"احمەتبەت نۇرسيلا انشىلەردى "شەگىرتكە" دەسە، مەن "پارازيت" دەپ اتار ەدىم. حالىقتىڭ جىلدار بويى جيعان-تەرگەن قازىناسىن ءبىر ساتتە قاعىپ الاتىن تويحانا يەلەرى، ارتىستەر مەن اسابالار "پارازيت" ەمەي نەمەنە؟" – ساياساتتانۋشى ورالبەك وتەعۇلوۆ.

Dalanews اۆتوردىڭ Abai.kz-تە جاريالانعان ماقالاسىنان از-كەم ءۇزىندى ۇسىنادى.

"ءيا، ولار تازا پارازيتتەر. سوندىقتان، مەن قوعامدى وسىنداي پارازيتتەردەن تازارتۋ ءۇشىن تويحانالاردا توي جاساۋعا 5 جىلعا دەيىن موراتوريي جاريالاۋدى ۇسىنار ەدىم. قازاق قوعامىنداعى قوردالانعان پروبلەمالاردىڭ باستاۋى وسى توي سيندرومىنان باستالادى.

تويحانالاردىڭ قابىرعاسىندا ءاربىر قازاقتىڭ كوز جاسى بار. ەڭبەگى قانالعان ستۋدەنتتىڭ، تويدان كەيىن وكىنگەن اتا-انانىڭ. تويدىڭ كرەديتىنەن تاۋى شاعىلعان جاس وتباسىنىڭ."، – دەيدى اۆتور.

ونىڭ پىكىرىنشە توي الدىمەن پسيحولوگيالىق فاكتور.

"بۇل ماسەلەگە قاتىستى جاستاردىڭ دا پىكىرىن بىلگەنمىن. كوپشىلىگى تويعا قارسى. تويسىز-اق نەكە قيىپ باقىتتى بولۋعا بولادى دەپ ەسەپتەيدى. الايدا اتا-انالارىنان اسىپ كەتە المايدى.

وسىعان قاراپ-اق توي ۇلكەندەر ءۇشىن پسيحولوگيالىق قاجەتتىلىك دەپ ايتۋعا بولادى. وسى ءبىر پسيحولوگيالىق فاكتوردان بىرتە-بىرتە ارىلۋىمىز كەرەك.

كارانتين كەزىندە 3 اي توي تويلاماي وتىردىق ەمەس پە؟ نە وزگەردى؟ تويعا جۇمىسايتىن اقشالارىمىز قالتالارىمىزدا قالدى.

الەمدىك پاندەمەيا ادامداردى كوپ نارسەلەرگە باسقاشا قاراۋعا ماجبۇرلەپ جاتىر. مەن مۇنى تويدان باس تارتۋعا تاماشا مۇمكىندىك دەر ەدىم.

وسى كارانتين رەجيمىن پايدالانىپ تويدى رەتتەيتىن ارنايى زاڭ قابىلداپ الۋىمىز كەرەك.

وندا ۇيلەنۋ جانە ۇزاتىلۋ تويلارىن 50 اداممەن شەكتەيتىن، باسقا تويلارعا تىيىم سالاتىن بولۋى كەرەك. وعان قوسا تويلارداعى مۋزىكانىڭ دىبىس دەڭگەيىن، دايارشىلاردىڭ لايىقتالعان ايلىقتارىن، ت.ب. رەتتەيتىن باپتار بولۋى كەرەك.

وعان قوسا اسابالار مەن تويدا ونەر كورسەتەتىن ارتىستەردىڭ تابىسىنىڭ 50 پايىزىن سالىققا الۋ كەرەك. سوندا عانا ناعىز ساپالى ونەر مايتالماندارى ىرىكتەلىپ شىعادى.

ناعىز ونەر يەلەرى عانا حالىقتىڭ قۇرمەتىنە لايىق. وندايلار حالىقتىڭ قالتاسىن توناپ، لوتورەيالار ۇيىمداستىرىپ، پارازيتتىك تىرلىكپەن اينالىسپايتىن بولادى.