تۇركىستاندا بەينەباقىلاۋ كامەرالارىن ادەيى بۇلدىرگەن ەكى كۇدىكتى ۇستالدى، دەپ حابارلايدى Dalanews.kz.
قىلمىس بەينەباقىلاۋ جۇيەلەرىنىڭ كومەگىمەن اشىلعان. وقيعا قالا كوشەلەرىنىڭ بىرىندە تىركەلگەن. بەلگىسىز ەكى ادام 4 كامەرانى قاساقانا سىندىرعان. سالدارىنان 700 مىڭ تەڭگەدەن اسا ماتەريالدىق شىعىن كەلگەن.
تەرگەۋ بارىسىندا وقيعا تۇنگى ساعات 01:00 شاماسىندا بولعانى انىقتالدى. بەتتەرىن ماسكامەن جاسىرعان ەكى جىگىت ۇزىن اعاشپەن كامەرالاردى ىستەن شىعارعان. پوليسەيلەر قىلمىستى اشۋ كەزىندە جاقىن ماڭداعى بەينەباقىلاۋ جۇيەلەرىنىڭ جازبالارىن مۇقيات زەردەلەگەن.
ناتيجەسىندە كۇدىكتىلەردىڭ قوزعالىس باعىتى انىقتالىپ، جەدەل ىزدەستىرۋ شارالارى ارقىلى قولعا ءتۇستى.
"بۇل وقيعاعا قاتىستى بوتەننىڭ مۇلكىن قاساقانا جويۋ نەمەسە ءبۇلدىرۋ دەرەگى بويىنشا قىلمىستىق ءىس قوزعالىپ، سوتقا دەيىنگى تەرگەۋ جۇرگىزىلىپ جاتىر. الدىن الا مالىمەتكە سايكەس كۇدىكتىلەر جول ەرەجەسىن بۇزعانى ءۇشىن سالىنعان ايىپپۇلعا اشۋلانىپ، وسى ارەكەتكە بارعانىن مويىنداعان"، - دەدى ءىىم وكىلى.
