– بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن! ءبىز، مەملەكەت باسشىسى قاسىم-جومارت كەمەل ۇلى توقايەۆتىڭ ۇلىتاۋدا وتكەن قۇرىلتايداعى شەشىمىنەن كەيىن ەكىنشى جىلى رەسپۋبليكا كۇنى ۇلتتىق مەرەكەسىن جاڭا مازمۇندا اتاپ وتۋدەمىز. 1990-شى جىلى 25 قازاندا قازاقستاننىڭ مەملەكەتتىك ەگەمەندىگى تۋرالى دەكلاراسيا قابىلداندى.
ەگەمەندىك دەكلاراسياسى – قاستەرلى تاۋەلسىزدىگىمىزدىڭ نەگىزى. بۇل كۇن –ەلدىگىمىزدى نىعايتىپ، ىنتىماعىمىزدى ارتتىراتىن ايشىقتى مەرەكە.
بۇل – وتكەن عاسىردا ازاتتىق جولىندا شەيىت بولعان الاش ارىستارىنىڭ جانكەشتى ەڭبەگىنىڭ جەمىسى. تاۋەلسىزدىك وڭايلىقپەن كەلگەن جوق. سوندىقتان ازاتتىقتىڭ، وسى بەيبىت كۇننىڭ ءقادىرىن ءبىلۋ اسا ماڭىزدى.
مەملەكەت باسشىسىنىڭ ادىلەتتى قازاقستاندى قۇرۋ باستاماسىمەن ەلىمىزدە تىڭ باستامالار قولعا الىنىپ، ەكونوميكالىق، ساياسي رەفورمالار جۇزەگە اسۋدا. تۇركىستان وبلىسى قۇرىلدى، تۇركىستان ورتالىق رەتىندە قالىپتاستى. بەس جىلدا وڭىردە اۋقىمدى جۇمىس اتقارىلدى. اۋىلداردىڭ ينفراقۇرىلىمىن جاقسارتۋ، گاز، تۇرعىن ءۇي، ءبىلىم سالالارىنداعى وزەكتى ماسەلەلەرى بار قۇرىلىس نىساندارىن اياقتاۋ باعىتىندا ناقتى شەشىمدەر قابىلدانىپ، جۇمىستار اتقارىلدى. ءوڭىردىڭ ەكونوميكالىق، ينۆەستيسيالىق جانە تۋريستىك الەۋەتى ارتا ءتۇستى.
ءبىز بىرلىگىمىزدى ساقتاپ، ۇلت مۇددەسى جولىندا ەڭبەك ەتۋىمىز كەرەك. ۇلتتىق مەرەكەمىز – بىرلىگىمىزدىڭ نەگىزگى تەمىرقازىعى! وتباسىلارىڭىزعا اماندىق، باق-بەرەكە تىلەيمىن. تاۋەلسىزدىگىمىز تۇعىرلى بولسىن! – دەگەن دارحان ساتىبالدى مەملەكەتتى، ءوڭىردى دامىتۋعا ۇلەس قوسقان ءبىر توپ ازاماتقا مەملەكەتتىك ماراپاتتاردى تاپسىردى.
قوعامنىڭ ءتۇرلى سالاسىندا ەڭبەگىمەن دارالانعان ازاماتتارعا «پاراسات»، «قۇرمەت»، ءىىى دارەجەلى «ەڭبەك داڭقى» وردەندەرى، سونىمەن قاتار «ەرەن ەڭبەگى ءۇشىن»، «ەرلىگى ءۇشىن»، «شاپاعات» مەدالدارى مەن قۇرمەت گراموتالارى تابىستالدى. ەڭبەك ادامدارىنا قۇرمەت كورسەتىلدى.
مەرەكەلىك كەش ماعىنالى ءارى مازمۇندى كونسەرتتىك باعدارلاماعا ۇلاستى. شارادا ەلىمىزگە تانىمال ونەر جۇلدىزدارى مەن «كونگرەسس حولل» مەكەمەسىنە جاڭادان قابىلدانعان ونەرپازداردىڭ «Jana Lep!» دەپ ات بەرىلگەن جاستار تولقىنى ونەر كورسەتتى. تەاترلاندرىلعان قويىلىمدار ۇسىنىلىپ، قازاقتىڭ تاريحىنان سىر شەرتىلدى. قازاقتىڭ ۇلتتىق اسپاپتارىنان كۇي كۇمبىرلەپ، وتانشىلدىق باعىتىنداعى اندەر شىرقالدى.
تۇركىستان جۇرتشىلىعى رەسپۋبليكا كۇنىن تولايىم تابىستارمەن قارسى الدى. بەس جىلدا جالپى وڭىرلىك ءونىم كولەمى 2 ەسەگە ارتتى. بيىلعى جارتى جىلدىڭ قورىتىندىسىمەن جالپى وڭىرلىك ءونىم كولەمى 1،5 ترلن تەڭگەنى قۇرادى. اۋىل شارۋاشىلىعىندا 803 ملرد تەڭگەنىڭ ءونىمى ءوندىرىلىپ، ءوسىم 2 پايىزدى قۇرادى.
ەت ەكسپورتى بويىنشا وبلىسى كوش باسىندا تۇر. قارقىندى باۋ 5 مىڭ گەكتارعا ەندىرىلىپ، جىلىجايلار 1640 گەكتارعا جەتتى. مەملەكەت باسشىسىنىڭ تاپسىرماسىمەن «اۋىل اماناتى» جوباسى ىسكە اسىرىلۋدا. بۇگىنگى تاڭدا 12 ملرد تەڭگەگە 2 070 جوبا قارجىلاندىرىلدى.
بيىل ونەركاسىپ كولەمى 681 ملرد تەڭگەنى قۇرادى (4،7 پايىزعا ارتتى). جىل باسىنان 669 مىڭ شارشى مەتر تۇرعىن ءۇي پايدالانۋعا بەرىلىپ، 7%-عا ارتتى. ءبىلىم بەرۋ سالاسىندا مەكتەپ تاپشىلىعىن شەشۋ جانە 5 اپاتتى، 6 ءۇش اۋىسىمدى مەكتەپتەر سانىن قىسقارتۋ ماقساتىندا 2023-2025 جىلدار ارالىعىندا 96 نىسان سالىنادى. قۇرىلىسى كەشىككەن 17 مەكتەپتىڭ قارجىلاندىرۋ ماسەلەسى شەشىلىپ، جۇمىستار باستالدى.
جىل قورىتىندىسىمەن، مۇلدەم اۋىز سۋى جوق 18 ەلدى مەكەن اۋىز سۋمەن قامتىلادى، 28 ەلدى مەكەننىڭ توزىعى جەتكەن سۋ قۇبىرلارىن قايتا جاڭارتۋ جوسپارلانۋدا. ونىڭ ىشىندە 8 ەلدى مەكەننىڭ تۇرعىندارى اۋىز سۋمەن قامتىلىپ، توزىعى جەتكەن اۋىز سۋ قۇبىرلارى جاڭارتىلدى.
وبلىس اۋماعىندا ءبىراز جىلدان بەرى شەشىمىن تاپپاي كەلە جاتقان ماسەلەلەر بار ەدى. اتاپ ايتقاندا، قۇرىلىسى اياقتالعانىمەن، 33 ەلدى مەكەن ءتۇرلى سەبەپتەرمەن تابيعي گازعا قوسىلماي قالعان بولاتىن. بۇگىندە 16 ەلدى مەكەن تابيعي گازبەن قامتاماسىز ەتىلدى. قالعان 17 ەلدى مەكەندى جىل سوڭىنا دەيىن گازعا قوسۋ جوسپارلانعان. وبلىستىڭ ەكونوميكالىق دامۋى قارقىندى ءارى جوسپارلارى اۋقىمدى.
