Túrkistan qalasyndaǵy «Dostyq úii» ǵimaraty janyndaǵy alleiada 1 mamyr – Qazaqstan halqynyń birligi kúni merekesine orai «Turaqtylyq – tatýlyq tuǵyry» atty is-shara ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Dostyq pen tatýlyqty pash etken merekelik sharaǵa óńirdegi etnomádeni birlestikterdiń, eńbek jáne shyǵarmashylyq ujymdarynyń ókilderi, sondai-aq oblys turǵyndary men qonaqtary qatysty. Jiynǵa qatysýshylar aldymen is-shara aiasynda etnos ókilderi uiymdastyrǵan qolóner kórmesin tamashalady.
Saltanatty jiynda jinalǵan jurtshylyqty Túrkistan oblysynyń ákimi Nuralhan Kósherov quttyqtap, izgi tilegin bildirdi.
– Bárińizdi Qazaqstan halqynyń birligi kúnimen quttyqtaimyn. Biz, biyl Qazaqstan halqy Assambleiasynyń 30 jyldyq mereitoiyn atap ótýdemiz. Osy jyldar ishinde Assambleia halqymyzdyń birligin nyǵaitýǵa eleýli úles qosty. Elimizdegi táýelsizdik pen teńdiktiń, turaqtylyq pen tatýlyqtyń simvolyna ainaldy.
Taiaýda Astanada Qazaqstan halqy Assambleiasynyń HHHIV (34-shi) sessiiasy ótti. Mańyzdy jiynda Memleket Basshysy Qasym-Jomart Kemeluly Assambleianyń qoǵamdy biriktiretin uiymǵa ainalǵanyn atap ótti. Túrkistan oblysynda qazirgi tańda 2 mln 150 myńnan asa adam turady. Óńirde qazaq halqymen birge 50-den asa etnostyń ókilderi tatý-tátti ómir súrýde. Memlekettik tildi ulyqtaý, ortaq tarih pen taǵdyrdy qurmetteý – barshamyzǵa ortaq mindet. Osy oraida, barlyq azamatty el bolashaǵy úshin birigip áreket etýge shaqyramyn. Shýaqty merekede Sizderge zor densaýlyq, otbasylaryńyzǵa baqyt pen yntymaq tileimin! – dedi Nuralhan Kósherov.
Merekelik is-sharada QHA-nyń 30 jyldyǵyna orai Túrkistanda ótken «Birlik» marafonynyń jeńimpazdary men óńirdegi etnosaralyq tatýlyqty, qoǵamdyq kelisimdi nyǵaitýǵa úles qosyp júrgen birqatar azamattar marapattaldy.
Birlikke úndegen merekede «Jańa lep» ujymy, «Alqońyr» folklorlyq ansambli, sondai-aq «Samǵaý» jáne «Farab» bi ansamblderi, «Saryn» toby ónerpazdarynyń arnaiy ázirlegen ónerleri tartý etildi. Jergilikti ónerpazdar men etnomádeni birlestikter ókilderi «Qazaqtai el qaida», «Dombyra», «Qazaq batyrlary» t.b. patriottyq ánderin shyrqap, bi bilep, merekeniń ajaryn asha tústi. Sondai-aq shara barysynda oblystyq tatar-bashqurt etnomádeni birlestiginiń tóraǵasy Farit Aiýpov jáne «Assambleia jastary» RQB-i Túrkistan oblystyq ókildiginiń múshesi Intizora Nýsratýllaeva sóz sóilep, elimizdegi birlik pen beibitshiliktiń mán-mańyzyna toqtaldy.
Shara sońynda qatysýshylar «Túrkistan» ánin hormen oryndap, halqymyz tatý-tátti birlikte bolsyn degen igi tilekpen tarqasty.
