تۇركىستان قالاسىندا «تۇركىستان – ۇلى جىبەك جولىنداعى حالىقارالىق ىنتاماقتاستىق ورتالىعى» تاقىرىبىندا جەرگىلىكتى ءوزىن-وزى باسقارۋ ورگاندارىنىڭ ەكىنشى ىنتىماقتاستىق فورۋمى وتۋدە. العاشقى «ورتالىق ازيا – كورەيا» فورۋمى بىلتىر كورەيا رەسپۋبليكاسىندا وتكەن بولاتىن. بۇگىنگى كەزدەسۋ وسى ماڭىزدى ميسسيانىڭ جالعاسى رەتىندە تاجىريبە الماسۋعا جانە ناقتى شەشىمدەر قابىلداۋعا مۇمكىندىك بەرەتىن الاڭعا اينالدى، دەپ حابارلايدى Dalanews.kz.
ورتالىق ازيا – كورەيا حالىقارالىق فورۋمىنا كورەيا جانە ورتا ازيا ەلدەرىنىڭ، سونداي-اق ەلىمىزدىڭ وزگە وڭىرلەرىنىڭ دەلەگاسياسى قاتىستى. دەلەگاسيا قۇرامىندا كورەيا رەسپۋبليكاسىنىڭ قازاقستانداعى ەلشىسى چجو تە يك، «GAROK» قاۋىمداستىعىنىڭ باس حاتشىسى يۋ مين بون، قىرعىزستان رەسپۋبليكاسى مينيسترلەر كابينەتى جانىنداعى مەملەكەتتىك قىزمەت جانە جەرگىلىكتى ءوزىن-وزى باسقارۋ ىستەرى جونىندەگى مەملەكەتتىك اگەنتتىكتىڭ جەرگىلىكتى ءوزىن-وزى باسقارۋدى دامىتۋ باسقارماسىنىڭ باسشىسى دجەەنبايەۆ باكتىياربەك، «Woosong University Kazakhstan» ۋنيۆەرسيتەتىنىڭ ديرەكتورى چون ونگ حۆا بار.
الدىمەن، حالىقارالىق فورۋمدا تۇركىستان وبلىسىنىڭ ينۆەستيسيالىق مۇمكىندىكتەرىنىڭ تانىستىرىلىمى كورسەتىلدى.
فورۋمدا تۇركىستان وبلىسىنىڭ اكىمى نۇرالحان كوشەروۆ ءالعىسوز الىپ، تۇركىستان وبلىسى ستراتەگيالىق ارىپتەستىكتى نىعايتۋعا، ءوڭىرارالىق بايلانىستى كەڭەيتۋگە جانە بىرلەسكەن باستامالاردى ىسكە اسىرۋعا دايىن ەكەنىن جەتكىزدى.
– قازاقستان – كورەيا اراسىندا ستراتەگيالىق سەرىكتەستىك نىعايىپ كەلەدى. قازىرگى ۋاقىتتا قازاقستاندا ەكونوميكانى ءارتاراپتاندىرۋ، ينستيتۋسيونالدىق الەۋەتتى نىعايتۋ جانە شەتەلدىك ينۆەستورلار ءۇشىن بارىنشا قولايلى ورتا قالىپتاستىرۋعا باعىتتالعان اۋقىمدى رەفورمالار جۇزەگە اسىرىلۋدا. وسى وزگەرىستەر اياسىندا تۇركىستان وبلىسى كورەيا ەلىمەن حالىقارالىق ارىپتەستىكتى دامىتۋعا جانە ورتالىق ازياداعى سەنىمدى ساۋدا-ەكونوميكالىق سەرىكتەس رەتىندەگى ۇستانىمىن كۇشەيتۋگە ەرەكشە نازار اۋدارىپ وتىر. قازاقستان مەن كورەيا اراسىنداعى ىنتىماقتاستىقتىڭ ماڭىزدى ناتيجەلەرىنىڭ ءبىرى – تۇركىستان وبلىسىندا قۋاتتىلىعى 926 مۆت بولاتىن بۋ-گاز ەلەكتر ستانسياسى قۇرىلىسىنىڭ باستالۋى بولدى. اتالعان جوبا «Samruk-Kazyna» قورى مەن وڭتۇستىك كورەيانىڭ «Doosan Enerbility» كومپانياسىمەن بىرلەسىپ جۇزەگە اسىرىلۋدا. بۇل قازاقستاننىڭ ەنەرگەتيكا سالاسىنداعى ءىرى ينۆەستيسيالاردىڭ ءبىرى. ءوزىنىڭ ستراتەگيالىق گەوگرافيالىق ورنالاسۋىنىڭ ارقاسىندا تۇركىستان وبلىسى ورتالىق ازياداعى ماڭىزدى كولىك-لوگيستيكالىق حاب ءرولىن اتقارادى. ءبىز وسى الەۋەتتى ينۆەستيسيا تارتۋ، ەكسپورتتىق مۇمكىندىكتەردى ارتتىرۋ جانە شەتەلدىك سەرىكتەستەرمەن، سونىڭ ىشىندە كورەيامەن ەكونوميكالىق بايلانىستى نىعايتۋ ءۇشىن ءتيىمدى پايدالانۋعا دايىنبىز. مەملەكەت باسشىلارىنىڭ ءوزارا سەنىمى مەن قولداۋىنىڭ ارقاسىندا ورتالىق ازيادا تاتۋ كورشىلىك، دوستىق پەن ءوزارا قولداۋعا نەگىزدەلگەن ەرەكشە ىنتىماقتاستىق ۇلگىسى قالىپتاستى. تۇركىستان وبلىسى كورەيا مەملەكەتىمەن ستراتەگيالىق ارىپتەستىكتى نىعايتۋعا، ءوڭىرارالىق بايلانىستى كەڭەيتۋگە جانە بىرلەسكەن باستامالاردى ىسكە اسىرۋعا دايىن، – دەگەن نۇرالحان ورالباي ۇلى جاڭا جوبالاردى جۇزەگە اسىرۋعا جان-جاقتى قولداۋ كورسەتىلەتىنىن ايتىپ، ۇزاقمەرزىمدى ىنتىماقتاستىققا سەنىم ءبىلدىردى.
سونىمەن قاتار باسقوسۋدا كورەيا رەسپۋبليكاسىنىڭ قازاقستانداعى ەلشىسى چجو تە يك، «GAROK» قاۋىمداستىعىنىڭ باس حاتشىسى يۋ مين بون، قىرعىزستان رەسپۋبليكاسى مينيسترلەر كابينەتى جانىنداعى مەملەكەتتىك قىزمەت جانە جەرگىلىكتى ءوزىن-وزى باسقارۋ ىستەرى جونىندەگى مەملەكەتتىك اگەنتتىكتىڭ جەرگىلىكتى ءوزىن-وزى باسقارۋدى دامىتۋ باسقارماسىنىڭ باسشىسى دجەەنبايەۆ باكتىياربەك، «Woosong University Kazakhstan» ۋنيۆەرسيتەتىنىڭ ديرەكتورى چون ونگ حۆا ءسوز الىپ، سەرىكتەستىك ورناتۋعا دايىن ەكەندەرىن جەتكىزدى.
كوپ عاسىرلار بويى ۇلى جىبەك جولىنىڭ جۇرەگى بولعان تۇركىستان – مادەنيەتتەر مەن يدەيالار، ساۋدا جولدارىنىڭ توعىسقان مەكەنى. تۇركىستان وبلىسى حالىقارالىق بايلانىستاردى بەلسەندى تۇردە دامىتىپ كەلەدى. جۇڭگو حالىق رەسپۋبليكاسىنىڭ ءبىرقاتار ايماقتارىمەن، ورتالىق ازيا ەلدەرىمەن جانە تۇركيامەن باۋىرلاس وڭىرلىك قارىم-قاتىناستار ورناتىلعان. ىنتىماقتاستىقتىڭ جارقىن ۇلگىسى – قازاقستان مەن وزبەكستان اراسىندا بىرلەسىپ قۇرىلىپ جاتقان «ورتالىق ازيا» حالىقارالىق ساۋدا-ەكونوميكالىق ىنتىماقتاستىق ورتالىعى.
تۇركىستان وبلىسى – قازاقستانداعى جەتەكشى اگرارلىق وڭىرلەردىڭ ءبىرى. وبلىس ماقتا، كوكونىس جانە جەمىس-جيدەك ءوسىرۋ بويىنشا رەسپۋبليكادا 1 ورىندا. جىل سايىن جىلىجايلار مەن ەگىستىك القاپتارىنىڭ كولەمى ارتۋدا. سالاعا كورەيانىڭ جاساندى ينتەللەكت، روبوتوتەحنيكا جانە بيوتەحنولوگياعا نەگىزدەلگەن وزىق اگروتەحنولوگيالارىن، سونىڭ ىشىندە زاماناۋي «اقىلدى» جىلىجايلار سالۋ تاجىريبەسىن ەنگىزۋ جوسپارلانۋدا. سونىمەن قاتار وبلىستىڭ بىرەگەي تاريحي ەسكەرتكىشتەرى، باي مادەنيەتى، قوناقجايلىلىعى پەن اسەم تابيعاتى ءتۋريزمدى دامىتۋعا زور مۇمكىندىك بەرەدى.
تۇركىستان قالاسىندا IT سالاسىنىڭ ماماندارىن دايىندايتىن Woosong ۋنيۆەرسيتەتىنىڭ فيليالىن اشۋ – ءوڭىردىڭ سيفرلىق ترانسفورماسياسىنا باعىتتالعان ماڭىزدى قادام. بۇل جوبا قازاقستان مەن كورەيا اراسىنداعى ءعىلىمي-بىلىم بەرۋ ىنتىماقتاستىعىن نىعايتا تۇسپەك.
ايتا كەتەيىك، 2024 جىلدىڭ قورىتىندىسى بويىنشا كورەيا رەسپۋبليكاسى قازاقستان ەكونوميكاسىنا ينۆەستيسيا قۇيۋ كولەمى جاعىنان شەتەلدىك ءىرى ينۆەستورلار اراسىندا ءۇشىنشى ورىندا. وتكەن جىلى ەكى ەل اراسىنداعى ەكىجاقتى تاۋار اينالىمى 3،1 ملرد اقش دوللارىنا جەتتى. بۇگىنگى تاڭدا قازاقستاندا Hyundai، KIA، Samsung، LG، Doosan جانە باسقا دا 876 وڭتۇستىك كورەيالىق كومپانيا تابىستى جۇمىس ىستەپ كەلەدى.
