تۇركىستاندا «جايلى مەكتەپ» جوباسى اياسىندا تاعى ءبىر مەكتەپ اشىلدى. 2 مىڭ وقۋشىعا ارنالعان ءبىلىم ۇياسى «جاڭا قالا» ىقشاماۋدانىندا بوي كوتەردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
مۇندا بالالاردىڭ ساپالى ءبىلىم الۋىنا بارلىق جاعداي جاسالعان.
قاسىم-جومارت توقايەۆتىڭ تاپسىرماسىمەن سالىنعان ءبىلىم ۇياسىنىڭ اشىلۋ سالتاناتىنا تۇركىستان وبلىسىنىڭ اكىمى دارحان ساتىبالدى مەن ءبىلىم سالاسىنىڭ ارداگەرلەرى قاتىستى.
– ەلىمىزدىڭ بولاشاعى – ءبىلىمدى ۇرپاقتىڭ قولىندا. مەملەكەت باسشىسىنىڭ باستاماسىمەن بۇگىنگى تاڭدا ەلىمىزدە «جايلى مەكتەپ» ۇلتتىق جوباسى قابىلدانىپ، زاماناۋي، وزىق ۇلگىدەگى ءبىلىم وشاقتارى سالىنۋدا. بۇل باستاما اپاتتى جانە ءۇش اۋىسىمدىق مەكتەپتەر ماسەلەسىن شەشىپ، وقۋشى ورىندارىنىڭ تاپشىلىعىن جويادى. سىزدەردىڭ مەكتەپتەرىڭىز جاي عانا جاڭا عيمارات ەمەس. بۇل – دامۋ مەن وقۋ ءۇشىن تاماشا جاعدايلار جاسالعان ورىن. جاڭا ءبىلىم ورداسىنىڭ اشىلۋى قۇتتى بولسىن! – دەدى دارحان ساتىبالدى.
اتالعان ءبىلىم ورداسى قالاداعى 2 مەكتەپتەگى جۇكتەمەنى ازايتۋعا مۇمكىندىك بەرەدى. تۇركىستان قالاسىنىڭ «جاڭا قالا» اۋماعىندا سالىنعان 4 قاباتتى ءبىلىم ورداسىنداعى فيزيكا، حيميا، بيولوگيا جانە روبوتوتەحنيكا كابينەتتەرى زاماناۋي قۇرالدارمەن جابدىقتالعان. ءبىلىم الۋشىلاردىڭ جان-جاقتى دامۋى ءۇشىن مەكتەپتە سپورت زالدارى، شەبەرلىك زالدارى، زەرتحانالار مەن دەمالىس ايماقتارى ۇيىمداستىرىلعان.
جوعارى جىلدامدىقتاعى ينتەرنەتكە قوسىلعان. باستاۋىش پەن جوعارى سىنىپ وقۋشىلارى جەكەلەگەن بلوكتاردا وقيدى. بالالاردىڭ جاس ەرەكشەلىگىنە وراي بلوكتاردىڭ ءارقايسىسى وقۋ سىنىپتارىمەن، سانيتارلىق توراپتارمەن، سپورت زالدارىمەن جانە جەكە شكافتارمەن قامتىلعان.
ايتا كەتەيىك، ەلىمىزدە «جايلى مەكتەپتەردىڭ» باسىم بولىگى تۇركىستان وبلىسىندا سالىنۋدا. ءقازىر وڭىردە 29 مەكتەپتىڭ قۇرىلىسى جۇرگىزىلىپ جاتىر. ونىڭ ۇشەۋى اشىلىپ ۇلگەردى.
