سۇلۋلىعىمەن كوز تارتاتىن «اقسۋ-جاباعىلى» قورىعىنىڭ ءوزى تۇرادى. بۇگىندە قورىقتى ارالاۋعا سوناۋ ەۋروپا، امەريكا مەن جاپونيادان جىل سايىن تولاسسىز تۋريستەر كەلىپ جاتادى. «تۇلكىباس» دەسە الما، «الما» دەسە تۇلكىباستىڭ ەسكە تۇسەتىنى تاعى بار.
ەل اراسىندا بۇل ولكە قىزعالداقتار وتانى رەتىندە دە كەڭىنەن تانىلعان، مۇنى شەتەلدىكتەر دە مويىنداپ وتىر. ياعني، بۇل ولكەنىڭ ەكونوميكالىق، اۋىلشارۋاشىلىق جانە تۋريستىك الەۋەتى وتە زور.
تۇلكىباس – ەسىمى ەلگە بەلگىلى قايراتكەر تۇلعالاردىڭ وتانى، تۋعان جەرىنە وشپەس ءىزىن قالدىرىپ، ەلەۋلى ەڭبەك ەتكەن الاشتىڭ ايبىنى تۇرار رىسقۇلوۆتىڭ تۋعان جەرى. مىنە، ەڭسەلى الاتاۋ مەن قارت قاراتاۋدىڭ تۇيىسكەن تۇسىنداعى تۇلكىباس اۋدانى بيىل 90-جىلدىعىن اتاپ ءوتتى.
تۇلكىباس الەۋمەتتىك-ەكونوميكالىق دامۋ جاعىنان تۇركىستان وبلىسىنداعى الدىڭعى قاتارلى اۋدانداردىڭ بىرىنەن سانالادى. اۋداننىڭ اۋىز تولتىرىپ ايتاتىن جەتىستىكتەرى، ءتۇرلى سالالارداعى تابىسى بارشىلىق.
كەزىندە كەڭەس وداعى تۇسىندا سالىنىپ، اتى دۇركىرەگەن سەمەنت، اك زاۋىتتارى جانە بيداي، جۇگەرى وندىرەتىن زاۋىتتار تاۋەلسىزدىك العان جىلدارى قايتا تۇلەپ، قاناتىن كەڭگە جايىپ، نارىقتىق باسەكەدە دەس بەرمەي كەلەدى. بەرتىنگى جىلدارى اۋداندا كاسىپكەرلىك سالاسى دامىپ، وتاندىق ونىمدەر، ازىق-تۇلىك، ءسۇت ونىمدەرى شىعارىلا باستادى. مۇنىڭ ءوزى حالىقتىڭ ءال-اۋقاتىنىڭ ارتقانىن كورسەتەدى.
تاۋەلسىزدىكتىڭ العاشقى جىلدارداعى جالپى وڭىرلىك ءونىم جارتى ميلليار تەڭگەنى جۋىقتاسا، بۇگىنگى كۇنى 11 ميلليارد 108 ميلليون تەڭگەنى قۇراپ، جان باسىنا شاققاندا 99،8 مىڭ تەڭگەنى قۇرادى.
