«ەسىمحان» اتىنداعى ورتالىق الاڭدا وتكەن شاراعا اۋىل شارۋاشىلىعى سالاسىنىڭ ارداگەرلەرى مەن ەڭبەك وزاتتارى قاتىستى. فەستيۆال اياسىندا اۋىلشارۋاشىلىعى ونىمدەرىنىڭ جارمەڭكەسى، زاماناۋي تەحنيكالار مەن اگرارلى سالاداعى جەتىستىكتەردى ايشىقتايتىن اۋىلشارۋاشىلىعى كورمەسى ۇيىمداستىرىلدى.
وسىناۋ اۋىل شارۋاشىلىعى فەستيۆالىندە تولەبي اۋدانى وبلىس بويىنشا ءسۇت وندىرۋدەن 1 ورىنعا يە بولىپ، ماراپاتتالدى.
تولەبي اۋدانىنا «ءسۇت وندىرۋدەن وزات اۋدان» جانە «ماقسارى وندىرۋدەن وزات اۋدان» نوميناسياسى بەرىلدى.
ايتا كەتەيىك، بيىل تولەبي اۋدانىندا 14 209 توننادان استام ماقسارى مەن 17 695 توننا ءسۇت وندىرىلگەن. تولەبي اۋدانىندا وندىرىلگەن ءسۇتتىڭ كولەمى — تۇركىستان وبلىسى بويىنشا 95% قۇرايدى.
مەرەكەلىك جيىندا وبلىس اكىمى جانسەيىت تۇيمەبايەۆ سالا ماماندارىن كاسىبي مەرەكەلەرىمەن قۇتتىقتاپ، ايماقتىڭ جەتىستىكتەرىنە توقتالدى. ماسەلەن، بيىل تۇركىستان وبلىسى اۋىلشارۋاشىلىق سالاسى بويىنشا زور تابىستارعا جەتىپ، رەسپۋبليكا بويىنشا 2 ورىنعا شىققان. سونىمەن قاتار، كوكونىس، باقشا داقىلدارىنان دا رەكوردتىق كورسەتكىشتەرگە قول جەتكىزگەن.
"تۇركىستان وڭىرىندە وسىرىلگەن 500 مىڭ تونناعا جۋىق ونىمدەر رەسەي مەن بەلارۋس، لاتۆيا، گەرمانيا مەملەكەتتەرىنە ەكسپورتتالعان. سونىمەن قاتار 1 ميلليون توننا باقشا ءونىمى ەلىمىزدىڭ سولتۇستىك وبلىستارىنا جىبەرىلگەن. بۇعان جەرگىلىكتى ديحاندار مەن شارۋالاردىڭ سىڭىرگەن ەڭبەگى زور. سوندىقتان فەستيۆال اياسىندا وسى سالادا بەلسەندىلىك تانىتىپ، ۇزدىك كورسەتكىشكە قول جەتكىزگەن شارۋالار ءتۇرلى ماراپاتتتارعا يە بولدى"، – دەدى ءوڭىر باسشىسى.
