تاۋەلسىزدىك جىلدارى ەلىمىز تاريحي تۇرعىدان قىسقا مەرزىم ىشىندە عالامات تابىستارعا قول جەتكىزگەنى بەلگىلى. وسى ءاربىر جەتكەن جەتىستىكتىڭ ارتىندا ءتۇرلى سالادا جان اياماي قىزمەت ەتكەن ازاماتتاردىڭ ەڭبەگىن بايقاۋعا بولادى. قازاقستاننىڭ تاۋەلسىزدىگىن نىعايتىپ، ەل ءۇشىن تىنىمسىز ەڭبەك ەتكەن اپتال ازاماتتاردىڭ ءبىرى – ءادىلمىرزا بەيسەباي ۇلى مارالوۆ. ول بارشا قازاق جەرىن التىن بەسىگىنە بالاپ، ءومىرىنىڭ سوڭىنا دەيىن ەڭبەكتەن قول ۇزبەدى. ول شەبەر ۇيىمداستىرۋشى، كورنەكتى عالىم رەتىندە ەلىمىزدىڭ تاماق ونەركاسىبىنىڭ دامۋىنا ولشەۋسىز ۇلەس قوسقان ساناۋلى ازاماتتاردىڭ ءبىرى.

قوڭىر كۇزدە اينالا التىن تۇسكە بويالىپ، اعاشتاردىڭ جاپىراقتارى سۋسىپ جەرگە تۇسكەندە ق ر ۇلتتىق ينجەنەرلىك اكادەمياسىنىڭ بەلسەندى مۇشەسى، ەلىمىزدەگى جەڭىل ونەركاسىپ سالاسىنىڭ بىلىكتى مامانى، عىلىم مەن ءوندىرىستى ۇشتاستىرا وتىرىپ،   ونىڭ كورنەكتى ۇيىمداستىرۋشىسى بولعان ءادىلمىرزا بەيسەبايۇلىن ەسكە الاتىن بولدىق. جۇرەكتە ساقتالعان، كوڭىلدە وشپەستەي بولىپ ورىن العان ادەكەڭنىڭ جارقىن ءجۇزى كوز الدىمىزعا  ەلەستەپ، ءتاتتى ەستەلىكتەردەن كۇش-قۋات الاتىندايمىز...

اسىل ازاماتتىڭ جارقىن بەينەسى كوزدەن كەتسە دە ونىمەن سىيلاس ءاعا-ىنى، ارىپتەس-زامانداس بولعان جانداردىڭ كوڭىلىنەن وشكەن ەمەس.

ادەكەڭ عىلىم سالاسىندا العا قويعان ماقساتتارى مەن عىلىمي-زەرتتەۋ جۇمىستارىن ىسكە اسىرۋدا ق ر ۇلتتىق ينجەنەرلىك اكادەمياسىمەن جانە ونىڭ پرەزيدەنتى  اكادەميك ب.جۇماعۇلوۆپەن  تىعىز جۇمىس ىستەدى. ول اكادەميامەن بىرلەسىپ، جەڭىل ونەركاسىپ سالاسىنىڭ ماڭىزدى تارماعى سانالاتىن تاماق ونەركاسىبىن دامىتۋعا ولشەۋسىز ۇلەس قوستى. ەلباسى نۇرسۇلتان نازاربايەۆ ەلىمىزدىڭ ەڭ ءىرى قالالارى – استانا مەن الماتىدا ازىق-تۇلىك بەلدەۋىن قالىپتاستىرىپ، بۇل ونىمدەردىڭ ساپاسىن جوعارىلاتۋدى جانە ەلىمىزدىڭ تۇتىنۋشىلىق سۇرانىسىن  قامتاماسىز ەتۋدە عالىمداردىڭ  كوڭىل ءبولۋ كەرەكتىگىن تاپسىرعان ەدى. بۇل تاپسىرمانى ورىنداۋدا دا ءادىلمىرزا بەيسەباي ۇلى بىلەك سىبانا كىرىسكەن بولاتىن. ول قازاقستان رەسپۋبليكاسىنىڭ ۇلتتىق ينجەنەرلىك اكادەمياسىندا  تاماق ونەركاسىبى مەن حالىققا تۇتىنۋ تاۋارلارى بولىمشەسىندە   ماڭىزدى عىلىمي زەرتتەۋ جۇمىستارىن جۇرگىزۋگە مۇرىندىق بولىپ، تاماقتى جاڭا تەحنولوگيالاردى وندىرىسكە ەنگىزىپ، الماتىنىڭ ىرىسىن ارتتىردى.

وتكەن جىلى ق ر ۇلتتىق ينجەنەرلىك اكادەمياسىنىڭ پرەزيدەنتى باقىتجان جۇماعۇلوۆ رەسەي استاناسى ماسكەۋدە ورنالاسقان حالىقارالىق ينجەنەرلەر اكادەمياسىنىڭ جىلدىق سەسسياسىنىڭ ءتوراعاسى قىزمەتىن  اتقارعان تۇستا دۇنيەجۇزىنىڭ 42 ەلىنەن كەلگەن عالىمداردىڭ الدىندا  ءادىلمىرزا مارالوۆتىڭ ماڭىزدى عىلىمي-زەرتتەۋ جۇمىستارىن تالداپ، تارازىلاپ تۇسىندىرگەندە الەمنىڭ ءار قيىرىنان كەلگەن عالىمدار ادەكەڭنىڭ عىلىمي ەڭبەكتەرىنە قاتتى قىزىققان بولاتىن. وسى تۇرعىدان العاندا ءادىلمىرزا بەيسەباي ۇلىنىڭ ماڭىزدى عىلىمي جۇمىستارى ءوز ىشىمىزدە عانا ەمەس، سىرت ەلدەردە دە جوعارى باعاعا يە بولعانىن بايقاۋعا بولادى. وسىلايشا كورنەكتى عالىم، شەبەر ۇيىمداستىرۋشى كوزىنىڭ تىرىسىندە ەلىمىزدىڭ ابىرويىن اسقاقتاتىپ، قازاق عىلىمىنىڭ ءورىسىن كەڭەيتكەنىن ەرەكشە اتاپ ايتۋعا بولادى.

الماتىداعى، سول كەزەڭدەگى ەل استاناسىنداعى نان ونىمدەرى كومبيناتىن باسقارعان ءا.مارالوۆ تاۋەلسىز ەلىمىزدىڭ وسىپ-وركەندەۋىنە ءوز ۇلەسىن قوستى. ءوز مەكەمەسىندەگى جۇمىستى ۋاقىت تالابىنا ساي ۇيىمداستىرا بىلگەن ءادىلمىرزا مارالوۆتىڭ باسشىلىعىمەن «نان ونىمدەرى كومبيناتى» دا جەكەشەلەنىپ، 1992 جىلى «التىن ديىرمەن» اشىق اكسيونەرلىك قوعامىنا اينالدىرىپ، ەلدىڭ ىرىسىن ارتتىرعانىنا كۋا بولدىق. قيىن كەزەڭدە جۇزدەگەن جۇمىسشىلاردىڭ جالاقىسىن تاۋىپ، ميلليوننان استام تۇرعىنى بار الىپ شاھاردىڭ ازىق-تۇلىكپەن قامتاماسىز ەتۋدە جان اياماي كۇرەسكەن اپتال ازامات قاشاندا ەل مۇددەسىن جوعارى قويا ءبىلدى. بوزبالا شاعىنان جۇمىس ىستەپ، «ەڭبەك نانىنىڭ» ءقادىرىن ءبىر كىسىدەي بىلەتىن ادەكەڭ تالاي قيىندىقتى ابىرويمەن ەڭسەرىپ، جۇرتتىڭ ىقىلاسىنا بولەنگەنىنە ءبارىمىز كۋا بولدىق.  ماڭىزدى كاسىپورىننىڭ ءبىرىنشى باسشىسى بولىپ قىزمەت ەتكەن ءادىلمىرزا بەيسەباي ۇلى ءوندىرىستىڭ وزىق ادىستەرىنە باسا نازار اۋدارا وتىرىپ، كورپوراسيا شىعاراتىن بارلىق ءونىم تۇرلەرىنىڭ ءوندىرىسىن جاڭا، زاماناۋي دەڭگەيگە كوتەرۋ ارقىلى كاسىپورىننىڭ نەگىزگى باعىت-باعدارىن ساقتادى.

وندىرىستىك قىزمەتتەرمەن قاتار ءادىلمىرزا بەيسەباي ۇلى قوعامدىق-ساياسي ىستەرگە دە بەلسەنە قاتىستى. ول ۇزاق جىلدار بويى الماتى قالاسى ءماسليحاتىنىڭ دەپۋتاتى، «نۇر وتان» پارتياسىنىڭ دەپۋتاتتىق فراكسياسىنىڭ جەتەكشىسى، «نۇر وتان» پارتياسىنىڭ الماتى قالالىق بولىمشەسىنىڭ ساياسي كەڭەسى بيۋروسىنىڭ مۇشەسى، الماتى قالاسى تۇركسىب اۋدانىنىڭ دەپۋتاتتىق توبىنىڭ  ءتوراعاسى قىزمەتتەرىن اتقارعانىن ءبارىمىز بىلەمىز. تەك تۇركسىب اۋدانى كولەمىندە عانا ەمەس، جالپىقالالىق ماسەلەلەردى شەشۋگە بەلسەنە قاتىسقان ءادىلمىرزا بەيسەباي ۇلى وندىرىستىك جانە قوعامدىق قىزمەتتى كولەمدى عىلىمي جۇمىستارمەن شەبەر ۇشتاستىرا ءبىلدى. دەپۋتات رەتىندە ءوز ىسىنە جاۋاپتى ءارى ۇقىپتى ول اينالاسىنداعىلارعا قاشاندا قامقورلىق تانىتىپ، قولىنان كەلگەنىنشە كومەك قولىن سوزدى. از عۇمىرىندا ادامدىقتىڭ ۇلگىسىن كورسەتىپ، حالىق قالاۋلىسى مارتەبەسىن كوتەرگەن اپتال ازاماتتىڭ جارقىن بەينەسى، ونەگەلى ىستەرى ءبارىمىزدىڭ جۇرەگىمىزگە جاتتالىپ قالعانى انىق. 2001 جىلى «التىن-ديىرمەن» كورپوراسياسىن زامان تالابىنا ساي باسقارىپ، وندىرىستە زاماناۋي جاڭالىقتاردى ەنگىزگەن ءادىلمىرزا مارالوۆ ونەركاسىپكە جاردەم بەرۋدىڭ ەۋروپالىق قاۋىمداستىعىنىڭ (SPءى) التىن مەدالى مەن ەسىمدىك سەرتيفيكاتىنا يە بولدى. ول قازاقستان ەكونوميكاسىن وركەندەتۋگە قوسقان ۇلەسى ءۇشىن ەلباسىنىڭ جارلىعىمەن 2008 جىلى «قۇرمەت» وردەنىمەن، مەرەكەلىك مەدالدارمەن ماراپاتتالدى.

سوققان جەلدەي، اققان سەلدەي زىمىراپ وتە شىققان قايران جىلداردىڭ قايتىپ كەلمەسى انىق بولسا دا، سول ءبىر نۇرلى بەلەستەردىڭ  كوڭىلدەن كەتپەيتىن، جۇرەكتەن وشپەيتىن ماعىنالى دا مانەرلى، ساعىنىشتى دا اسەرلى ساتتەرى كەيدە كوز الدىندا كوكشە تەڭىزدىڭ كوگىلدىر ايدىنىنداي، ىلەنىڭ ءيىرىمدى تولقىنىنداي ءۇيىرىلىپ تۇرا قالاتىنى بەلگىلى. ءيا، ساعىمدى جىلدار ساعىنىشتىڭ، ءتىپتى ءتاتتى مۇڭنىڭ ەلەسى سياقتى ەكەن-اۋ.

تۋعان جەرىن، تۋىپ-وسكەن بەلىن ساعىنبايتىن ادام بولمايدى. ءادىلمىرزا بەيسەباي ۇلى –  كوپتى كورگەن كونەكوز كىسى عوي، ادەبىنەن جاڭىلمايدى، كوپ كوسەمسىپ سويلەي بەرگەندى دە ۇناتپايتىن. ءبىراق تۋعان ەل، وسكەن جەر تۋرالى پايىمى بولەك بولاتىن. اسىرەسە، ونىڭ تۋعان جەر، اتاجۇرتقا دەگەن پەرزەنتتىك قۇرمەتى شەكسىز ەكەنى بايقالىپ تۇرۋشى ەدى. بۇل سەزىم ونىڭ بۇكىل سانالى عۇمىرىنىڭ التىن قازىعى ىسپەتتى. قاريا كوڭىلدىڭ داريا شالقار سەزىمى تەلەگەي ەكەندىگىن ءبىز دە بىرتە-بىرتە ۇعىنا تۇسكەندەيمىز.

تابيعاتى سۇلۋ، اۋاسى جۇپار، ءشوبى قۇنارلى ءوڭىر كونە تارازدىڭ كەسكىن-كەلبەتىنە ساي ونىڭ ادامدارىنىڭ دا ءجۇزى شۋاقتى، دەنى قۋاتتى بولىپ كەلەدى. بۇل – تابيعي زاڭدىلىق قوي. ءوزى دە شيراق، پىسىق ادەكەڭ ءوز اۋىلىنىڭ ادامدارى شەتىنەن اقجارقىن، ساۋىققوي، جايساڭ كوڭىل، جومارت جاندار بولىپ كورىنىپ تۇراتىن. ادەكەڭ ءوزىنىڭ سانالى عۇمىرىندا ءوزىنى وسى جايدارلى مىنەزىنەن اينىعان ەمەس. اۋىلدان ۇيىنە بىرەۋ كەلە قالسا، ەڭكەيگەن قارتىنان باستاپ، ەڭبەكتەگەن بالاسىنا دەيىن امان-ەسەندىگىن سۇراپ، بىلگىسى كەلىپ تۇراتىن. اسىلى، اتا-بابالارىمىزدىڭ قانىنا سىڭگەن وسىنداي جاقسى قاسيەتتەرىنىڭ جۇرناعىن جوعالتىپ الماۋعا ادەكەڭ سىندى ازاماتتاردىڭ دانەكەر بولىپ جۇرگەندەرىنىڭ ءوزى ۇلكەن ءبىر عانيبەت ەدى.

ول ونەگەلى ءومىرى، ورەلى ىسىمەن، ازاماتتىق-ادامگەرشىلىك بولمىسىمەن سوڭىنا جارقىن ءىز قالدىرعان مەملەكەتشىل تۇلعالاردىڭ ءبىرى بولدى. كونە تاراز توپىراعىنان تۇلەپ ۇشقان الماتى قالالىق ءماسليحاتىنىڭ بىرنەشە شاقىرىلىمىنىڭ دەپۋتاتى، الماتىداعى «التىن ديىرمەن» كورپوراسياسىن شيرەك عاسىر باسقارىپ جۇرتشىلىقتىڭ ىقىلاسىنا بولەنگەن ءادىلمىرزا بەيسەباي ۇلى تەگىنە قاراساڭىز، قازاق تاريحىنىڭ كىندىگىنە اينالعان ەجەلگى تاراز توپىراعىمەن تىعىز بايلانىستى.

كونە زاماننان بەرى تالاس، اۋليەاتا، جامبىل اتانىپ، تاۋەلسىزدىك تۇسىندا تاريحي تاراز اتاۋىن قايتا يەمدەنگەن وڭتۇستىكتىڭ قالاسى قانشاما تاريحقا كۋا بولدى دەسەڭشى. قاسيەتتى تاراز توپىراعىندا دۇنيەگە كەلىپ، ەلگە قامقور، جەرگە قورعان بولعان نەبىر ەرلەردىڭ بۇگىنگى تۇياعىنداي ءادىلمىرزا مارالوۆ تا وسى وردالى وتاننىڭ پەرزەنتى. وسى تاريحي توپىراقتا دۇنيەگە كەلىپ، ەس ءبىلىپ، ەڭسە تىكتەدى. كوپبالالى شاڭىراقتىڭ ۇلانى كامەلەت جاسىنا تولىسىمەن ەڭبەككە ارالاستى.

ەڭبەك جولىن 1970 جىلى جامبىل شاراپ زاۋىتىندا سلەسار بولىپ باستاعان بوزبالا ەڭبەكپەن تاپقان ناننىڭ ءدامىن شىن مانىندە ءبىلدى. ەڭبەكپەن تابىلعان اس اتاسى – ناننىڭ كەيىنگى ءومىرىنىڭ تۋرا ماعىناسىنداعى وزەگى بولاتىنىن بوزبالا ادەكەڭ ول كەزدە ويلاماعان بولار. دەسە دە، ءادىلمىرزا مارالوۆتىڭ كاسىبى مەن ەڭبەك جولى تاماق ءوندىرىسى، ونىڭ ىشىندەگى بيداي-نان سالاسىمەن جالعاسقانى راس. بۇل ونىڭ ەڭبەك ادامىنان ەل اعاسى، حالىق قالاۋلىسى بولعانعا دەيىنگى ءبىلىم، ەڭبەك جولى.

ءادىلمىرزا مارالوۆتىڭ جوعارى ءبىلىم جولى جامبىل جەڭىل جانە تاماق ونەركاسىبى ينستيتۋتىندا ءوتتى. ينستيتۋتتى ويداعىداي بىتىرگەن جاس مامان جامبىل وبلىستىق نان ونىمدەرى باسقارماسىنىڭ تەحنيكالىق بولىمىندە ينجەنەر قىزمەتىن باستادى. جوعارى ءبىلىمىن تاجىريبەمەن ۇشتاستىرعان ول بىرلىك نانقابىلداۋ مەكەمەسىنىڭ باس ينجەنەرى قىزمەتىن اتقاردى.

1981-1983 جىلدارى شۋ قالالىق پارتيا كوميتەتىنىڭ وندىرىستىك-كولىك بولىمىنە نۇسقاۋشى بولىپ شاقىرىلعان ءادىلمىرزا مارالوۆتىڭ پارتيالىق-ۇيىمداستىرۋشىلىق سالاداعى العاشقى قادامدارىنىڭ دا نەگىزى قالانعانداي. كەيىن حالىق قالاۋلىسى، كورپوراسيا باسشىسى سياقتى جاۋاپتى تىرلىكتەردىڭ باستاۋى ىسپەتتى.

ايتقانداي، ءا.مارالوۆتىڭ ەلىمىزدىڭ جەڭىل جانە تاماق ونەركاسىبى سالاسىنداعى كاسىپورىن باسشىلىعى قىزمەتى وسى 80-جىلداردان باستالادى. 1983-1989 جىلداردا جامبىل وبلىسى شۋ اۋداندىق نان ونىمدەرى رەال بازاسىنىڭ ديرەكتورى، 1989 جىلدىڭ تامىز ايىندا بالامالى سايلاۋ نەگىزىندە الماتى نان ونىمدەرى كومبيناتىنىڭ ديرەكتورى بولىپ سايلاندى. بۇل كەڭەستىك-پارتيالىق جۇيەنىڭ السىرەپ، الىپ ەلدە دەموكراتيا، حالىق پىكىرى قانات جايعان كەزەڭ بولاتىن.

1990 جىلدار جەتپىس جىلدان استام ۋاقىت بيلىك قۇرعان كەڭەستىك جۇيەنىڭ، وسىنشاما ۋاقىت جالعىز ءوزى بيلىك ەتكەن كوممۋنيستىك پارتيانىڭ سوڭعى تۇياق سەرپەر جىلدارى بولدى. وسى جەتپىس جىلدان استام ۋاقىتتا بارىن ورتاق قازىناعا سالىپ، ماسكەۋ دەگەن ورتالىقتىڭ ءبولىپ بەرگەنىن عانا مىسە تۇتقان 15 رەسپۋبليكا تاريح تالابىمەن تاۋەلسىزدىككە قول جەتكىزگەن تۇس بولاتىن. الىپ يمپەريانىڭ ءتۇپسىز قازانىن نانمەن تولتىرعان نەگىزگى رەسپۋبليكا قازاقستان دا 1991 جىلى ەگەمەندىككە قول جەتكىزدى. قازاقكسر-نىڭ 1930 جىلداردا ءوزى اشارشىلىقتا بولسا دا، بارىن ورتالىققا جىبەرگەنىنە، 1940-1950 جىلداردا ۇلى وتان سوعىسىنىڭ نەگىزگى تىلى بولعانىنا، تىڭ يگەرىپ، كەڭەس حالقىنىڭ اۋزىن اق نانعا جەتكىزگەنىنە تاريح كۋا.

ادام جانى، بەينە اشىلماعان ارال ىسپەتتى. ول ارالدا تىنىستى اشاتىن جۇپار اۋاسىن جۇتىپ، كەمپىرقوساقتاي قۇبىلعان جاسىل الەمدە الشاڭ باسىپ، وزىنشە تىرشىلىك ەتكەن، وزگەشە ءومىر سوقپاعىن سىزعان ءتىرى جان يەلەرى ءورىس تاۋىپ ءورىپ جۇرەدى. ادام مەن تابيعاتتىڭ بۋدانداسا، ورايلاسا ءومىر ءسۇرۋى وسىنداي-اق بولار دەپ ويلايسىز!

اباي اتامىز ايتقانداي، ادەكەڭ «اتانىڭ بالاسى ەمەس، ادامنىڭ بالاسى» بولا بىلگەن جان ەدى. وعان قۇداي بەرگەن ۇلى مىنەز – قاراپايىمدىلىعى، باۋىرمالدىعى، كارى-جاسقا بىردەي مەيىرباندىعى ەدى.

جاقسى ادام ەلدىڭ باسشى سەركەسىندەي،

جۇعىمدى بولار ەلگە ەركەسىندەي.

جاقسىنىڭ ءجۇزى جىلى، ءسوزى مايدا،

حالقىنىڭ قالىڭ ءجۇندى كورپەسىندەي، – دەپ ءسۇيىنباي اقىن جىرلاعانداي، جەكە باسىنىڭ اسىل دا اينىماس ادامگەرشىلىك قاسيەتتەرىمەن جان-جاعىنا ساۋلە شاشىپ، جىلىلىق ۇيالاتىپ تۇراتىن اق جۇرەكتى، نار تۇلعالى اسىل ازاماتتىڭ اسقار اسۋلارى مەن جەتكەن بيىكتەرى جايلى قانشا ايتساڭ دا تاۋسىلمايدى.

«تۋرا بيدە تۋعان جوق، تۋعاندى بيدە يمان جوق» دەيتىن ۇلى قاعيدا قازىعىنا ءسوزى مەن ءىسىن بايلاپ وسكەن ادەكەڭ قايدا جۇرسە دە، قانداي قىزمەتتىڭ قۇلاعىن ۇستاسا دا ويىن تۋرا ايتار مىنەزى مەن تاباندىلىعى، اۋىلشارۋاشىلىعىنىڭ جاي-جاپسارىن مىقتى بىلەتىن كاسىبي قابىلەت-قارىمىنىڭ كەڭدىگى مەن تەرەڭدىگى ءارقاشان بايقالىپ تۇراتىن. قاي قىزمەتتى اتقارسا دا ول ادالدىعىمەن، قابىلەت-قارىمىمەن ءارى كاسىبي شەبەرلىگىمەن دارالاندى. وسىلايشا تۋىپ-وسكەن جەرىنە، ءقادىرىن ۇققان ەلىنە ادال قىزمەت قىلۋدىڭ ۇلگىسىن تانىتتى. ەلى ءۇشىن ايانباي تەر توگىپ، ابىرويلى ازامات، ەل اعاسى اتاندى. قاشاندا، قاي لاۋازىمنىڭ تىزگىنىن ۇستاسا دا بيازى مىنەزىنەن اۋىتقىماي، بىلسەم، بىلگەن ۇستىنە بىلە تۇسسەم دەگەن ۇسىناقتى ۇستانىمىنان تانبادى. ەڭ باستىسى، كوكىرەك كوزى اشىق، ءھام كورگەنى مەن تۇيگەنى كوپ مول قازىنالى، زەرەك تە زەردەلى جان شىن مانىندە اعا ۇرپاقتىڭ اتىنا زاتى ساي لايىقتى وكىلى رەتىندە تانىلا ءبىلدى.

«جاقسىنىڭ جاقسىلىعىن ايت، نۇرى تاسىسىن…» دەمەكشى، ءادىلمىرزا بەيسەباي ۇلى اۋىل ءومىرىن، ەل تىنىسىن، حالقىمىزدىڭ ءسالت-داستۇرىن، شۇرايلى ءتىلىن جاقسى بىلەتىن ول قاي تاقىرىپتا اڭگىمە قوزعالسا دا وعان ەركىن ارالاسىپ، ءوز ويىن اشىق ءبىلدىرىپ وتىراتىنىمەن ەرەكشەلەنەتىن.

جۇكتەلگەن مىندەتتى ابىرويمەن اتقارىپ، كوپتىڭ العىسى مەن ريزاشىلىعىنا بولەنىپ، تاجىريبەسىن تولىستىرىپ، ەلگە اعا بولعان ازامات ىسكەرلىگىن كورسەتىپ، بىلىم-بىلىگىن ورتاعا سالىپ، قاجىر-قايراتىن ورتاق مۇددە جولىنا جۇمسادى. قانداي ءىس تاپسىرىلسا دا توسىرقاي قارامايتىن، جاڭالىق اتاۋلىنى جاتسىنبايتىن، قاي شارۋانى اتقارۋدان دا تارتىنبايتىن، باتىل كىرىسىپ كەتەتىن ادەكەڭ ەلىمىز ەگەمەندىگىن، مەملەكەتىمىز تاۋەلسىزدىگىن العان، ەكونوميكادا نارىقتىق قاتىناستارعا كوشكەن كەزەڭدە دە ءبىرتالاي جۇمىستىڭ باسىن قايىردى. ول ءومىرىنىڭ سوڭىنا دەيىن قاتاردان قالماي، ومىردەگى بار كورگەن-تۇيگەنى مەن جيعان-تەرگەنىن كەيىنگى ءىزباسارلارىنا، قالا بەردى ۇرپاقتارىنا جالعاستىرۋدى مۇرات تۇتتى.

ءادىلمىرزا بەيسەبايۇلىنداي ۇلتجاندى ازاماتتىڭ ارامىزدا جوقتىعى انىق بايقالادى. ءبىراق ونىڭ ىستەگەن ءىسى، جايدارى مىنەزى جۇرەگىمىزدىڭ  تەرەڭىندە ماڭگىگە تۇنىپ قالعان. «جاقسىنىڭ سوڭىندا جاقسى ءىز قالادى» دەگەن بابالارىمىز.  ءادىلمىرزا سوڭىنا جاقسى ءىس، جاقسى ءىز، ۇلاعاتتى ۇرپاق  قالدىرىپ كەتتى.  ول وتباسىندا ادال جار، بالالارىنا اسقار تاۋ اكە، نەمەرەلەرىنە  سۇيىكتى اتا بولا ءبىلدى.