وقۋ-اعارتۋ ءمينيسترى عاني بەيسەمبايەۆ مەكتەپ باسشىلىعىنا جاڭاجىلدىق شىرشا مەن سەنبىلىك وتكىزۋ ءۇشىن اتا-انالاردان اقشا جيناۋعا تىيىم سالىنعانىن مالىمدەدى، دەپ حابارلايدى Dalanews.kz.
ب ا ق وكىلدەرى مينيسترگە مەكتەپتەردە وتكىزىلەتىن جاڭاجىلدىق ءىس-شارالار، سەنبىلىك جانە شىرشاعا اقشا جيناۋ ماسەلەسىنە قاتىستى سۇراق قويدى. ءمينيستردىڭ ايتۋىنشا، اقشا جيناۋعا قاتىستى مينيسترلىك بۇيرىق شىعارىپ، تىيىم سالعان.
“مەكتەپتە ەشقانداي اقشا جينالماۋى كەرەك. بۇل ەرەجە مەكتەپ ءبىتىرۋ كەشىنە دە، جاڭاجىلدىق شىرشاعا دا قاتىستى. بارلىق شارانى اقشا جيناماي-اق وتكىزۋگە بولادى. قازىرگى ۋاقىتتا ءىس-شارالار ‘ءبىرتۇتاس تاربيە’ باعدارلاماسى اياسىندا جوسپارلانىپ وتىر،” – دەدى بەيسەمبايەۆ ۇكىمەتتە وتكەن بريفينگتە.
مينيستر سەنبىلىك پەن شىرشانى قوسىمشا شىعىنسىز وتكىزۋگە بولاتىندىعىن اتاپ ءوتتى. سونىمەن قاتار ول مۇعالىمدەرگە تەك رۇقسات ەتىلگەن مولشەردە گۇل سىيلاۋعا بولاتىنىن ايتتى.
“مۇعالىمدەر ەشقانداي سىيلىق كۇتپەيدى. ءبىز بالالاردى وقىتىپ، تاربيەلەگەنىمىز ءۇشىن ماتەريالدىق ىنتالاندىرۋدى قاجەتسىنبەيمىز. ەگەر ءبىلىم بەرۋ مەكەمەلەرىندە مۇنداي جاعداي ورىن السا، ءبىز ءتيىستى شارالار قابىلدايمىز،” – دەدى مينيستر.
