تۇركىستان قالاسىندا ورتا ازيادا تەڭدەسى جوق بىرەگەي سپورت نىسانى – حالىقارالىق ستاندارتتارعا ساي سالىنعان «ەسكەك ەسۋ» ارناسى جاقىندا پايدالانۋعا بەرىلەدى،- دەپ حابارلايدى Dalanews.kz.

جالپى اۋماعى 100 گەكتاردى قۇرايتىن ارنانىڭ ۇزىندىعى – 2222 مەتر، ەنى – 260 مەتر، تەرەڭدىگى – 4 مەتر. سۋ ايدىنىنا جالپى كولەمى 2 ميلليون م³ سۋ كەنساي-كوكساي-2 سۋ قويماسىنان، شاعا كولىنەن جانە تۇركىستان ماگيسترالدى كانالىنان جەتكىزىلەدى.

نىساندا 2،4 شاقىرىمدىق سۋ جەتكىزۋ ارناسى، 1،8 شاقىرىمدىق سۋ شىعارۋ ارناسى، 3 تەحنولوگيالىق كوپىر، سونداي-اق 940 مەترلىك جاعاجاي، 100 ورىندىق تريبۋنا، ءقوناقۇي، جاتتىعۋ بازاسى، اكىمشىلىك عيمارات پەن دەمالىس ورىندارى قاراستىرىلعان.

جاڭا كەشەن ICF (حالىقارالىق بايداركا جانە كانوە فەدەراسياسى) مەن FISA (حالىقارالىق اكادەميالىق ەسۋ فەدەراسياسى) ستاندارتتارىنا تولىق ساي. بۇل نىسان:

• اكادەميالىق ەسكەك ەسۋ، بايداركا جانە كانوە سپورت تۇرلەرىنەن حالىقارالىق دەڭگەيدەگى جارىستار وتكىزۋگە مۇمكىندىك بەرەدى؛

• سپورتشىلاردىڭ تۇراقتى جاتتىعۋىنا جاعداي جاسايدى؛

• دەمالىس، سەرۋەن جانە كوپشىلىك شارالار ۇيىمداستىرۋعا قولدانىلادى.

سونىمەن قاتار، ارنانىڭ سۋى تۇركىستاننىڭ اكىمشىلىك-ىسكەرلىك ورتالىعى مەن ارنا اۋماعىنداعى يرريگاسيالىق جۇيەگە، سونداي-اق قالانىڭ جاسىل بەلدەۋىن سۋارۋعا پايدالانىلماق.

مامانداردىڭ ايتۋىنشا، بۇل جوبا تۇركىستاندى سپورتتىق، ەكولوگيالىق جانە تۋريستىك تۇرعىدان دامىتۋعا زور سەرپىن بەرىپ، قازاقستاندا اكادەميالىق ەسكەك ەسۋ سپورتىنىڭ دامۋىنا ىقپال ەتپەك.