برازيليانىڭ ەڭ ءىرى مەگاپوليسى كوشەلەرىندە ەسىرتكى مافياسى مەن پوليسيا اراسىندا ناعىز سوعىس باستالدى. بىرنەشە كۇننىڭ ىشىندە قازا تاپقاندار سانى 130-عا جەتتى دەپ حابارلايدى Dalanews.kz. DW-گە سىلتەمە جاساپ.
«قىزىل كوماندا» بانداسىنا قارسى رەيدتەر 28–29 قازان كۇندەرى ريو-دە-جانەيرونىڭ سولتۇستىگىندەگى الەماو جانە پەنيا فاۆەلاسىندا ءوتتى. وپەراسياعا شامامەن 2500 كۇشتىك قۇرىلىم قىزمەتكەرى قاتىستى. باسىلىمنىڭ مالىمەتىنشە، بۇل — ەل تاريحىنداعى ەڭ قاندى پوليسيا وپەراسياسى.
وسى ۋاقىتقا دەيىن برازيليا بيلىگى 119 ادامنىڭ قازا تاپقانىن راستادى. ادۆوكاتتاردىڭ دەرەگىنشە، قۇرباندار سانى 130-دان اسىپ كەتكەن.
ريو-دە-جانەيرو اكىمشىلىگى 118 قارۋ-جاراقتىڭ، ونىڭ ىشىندە اۆتوماتتار مەن جارىلعىش زاتتاردىڭ تاركىلەنگەنىن حابارلادى. 10 ءجاسوسپىرىمدى قوسا العاندا، بارلىعى 113 ادام ۇستالدى.
بۇۇ باس حاتشىسى انتونيۋ گۋتەرريش تە پوليسيا رەيدتەرى سالدارىنان قازا تاپقاندار سانىنا تەرەڭ الاڭداۋشىلىق ءبىلدىردى. ول برازيليا بيلىگىن ادام قۇقىقتارىن ساقتاۋعا جانە بولعان وقيعانى تەرگەۋگە شاقىردى.
رەيدتى ايىپتاعان ونداعان قۇقىق قورعاۋ ۇيىمدارى دا ءۇن قاتتى، ولاردىڭ اراسىندا حالىقارالىق Amnesty International ۇيىمى بار.
ەسكە سالساق، كەشە ريوداعى حالىقارالىق اۋەجاي ماڭىنداعى فاۆەلا اۋدانىندا 2،5 مىڭ پوليسيا قىزمەتكەرى مەن ارنايى جاساق ساربازدارى رەيد وتكىزگەنى حابارلانعان ەدى. بۇل اۋدان برازيلياداعى ەڭ ىقپالدى ۇيىمداسقان قىلمىستىق توپتاردىڭ ءبىرى رەتىندە قاراستىرىلادى.
ناتيجەسىندە مافيا مەن پوليسيا اراسىندا ناعىز سوعىس باستالدى: ەسىرتكى ساۋداسىمەن اينالىساتىندار پوليسيانىڭ شابۋىلىنا جاۋاپ رەتىندە وق جاۋدىرىپ، بارريكادالار جاساپ، كولىكتەردى ورتەدى. بۇل توپ ارنايى جاساققا جارىلعىش زاتتار تاستاۋ ءۇشىن العاش رەت اسكەري درونداردى قولداندى.
