– ونىڭ ۇلتتىق مادەنيەتكە، ۇلتتىق تاريحقا كوزقاراسى وتە جاقسى. سول باعىتتا جۇمىس ىستەپ جۇرگەن ازاماتتارعا كومەگىن بەرەدى. الماتىدا دا قولىنان كەلگەن كومەگەگىن ايامادى. ول جاعىنان ءار ۋاقىتتا راحمەتىمدى ايتامىن.
ءبىراق تاسماعامبەتوۆ – ءبىز وزگەرتكىمىز كەلەتىن جۇيەنىڭ سولداتىنىڭ ءبىرى.
ەگەر ءبىز ادىلەتتى قوعام قۇرامىز دەسەك، بۇرىنعى نازاربايەۆتىڭ قاسىندا ءجۇرىپ، سونىڭ داستارحانىنان تاماق ىشكەندەردەن ءۇمىت كۇتپەي-اق قويايىقشى. وسىنى حالىق ءبىلۋى كەرەك، – دەدى ساياساتكەر.
ونىڭ ايتۋىنشا، ءقازىر جۇيەگە قارسى شىعۋشىلار، نازاربايەۆ ءداۋىرىن سىناۋشىلاردىڭ ارەكەتى كوبىنە «كەك الۋعا» ۇقساس كەلەدى.
– بۇلاردىڭ كوبىسى سول جەردەن، ءوزىنىڭ قىزمەتىنەن كەتكەننەن كەيىن كەلەدى. ايتپاعىم جاقسى ءسوز ەمەس، ءبىراق «رەنجۋلى» سياقتى. كەك العىسى كەلەتىن سياقتى.
سوندىقتان ول ادامدارعا ايتۋ كەرەك: «راحمەت، جۇمىس ىستەدىڭدەر، بيلىكتە جۇردىڭدەر. نازاربايەۆتىڭ قاسىندا ءجۇرىپ، وسى جۇيەنى قۇردىڭدار. ەندى سىناپ جاتساڭدار، وعان دا راحمەت. ءبىراق سەندەر بيلىك باسىنا كەلمەي-اق قويىڭدارشى»، – دەدى سپيكەر.
دوس كوشىمنىڭ ويىنشا، يمانعالي تاسماعامبەتوۆتىڭ ۇقشۇ-عا باس حاتشى بولىپ بارۋى، ونىڭ ساياسي سالماعىن ارتتىرعان جوق، كەرىسىنشە، ازايتتى.
– ۇقشۇ-نى قاڭتار وقيعاسىنان كەيىن، تمد-نىڭ جاندارمى دەپ ايتۋعا بولادى. نەگە؟ ۇقشۇ-نىڭ قۇرىلۋىنىڭ جالعىز ماقساتى بولدى. سىرتقى جاۋدان بىرگە قورعانۋ.
ءبىراق پرەزيدەنت ۇيىمدى حالىقتىڭ ىشكى ريەۆوليۋسياسىنا قارسى قولداندى. توقايەۆتىڭ ەڭ ۇلكەن گەوساياسي قاتەلىگى وسى. بۇل پرەسەدەنت بولىپ ۇلگى كورسەتتى.
ەندى ارمەنيادا حالىق كوتىرلەسە دە، رەسەيدىڭ ىشىندە حالىق بيلىككە قارسى شىقسا دا ۇقشۇ-نى اپارىپ سالادى. ۇقشۇ-نى ءوز بيلىگىنە قارسى شىققان حالىققا قولداناتىن بولدى.
ال سونىڭ باستىعى قازاق بولىپ وتىر. مەنىڭ نەگە جانىم كۇيمەيدى؟ بارماۋى كەرەك ەدى. ۇقشۇ وتە قاتەرلى «مينا الاڭى». ول جەردە ءبارىن پۋتين باسقارادى. بۇل سونىڭ قولبالاسىنا اينالسا، كۇشىنەن تاعى دا ايىرىلادى، – دەدى ساياساتكەر.
