«اتامەكەن» ق ر ۇكپ ءتورالقا ءتوراعاسى تيمۋر قۇلىبايەۆتىڭ قاتىسۋىمەن تۇركىستان وبلىسى كاسىپكەرلەر پالاتاسى وڭىرلىك كەڭەسىنىڭ وتىرىسىندا بيزنەسمەندەر كاسىپكەرلىكتىڭ ەڭ وزەكتى ماسەلەرىن كوتەردى.
"اعىمداعى جىلدىڭ مامىر ايىندا وڭىرلىك كاسىپكەرلەرمەن وتكەن العاشقى كەزدەسۋدىڭ قورىتىندىسى بويىنشا سۇراقتار پاكەتى پرەمەر-مينيستر دەڭگەيىندە كوتەرىلدى. ناتيجەسىندە 84 جۇيەلىك ماسەلەنىڭ 41ء-ى شەشىلدى، قالعاندارى مەملەكەتتىك ورگاندارمەن، ۇلتتىق كومپانيالارمەن جانە جاو-مەن بىرلەسىپ شەشۋ ساتىسىندا. بيزنەسپەن ونلاين-كەزدەسۋلەردى تۇراقتى تۇردە وتكىزىپ وتىراتىن بولامىز"، - دەپ اتاپ ءوتتى "اتامەكەن" ق ر ۇكپ ءتورالقا ءتوراعاسى.
ونلاين كەزدەسۋدە بىرنەشە اۋقىمدى ماسەلەلەر ايتىلدى. ونلاين بايلانىس ارقىلى وتكىزىلگەن جيىنعا ءتورالقا ءتوراعاسىنا ءوڭىرىمىزدىڭ ەكونوميكالىق جاعدايى تۋرالى وڭىرلىك كەڭەس ءتوراعاسى قاينار اباسوۆ باياندادى.
كەزدەسۋدە "قازاق ماقتا قاۋىمداستىعى" زتب ءتوراعاسى پولات يۋسۋپوۆ ەكىنشى دەڭگەيلى بانكتەردەگى قاراجاتقا قول جەتكىزۋ ماسەلەسىن قوزعادى.
ونىڭ ايتۋىنشا، ق ر ۇلتتىق بانكى زاڭدى تۇلعالار ءۇشىن قولما-قول اقشانى پايدالانۋعا بەلگىلەنگەن 120 ملن تەڭگە مولشەرىندەگى ءليميتى - ءشيتتى ماقتانى دايىنداۋ كەزەڭىندە شارۋالارعا مۇلدە جەتكىلىكسىز ەكەنىن ايتتى. وڭىرلىك كەڭەستىڭ مۇشەسى، «بايكەنجە» شارۋا قوجالىعىنىڭ ءتوراعاسى نۇرلان بايكەنجەيەۆ جىلىجايلاردا قولدانىلاتىن ەنەرگياعا ءتاريفتىڭ قىمباتتىعىن جەتكىزدى. شىعىنداردى ازايتۋ ءۇشىن جىلىجايلاردى مەملەكەتتىك قولداۋدىڭ شۇعىل قاجەتتىلىگى، سونىمەن قاتار ونىمدىلىكتى ارتتىرۋ ءۇشىن يننوۆاسيالىق تەحنولوگيالاردى ەنگىزۋ قاجەتتىلىگىن باياندادى.
سونداي-اق، وزبەكستاننان شىققان تاۋارلاردىڭ دەمپينگتىك جانە رەسمي ەمەس اينالىمى ماسەلەسىن «التىن ادام تىگىن فابريكاسى» ءجشس-نىڭ باسشىسى بالجان حالمۋراتوۆا كوتەردى. ول ەكى ەلدىڭ نارىقتارىندا تەڭ باسەكەلەستىكتى جۇرگىزۋ ءۇشىن ءونىمدى كەدەندىك راسىمدەۋ كەزىندە وزبەكستان تاۋارلارىنا ءوزارا كەلىسىم ورناتۋ قاجەتتىگىن اتاپ ءوتتى. بۇل شارا وتاندىق تاۋار وندىرۋشىلەرگە ايتارلىقتاي قولداۋ كورسەتپەك. سونىمەن قاتار، "قۋانىش" ج ش س باسشىسى ينارا نامازبايەۆا قارجىلاندىرۋعا قولجەتىمدىلىك ماسەلەسىن كوتەردى. تۇركىستان قالاسىندا ەكىنشى دەڭگەيلى بانكتەردىڭ تولىق فورماتتى فيليالدارىنىڭ نەمەسە وكىلدىكتەرىنىڭ بولماۋىنا بايلانىستى قارجىلاندىرۋعا قولجەتىمدىلىك ەداۋىر قيىن ەكەندىگىن باياندادى.
كەزدەسۋ قورىتىندىسى بويىنشا كاسىپكەرلەر تاراپىنان ايتىلعان ماسەلەلەر ءتورالقا ءتوراعاسى مەن باسقارما ءتوراعاسىنىڭ باقىلاۋىندا بولادى.
