تۇركىستان قالاسىنداعى «دوستىق ءۇيى» عيماراتى جانىنداعى اللەيادا 1 مامىر – قازاقستان حالقىنىڭ بىرلىگى كۇنى مەرەكەسىنە وراي «تۇراقتىلىق – تاتۋلىق تۇعىرى» اتتى ءىس-شارا ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
دوستىق پەن تاتۋلىقتى پاش ەتكەن مەرەكەلىك شاراعا وڭىردەگى ەتنومادەني بىرلەستىكتەردىڭ، ەڭبەك جانە شىعارماشىلىق ۇجىمدارىنىڭ وكىلدەرى، سونداي-اق وبلىس تۇرعىندارى مەن قوناقتارى قاتىستى. جيىنعا قاتىسۋشىلار الدىمەن ءىس-شارا اياسىندا ەتنوس وكىلدەرى ۇيىمداستىرعان قولونەر كورمەسىن تاماشالادى.
سالتاناتتى جيىندا جينالعان جۇرتشىلىقتى تۇركىستان وبلىسىنىڭ اكىمى نۇرالحان كوشەروۆ قۇتتىقتاپ، ىزگى تىلەگىن ءبىلدىردى.
– ءبارىڭىزدى قازاقستان حالقىنىڭ بىرلىگى كۇنىمەن قۇتتىقتايمىن. ءبىز، بيىل قازاقستان حالقى اسسامبلەياسىنىڭ 30 جىلدىق مەرەيتويىن اتاپ وتۋدەمىز. وسى جىلدار ىشىندە اسسامبلەيا حالقىمىزدىڭ بىرلىگىن نىعايتۋعا ەلەۋلى ۇلەس قوستى. ەلىمىزدەگى تاۋەلسىزدىك پەن تەڭدىكتىڭ، تۇراقتىلىق پەن تاتۋلىقتىڭ سيمۆولىنا اينالدى.
تاياۋدا استانادا قازاقستان حالقى اسسامبلەياسىنىڭ ءحححىV (34ء-شى) سەسسياسى ءوتتى. ماڭىزدى جيىندا مەملەكەت باسشىسى قاسىم-جومارت كەمەل ۇلى اسسامبلەيانىڭ قوعامدى بىرىكتىرەتىن ۇيىمعا اينالعانىن اتاپ ءوتتى. تۇركىستان وبلىسىندا قازىرگى تاڭدا 2 ملن 150 مىڭنان اسا ادام تۇرادى. وڭىردە قازاق حالقىمەن بىرگە 50-دەن اسا ەتنوستىڭ وكىلدەرى ءتاتۋ-تاتتى ءومىر سۇرۋدە. مەملەكەتتىك ءتىلدى ۇلىقتاۋ، ورتاق تاريح پەن تاعدىردى قۇرمەتتەۋ – بارشامىزعا ورتاق مىندەت. وسى ورايدا، بارلىق ازاماتتى ەل بولاشاعى ءۇشىن بىرىگىپ ارەكەت ەتۋگە شاقىرامىن. شۋاقتى مەرەكەدە سىزدەرگە زور دەنساۋلىق، وتباسىلارىڭىزعا باقىت پەن ىنتىماق تىلەيمىن! – دەدى نۇرالحان كوشەروۆ.
مەرەكەلىك ءىس-شارادا قحا-نىڭ 30 جىلدىعىنا وراي تۇركىستاندا وتكەن «بىرلىك» مارافونىنىڭ جەڭىمپازدارى مەن وڭىردەگى ەتنوسارالىق تاتۋلىقتى، قوعامدىق كەلىسىمدى نىعايتۋعا ۇلەس قوسىپ جۇرگەن ءبىرقاتار ازاماتتار ماراپاتتالدى.
بىرلىككە ۇندەگەن مەرەكەدە «جاڭا لەپ» ۇجىمى، «القوڭىر» فولكلورلىق ءانسامبلى، سونداي-اق «سامعاۋ» جانە «فاراب» بي انسامبلدەرى، «سارىن» توبى ونەرپازدارىنىڭ ارنايى ازىرلەگەن ونەرلەرى تارتۋ ەتىلدى. جەرگىلىكتى ونەرپازدار مەن ەتنومادەني بىرلەستىكتەر وكىلدەرى «قازاقتاي ەل قايدا»، «دومبىرا»، «قازاق باتىرلارى» ت.ب. پاتريوتتىق اندەرىن شىرقاپ، بي بيلەپ، مەرەكەنىڭ اجارىن اشا ءتۇستى. سونداي-اق شارا بارىسىندا وبلىستىق تاتار-باشقۇرت ەتنومادەني بىرلەستىگىنىڭ ءتوراعاسى فاريت ايۋپوۆ جانە «اسسامبلەيا جاستارى» ءرقب-ى تۇركىستان وبلىستىق وكىلدىگىنىڭ مۇشەسى ينتيزورا نۋسراتۋللايەۆا ءسوز سويلەپ، ەلىمىزدەگى بىرلىك پەن بەيبىتشىلىكتىڭ ءمان-ماڭىزىنا توقتالدى.
شارا سوڭىندا قاتىسۋشىلار «تۇركىستان» ءانىن حورمەن ورىنداپ، حالقىمىز ءتاتۋ-تاتتى بىرلىكتە بولسىن دەگەن يگى تىلەكپەن تارقاستى.
