەنگىزىلسە، ءسوز جوق دەنساۋلىق ساقتاۋ سالاسىنىڭ دامۋىندا جاڭا سەرپىن پايدا بولىپ، تۇرعىندارعا جوعارى دەڭگەيدە مەديسينالىق قىزمەت كورسەتۋ مۇمكىندىگى كەڭەيتىلەر ەدى. ايتسە دە تۇركىستان وبلىسىنىڭ دەنساۋلىق ساقتاۋ سالاسىنا سيفرلاندىرۋ جۇيەسىن كەڭىنەن ەنگىزۋدىڭ ناتيجەسىندە ءبىرقاتار ومىرشەڭ جوبالار جۇزەگە اسۋدا. سونىڭ ءبىرى – دەنساۋلىق ساقتاۋ ماسەلەلەرىنە قاتىستى Call-ورتالىقتىڭ اشىلۋى.
تۇركىستان وبلىسىندا دەنساۋلىق ساقتاۋ سالاسىنداعى ساپانى جاقسارتۋ ماقساتىندا تاۋلىك بويى جۇمىس ىستەيتىن ءبىرىڭعاي مەديسينالىق-اقپاراتتىق Call-ورتالىق اشىلدى. تۇركىستان وبلىسى قوعامدىق دەنساۋلىق باسقارماسى جانىنان قۇرىلعان بۇل ورتالىق تۇرعىندارعا كەز كەلگەن ۋاقىتتا مەديسينالىق كەڭەس الۋ مۇمكىندىگىن ۇسىنادى. ورتالىققا 1305 قىسقا ءنومىرى ارقىلى حابارلاسۋعا بولادى. اشىلۋ سالتاناتىنا تۇركىستان وبلىسى اكىمىنىڭ ورىنباسارى ارمان سابيتوۆ پەن تۇركىستان وبلىسى قوعامدىق دەنساۋلىق باسقارماسىنىڭ باسشىسى مارات پاشيموۆ قاتىسىپ، جاڭا باستامانىڭ ماڭىزدىلىعىن اتاپ ءوتتى. بۇل شارا ايماقتاعى مەديسينالىق قىزمەتتىڭ قولجەتىمدىلىگى مەن ساپاسىن ارتتىرۋعا زور ۇلەس قوساتىنى ءسوزسىز.
اتالعان Call-ورتالىقتىڭ نەگىزگى ماقساتى – وبلىستىق مەديسينالىق قىزمەتتەردىڭ ۇيلەسىمدى جۇمىسىن قامتاماسىز ەتۋ. سونىمەن قاتار تۇرعىنداردىڭ بارلىق وتىنىشتەرىن دەر كەزىندە قاراۋ، اقپاراتتىق-تالداۋ ورتالىعىن قۇرىپ، ساپالى قىزمەت ۇسىنۋ. بۇل ورتالىق «ءبىر تەرەزە» قاعيداتى بويىنشا قالا مەن وبلىس تۇرعىندارىنا دەنساۋلىق ساقتاۋ ماسەلەلەرى بويىنشا بىرىزدەندىرىلگەن قىزمەت ۇسىنۋعا ارنالعان مامانداندىرىلعان باعدارلامانى جۇزەگە اسىرماق.
تۇرعىندار Call-ورتالىققا حابارلاسىپ، مەديسينالىق مەكەمە نەمەسە ماماننىڭ قىزمەتىنە قاتىستى شاعىمدار ءبىلدىرىپ، دەنساۋلىق ساقتاۋ سالاسىنا قاتىستى زاڭ اياسىندا تۇشىمدى جاۋاپ الا الادى. ورتالىققا كەلىپ تۇسكەن شاعىمدار اپ-ساتتە قارالىپ، وپەراتورلار باس دارىگەرلەردىڭ ورىنباسارلارىمەن تىكەلەي بايلانىسقا شىعىپ، ءىس ناتيجەسى باقىلاۋعا الىناتىن بولادى. ورتالىقتا 12 قىزمەتكەر جۇمىس ىستەسە، ونىڭ 10-ى وپەراتور، بارلىعى مەديسينا سالاسىنىڭ ماماندارى.
شاعىمدار نەگىزىندە توقسان سايىن وبلىستىڭ مەديسينالىق ۇيىمدارىنىڭ رەيتينگتەرى جاسالادى. بۇل باعدارلاما حالىققا قىزمەت كورسەتۋ سالاسىنداعى مەديسينالىق مەكەمەلەر جۇمىسىنىڭ ساپاسىن، جەدەلدىگىن جانە ايقىندىعىن ارتتىرۋعا مۇمكىندىك بەرەدى.
1305 نومىرىنە تۇركىستان وبلىسى بويىنشا ۇيالى تەلەفونداردان، ياعني بارلىق ۇيالى بايلانىس وپەراتورلارى ارقىلى قوڭىراۋ شالۋ تەگىن. سونىمەن بىرگە WhatsApp مەسەندجەرى ارقىلى حابارلاما قالدىرۋعا نەمەسە 1305.kz@mail.ru ەلەكتروندىق پوچتاسىنا حات جازۋعا مۇمكىندىك بار. بۇل ورتالىق مەديسينا مەكەمەلەرى مەن حالىق اراسىنداعى بايلانىستى جاقسارتىپ، قىزمەت ساپاسىن ارتتىرۋدا ماڭىزدىلىققا يە.
جاقىندا تۇركىستان وبلىسىنىڭ دەنساۋلىق ساقتاۋ جۇيەسىن دامىتۋ بويىنشا 2024-2026 جىلدارعا ارنالعان تۇجىرىمداما تالقىلاندى. بۇل ماڭىزدى ماسەلە وبلىس اكىمى دارحان ساتىبالدىنىڭ توراعالىعىمەن وتكەن ءماجىلىس وتىرىسىندا كوتەرىلدى. وتىرىس بارىسىندا مەديسينا سالاسىن سيفرلاندىرۋ ماسەلەسى دە نازاردان تىس قالمادى. جيىندا وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋالييەۆ ءوڭىردىڭ مەديسينالىق ينفراقۇرىلىمىن جاقسارتۋ جانە حالىققا ساپالى قىزمەت كورسەتۋ جولدارى تۋرالى كەڭىنەن باياندادى.
بۇگىىندە تۇركىستان وبلىسىندا دەنساۋلىق ساقتاۋ سالاسى قارقىندى دامىپ كەلەدى. ايماقتا 45 مەملەكەتتىك مەديسينالىق مەكەمە، 700-دەن استام ۇيىم، ونىڭ ىشىندە 130 جەكە مەنشىك مەكەمە جۇمىس ىستەيدى. بۇل مەكەمەلەردىڭ ىشىندە 36 ەمحانا مەن باسقا دا دەنساۋلىق ساقتاۋ نىساندارى حالىققا مەديسينالىق كومەك كورسەتەدى. وبلىس بويىنشا 35 مىڭنان استام دارىگەر مەن ورتا مەديسينا قىزمەتكەرى ەڭبەك ەتىپ ءجۇر. تۇركىستان وبلىسى حالقى جىل سايىن 3 ميلليوننان استام كلينيكالىق-دياگنوستيكالىق قىزمەت الادى، 900 مىڭنان استام جەدەل جاردەم شاقىرتۋلارى مەن 3،5 مىڭعا جۋىق ساناۆياسيا شاقىرتۋلارى ورىن الادى. 2023 جىلى وبلىس تۇرعىندارى 14 ميلليوننان استام امبۋلاتورلى قابىلداۋعا جۇگىنسە، ستاسيونارلى كومەك 2 ميلليونعا جۋىق ناۋقاسقا كورسەتىلدى. ونىڭ ىشىندە 547 مىڭنان استام ادامعا وتا جاسالىپتى.
وڭىردە مەديسينالىق قىزمەتتەردىڭ قولجەتىمدىلىگىن ارتتىرۋ ماقساتىندا جاڭا نىسانداردىڭ قۇرىلىسى قارقىندى جۇرۋدە. سونداي-اق، «اۋىلدا دەنساۋلىق ساقتاۋدى جاڭعىرتۋ» ۇلتتىق پيلوتتىق جوباسى اياسىندا 49 جاڭا دەنساۋلىق ساقتاۋ نىسانىنىڭ قۇرىلىسىن جۇرگىزۋ جوسپارلانعان. بۇل جوبالار تەك مەديسينالىق ينفراقۇرىلىمنىڭ كەڭەيۋىنە عانا ەمەس، سونىمەن قاتار اۋىلدىق ايماقتاردا دارىگەرلەر مەن مامانداردىڭ جەتىسپەۋشىلىگىن جويۋعا، تۇرعىندارعا مەديسينالىق كومەك كورسەتۋدىڭ ساپاسىن ارتتىرۋعا باعىتتالعان.
سيفرلاندىرۋ سالاسى دا ءوڭىردىڭ دەنساۋلىق ساقتاۋ جۇيەسىنىڭ دامۋىندا ماڭىزدى ءرول اتقارىپ وتىر. قازىرگى تاڭدا تۇركىستان وبلىسىندا مەديسينالىق قىزمەت كورسەتۋ ساپاسىن جاقسارتۋ ءۇشىن سيفرلىق تەحنولوگيالار بەلسەندى ەنگىزىلۋدە. ماسەلەن، مەديسينالىق مەكەمەلەردىڭ جۇمىسىن اۆتوماتتاندىرۋ، ەمدەلۋشىلەردىڭ دەرەكتەرىن سيفرلىق فورماتتا ساقتاۋ جانە وڭدەۋ، قاشىقتان كەڭەس بەرۋ قىزمەتتەرىن كەڭەيتۋ سياقتى باعىتتار دامىتىلىپ جاتىر. جاساندى ينتەللەكت پەن سيفرلىق جۇيەلەردى پايدالانۋ ارقىلى دياگنوستيكانىڭ دالدىگىن ارتتىرۋ، مەديسينالىق قىزمەت كورسەتۋ مەرزىمدەرىن قىسقارتۋ، سونىمەن قاتار مەديسينالىق قىزمەتكەرلەردىڭ جۇكتەمەسىن جەڭىلدەتۋ الداعى ۋاقىتقا جۇيەلى جوسپارلانعان. قازىرگى ۋاقىتتا قاشىقتان دياگنوستيكا جۇرگىزۋ، تەلەمەديسينا جانە ەلەكتروندى رەسەپتەر ەنگىزۋ جۇمىستارى ءوز ناتيجەسىن بەرۋدە.
مەديسينا سالااسىنداعى جاڭاشىلدىقتار مەن رەفورمالار حالىقتىڭ دەنساۋلىعىن جاقسارتۋعا، سونداي-اق تۇركىستان وبلىسىنىڭ دەنساۋلىق ساقتاۋ جۇيەسىن ەلىمىزدىڭ الدىڭعى قاتارلى ايماقتارىنىڭ ءبىرى ەتۋگە باعىتتالعان. سيفرلاندىرۋ مەن جاڭا تەحنولوگيالاردى ەنگىزۋ ارقىلى وبلىس تۇرعىندارىنا جوعارى ساپالى، ءتيىمدى ءارى قولجەتىمدى مەديسينالىق كومەك كورسەتۋ مۇمكىندىگى ارتىپ كەلەدى. ويتكەنى جاڭا نىساندار مەن سيفرلىق جۇيەلەر دەنساۋلىق ساقتاۋ سالاسىنداعى بارلىق كورسەتكىشتەردىڭ جاقسارۋىنا ىقپال ەتەتىن ماڭىزدى قادامداردىڭ ءبىرى.
– قازىرگى ۋاقىتتا تۇركىستان وبلىسىندا مەديسينالىق-سانيتارلىق العاشقى كومەك كورسەتەتىن 73 نىسانعا قاجەتتىلىك تۋىنداپ وتىر. بۇل ماسەلەنى شەشۋ ماقساتىندا ارنايى ينۆەستورلار تارتىلىپ، ءوڭىردىڭ مەديسينالىق ينفراقۇرىلىمىن جاقسارتۋ بويىنشا اۋقىمدى جۇمىستار قولعا الىنعان. جىل سايىن بۇل سالاعا بولىنەتىن قارجى كولەمى ارتىپ، اۋرۋحانالاردىڭ زاماناۋي تالاپتارعا ساي جاڭارتىلۋى ماقساتىندا كوپتەگەن جوبالار جۇزەگە اسىرىلۋدا.
بيىل 8 اۋداندىق اۋرۋحانانىڭ عيماراتتارىندا كۇردەلى جوندەۋ جۇمىستارى قولعا الىندى. بۇدان بولەك، وڭىردە مەديسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ ءۇشىن ۇلتتىق جوبا اياسىندا 4 اۋداندىق اۋرۋحانا كوپبەيىندى اۋدانارالىق اۋرۋحانا رەتىندە قايتا بەيىمدەلۋدە. مۇنداي اۋرۋحانالاردىڭ زاماناۋي مەديسينالىق تالاپتارعا ساي جۇمىس ىستەۋى ءۇشىن قاجەتتى جاڭارتۋلار مەن قۇرىلىس جۇمىستارىن جۇرگىزۋ وتە ماڭىزدى. بۇل وزگەرىستەرگە سايكەس اۋرۋحانالاردا تازا ايماقتاردىڭ قۇرىلۋى مىندەتتەلدى. ناقتى ايتقاندا، جەتىساي، ورداباسى، سايرام اۋداندارىندا، وبلىستىق كلينيكالىق اۋرۋحانادا جانە كەنتاۋ قالالىق اۋرۋحاناسىندا ارنايى تازا ايماقتار ءقۇۇرىلۋدا. بۇل ءىس-شارالار جۇقپالى اۋرۋلاردىڭ الدىن الۋ، ينفەكسيالاردىڭ تارالۋىن بولدىرماۋ ءۇشىن ماڭىزدى قادام بولماق.
سونداي-اق، تۇركىستان وبلىسىنىڭ دەنساۋلىق ساقتاۋ سالاسىندا كورسەتىلەتىن مەديسينالىق قىزمەتتەردىڭ ساپاسىن ارتتىرۋ ماقساتىندا سەرۆيستىك مودەلدى ەنگىزۋ ۇسىنىلۋدا. بۇل مودەل پاسيەنتكە باعىتتالعان باستاما. قازىرگى ۋاقىتتا حالىقتىڭ مەديسينالىق قىزمەتتەرگە دەگەن سۇرانىسىنا جاۋاپ بەرە وتىرىپ، قىزمەت كورسەتۋ ساپاسىن جاقسارتۋعا مۇمكىندىك بەرىلۋدە. پاسيەنتتەرگە كورسەتىلەتىن قىزمەتتەر تەك مەديسينالىق ەمەس، سونداي-اق ەتيكا مەن دەونتولوگيا تۇرعىسىنان دا قاراستىرىلاتىن بولادى. مۇندا پاسيەنتتەردىڭ قاۋىپسىزدىگى مەن جايلىلىعىنا ەرەكشە نازار اۋدارىلعان. سونىمەن قاتار مەديسينا قىزمەتكەرلەرىنىڭ اراسىنداعى كوممۋنيكاسيا دەڭگەيىن ارتتىرۋ، مەديسينالىق ەتيكانىڭ ساقتالۋى، جانە تەحنولوگيالاردى جەتىلدىرۋ ماقساتىندا ءتۇرلى ءىس-شارالار قولعا الىنىپ جاتىر.
مەديسينالىق قىزمەتتەردى جاقسارتۋداعى باستى ماقسات – حالىقتىڭ دەنساۋلىعىن نىعايتۋ جانە مەديسينالىق كومەك كورسەتۋ سالاسىندا ساپا مەن قولجەتىمدىلىكتى ارتتىرۋ. بۇل باعىتتا اتقارىلاتىن جۇمىستار تەك قانا مەديسينالىق نىسانداردى جاڭارتۋمەن شەكتەلمەي، قىزمەت كورسەتۋ مادەنيەتىن، حالىقپەن بايلانىس جاساۋ تاسىلدەرىن، ءارى تەحنولوگيالىق پروسەستەردى جەتىلدىرۋدى دە قامتيدى. تۇركىستان وبلىسىندا جۇزەگە اسىرىلىپ جاتقان بۇل اۋقىمدى وزگەرىستەر مەديسينالىق قىزمەتتەردىڭ ستاندارتتارىن جاقسارتىپ، وبلىس تۇرعىندارىنىڭ دەنساۋلىعىن قورعاۋداعى شەشۋشى رولگە يە، – دەيدى باسقارما باسشىسى.
جالپى تۇركىستان وبلىسىندا دەنساۋلىق ساقتاۋ سالاسىنىڭ دامۋى ءۇشىن جاڭا مۇمكىندىكتەر مەن وڭتايلى شەشىمدەردى ىزدەۋ باعىتىندا اۋقىمدى جۇمىستار جۇرگىزىلۋدە. سونىڭ ءبىرى – ماتەريالدىق-تەحنيكالىق جاراقتاندىرۋ ماسەلەسى. قازىرگى تاڭدا كوپ جاعدايدا ەسكىرگەن جابدىقتار مەن تەحنيكالار دەنساۋلىق ساقتاۋ قىزمەتىنىڭ ساپاسىن تومەندەتۋدە. وسىعان بايلانىستى، وبلىستىڭ مەديسينالىق مەكەمەلەرىندە قولدانىلاتىن تەحنيكا مەن جابدىقتاردىڭ جاعدايى ساراپتالىپ، جاڭارتۋ ءۇشىن ناقتى قاجەتتىلىكتەر انىقتالدى. بۇل پروسەسس تەك قانا جاڭا تەحنولوگيالاردى ەنگىزۋگە عانا ەمەس، مەديسينالىق قىزمەت كورسەتۋ ساپاسىنىڭ ارتۋىنا دا وڭ اسەر ەتۋدە.
ارينە، زاماناۋي قۇرال-جابدىقتار مەن جاڭا تەحنولوگيالار دەنساۋلىق ساقتاۋ سالاسىنىڭ تيىمدىلىگىن ارتتىرعانىمەن، مەديسينا قىزمەتكەرلەرىنىڭ كاسىبي بىلىكتىلىگىن جەتىلدىرۋ دە ماڭىزدى فاكتورلاردىڭ ءبىرى بولىپ ەسەپتەلەدى. وسى ماقساتتا وبلىستىق جەدەل مەديسينالىق جاردەم ستانسياسى بازاسىندا سيمۋلياسيالىق وقۋ ورتالىعىن قۇرۋ جوسپارلانۋدا. بۇل ورتالىق دارىگەرلەر مەن مەدبيكەلەر ءۇشىن زاماناۋي ءبىلىم الۋ مەن داعدىلاردى مەڭگەرۋگە مۇمكىندىك بەرەتىن وقۋ الاڭى بولماق. مۇندا مەديسينالىق قىزمەتكەرلەر كاسىبي تاجىريبەدەن ءوتىپ، ءتۇرلى جاعدايلاردا قالاي ارەكەت ەتۋ كەرەكتىگىن ۇيرەنەدى. بۇل ءىس-شارالاردىڭ ماقساتى – كادرلاردىڭ دايارلىعىن ارتتىرىپ، مەديسينالىق كومەك كورسەتۋ ساپاسىن جاقسارتۋ.
تۇركىستان وبلىسىنىڭ دەنساۋلىق ساقتاۋ جۇيەسىندە جاڭا تەحنولوگيالار مەن سيفرلىق جۇيەلەردى ەنگىزۋ بويىنشا دا جۇمىستار جەمىستى جالعاسۋدا. بۇل جۇيە دەنساۋلىق ساقتاۋ كورسەتكىشتەرىن ناقتى ۋاقىت رەجيمىندە باقىلاۋعا مۇمكىندىك بەرەدى.
قازىرگى ۋاقىتتا وبلىستا شەتەلدىك سەرىكتەس كلينيكالارمەن بايلانىستى دامىتۋعا باسا نازار اۋدارىلۋدا. ولاردىڭ تاجىريبەلەرى مەن وزىق تەحنولوگيالارىن ەنگىزۋ ارقىلى مەديسينالىق قىزمەتتەردىڭ ساپاسىن ارتتىرۋ جانە جاڭا مۇمكىندىكتەرگە قول جەتكىزۋ كوزدەلگەن. تۇركىستان وبلىسىنداعى دەنساۋلىق ساقتاۋ جۇيەسىن حالىقارالىق دەڭگەيدە باسەكەگە قابىلەتتى ەتۋ ءۇشىن يننوۆاسيالىق مەديسينالىق قىزمەتتەر مەن جۇيەلەردى قۇرۋ، جاڭا تەحنولوگيالاردى ەنگىزۋ ءارى قىزمەت كورسەتۋ تيىمدىلىگىن ارتتىرۋ ماڭىزدى. بۇل وبلىس تۇرعىندارىنىڭ دەنساۋلىعىن ساقتاۋدا سالانىڭ جاڭا دەڭگەيگە كوتەرىلۋىنە جول اشادى.
سونداي-اق، باسقوسۋدا دەنساۋلىق ساقتاۋ سالاسىندا پروفيلاكتيكالىق شارالار مەن ەرتە دياگنوستيكانىڭ ماڭىزدىلىعى ەرەكشە اتاپ ءوتىلدى. دەنساۋلىق ساقتاۋ جۇيەسىنىڭ باستى مىندەتى – حالىقتىڭ دەنساۋلىعىن ساقتاۋ عانا ەمەس، سونىمەن قاتار اۋرۋلاردى الدىن الا بولجاۋ مەن ولاردىڭ دامۋ دەڭگەيىن ەرتە كەزەڭدە انىقتاۋ. مۇنداي جۇيەلەردىڭ دامۋى حالىقتىڭ ءومىر ءسۇرۋ ساپاسىن ارتتىرىپ، مەديسينالىق شىعىنداردى ازايتۋعا مۇمكىندىك بەرەدى.
جالپى تۇركىستان وبلىسىنداعى دەنساۋلىق ساقتاۋ جۇيەسىنىڭ جەتىلدىرىلۋى جاڭا تەحنولوگيالاردى ەنگىزۋمەن قاتار، تۇرعىنداردىڭ دەنساۋلىعىن قورعاۋ، الدىن الۋ شارالارى مەن مەديسينالىق قىزمەت كورسەتۋ ساپاسىن ارتتىرۋعا باعىتتالعان اۋقىمدى وزگەرىستەردى قامتيدى. سيفرلاندىرۋ مەن يننوۆاسيالار دەنساۋلىق ساقتاۋ سالاسىنا جاڭا مۇمكىندىكتەر اشىپ، وبلىس تۇرعىندارىنىڭ مەديسينالىق كومەككە قولجەتىمدىلىگىن ارتتىرۋدا ماڭىزدى ءرول اتقارادى.
ءبىر ايتا كەتەر جايت، سوزىمىزگە تۇزدىق ءۇشىن تۇركىستان قالالىق ورتالىق اۋرۋحاناسىنىڭ زاماناۋي قۇرال-جابدىقپەن قامتىلعانىن اتاپ وتسەك بولادى. باس دارىگەر جانبولات دىلدابەكوۆتىڭ سوزىنە سۇيەنسەك، جالپى مۇندا 340 توسەك-ورىن بار. اۋرۋحانا كومپيۋتەرلىك توموگرافيا، رەنتگەن، جەكە مەديسينالىق گاز ستانساسىمەن جابدىقتالىپتى. ونداعى پالاتالار 2-3 ناۋقاسقا ارنالعان جانە ورتالىقتاندىرىلعان وتتەگىمەن، تازا اۋىز سۋمەن قامتىلعان. ناۋقاستار 150 بىلىكتى ماماننىڭ قىزمەتىن الۋدا.
اۋرۋحانانىڭ قۇرىلىمى كوپتەگەن زاماناۋي بولىمشەلەر مەن قىزمەتتەردى قامتيدى. مۇندا 12 كلينيكالىق بولىمشە، پاراكلينيكالىق بولىمشەلەر، كلينيكالىق، باكتەريولوگيالىق جانە سەرولوگيالىق زەرتحانالار، سونداي-اق ەندوسكوپيا، ۋلترادىبىستىق زەرتتەۋ، رەنتگەن جانە كومپيۋتەرلىك توموگرافيا كابينەتتەرى جۇمىس ىستەيدى. سونىمەن قاتار ۋرولوگيا، وتورينولارينگولوگيا، پۋلمونولوگيا، گينەكولوگيا، جاق-بەت حيرۋرگياسى سياقتى قوسىمشا بولىمشەلەر دە قىزمەت كورسەتەدى.
تۇركىستان وبلىسىنداعى جەدەل مەديسينالىق جاردەم قىزمەتى ماڭىزدى ءرول اتقاراتىنىن دا ايتا كەتۋىمىز كەرەك. وبلىس بويىنشا 140 جەدەل-جاردەم بريگاداسى جۇمىس ىستەيدى. قالا مەن اۋدان اۋماعىندا جالپى 22 بەكەت، 1 وپەراتيۆتى جانە 1 مەديسينالىق اۆياسيا ءبولىمى بار. بۇل بولىمدەردە 36 دارىگەر مەن 104 فەلدشەر قىزمەت اتقارادى. ءبىز جوعارىدا ءسوز ەتكەن سيفرلاندىرۋدىڭ ارقاسىندا قول جەتكىزىلگەن يگىلىكتەردىڭ وسى مەكەمەگە دە قاتىسى بار. بۇل تۋرالى اقپاراتتى بىزگە وبلىستىق جەدەل مەديسينالىق جاردەم ستانساسى باسشىسىنىڭ ورىنباسارى اقايشا امانجولوۆا ايتىپ بەىردى.
قازىرگى تاڭدا بۇل جەدەل مەديسينالىق جاردەم ستانسياسىندا 177 سانيتارلىق اۆتوكولىك بار. اتالعان كولىكتەر جەدەل مەديسينالىق كومەك كورسەتۋ ءۇشىن قاجەتتى بارلىق قۇرالدارمەن جابدىقتالعان. ونىڭ ىشىندە دەفيبريللياتور، كارديوستيمۋلياتور، كارديوۆەرسيا، كارديومونيتور، ەلەكتروكارديوگراف، جاساندى تىنىس الۋ اپپاراتى، وتتەگى جۇيەسى، ەلەكترلىك جانە مەحانيكالىق سورعىش اپپاراتتارى بار. بۇل جابدىقتار قىزمەتكەرلەرگە ناۋقاستارعا جوعارى دەڭگەيدە كومەك كورسەتۋگە مۇمكىندىك بەرەدى.
دەنساۋلىق ساقتاۋ سالاسىندا سيفرلىق تەحنولوگيالاردى ەنگىزۋ بۇگىنگى كۇننىڭ ەڭ ماڭىزدى باعىتتارىنىڭ ءبىرى بولىپ وتىرعانىن ايتتىق. ونىڭ ىشىندە زاماناۋي سيفرلىق قۇرالدار دارىگەرلەردىڭ جۇمىسىن جەڭىلدەتىپ، مەديسينالىق كومەك كورسەتۋ ۇدەرىسىن ءتيىمدى ەتەتىنى ەڭ ماڭىزدى ماسەلە. سونىمەن قاتار بۇل تەحنولوگيالار جەرگىلىكتى ەمدەۋ مەكەمەلەرىنىڭ ءوزارا بايلانىسىن نىعايتىپ، مەديسينالىق ورتالىقتارمەن بىرلەسە وتىرىپ، حالىققا كورسەتىلەتىن قىزمەت ساپاسىن ارتتىرۋدا دا ارتىقشىلىقا يە. توق ەتەرىن ايتقاندا، تۇركىستان وبلىسىندا سيفرلاندىرۋ ناتيجەسىندە حالىقتىڭ دەنساۋلىعىن قورعاۋعا باعىتتالعان شارالار ءتيىمدى جۇزەگە اسىرىلۋدا. سونىڭ ارقاسىندا تۇركىستاندىقتاردىڭ دەنساۋلىعىن جاقسارتۋعا زور ۇلەس قوسىلىپ، ءوڭىردىڭ مەديسينالىق سالاداعى بولاشاعى باياندى باعىتقا بەت بۇرىپ كەلەدى.
