اقتاس اۋىلىنداعى №36 ورتا مەكتەپتىڭ شارۋاشىلىق مەڭگەرۋشىسى سەرىكجان بەكمۇراتوۆ ديزەل وتىنىن ءبولۋ جونىندە زاڭبۇزۋشىلىقتار بار دەپ شاعىمدانعان ەدى. وسى ماسەلەگە قاتىستى اۋداندىق ءبىلىم ءبولىمى رەسمي جاۋاپ بەردى، دەپ حابارلايدى Dalanews.kz.

2023 جىلى مەكتەپ 107 810 ليتر ديزەل وتىنىن قابىلدانىپ، رەسمي قۇجاتتار ارقىلى تالعار اۋدانىنىڭ 9 مەكتەبىنە 102 400 ءليترى تاراتىلعان. №36 مەكتەپتە 2 976 ليتر وتىن قالعان.
2024 جىلدىڭ ناۋرىز–مامىر ايلارىندا انتيكور حاتى نەگىزىندە ىشكى مەملەكەتتىك اۋديت دەپارتامەنتى تەكسەرىس جۇرگىزىپ، قۇجاتتاردى سالىستىرۋ ناتيجەسىندە ەشقانداي ايىرماشىلىق تاپپاعان.

كادرلىق ماسەلەلەر

رەسمي جاۋاپتا مەكتەپتەردە شارۋاشىلىق قىزمەتىنە جاۋاپتى قىزمەتكەرلەر كونكۋرس ارقىلى قابىلداناتىنى ايتىلعان. №36 مەكتەپتىڭ شتاتىندا ديرەكتوردىڭ شارۋاشىلىق جونىندەگى ورىنباسارى مەن شارۋاشىلىق مەڭگەرۋشىسى بار.

سەرىكجان بەكمۇراتوۆ بۇل قىزمەتكە 2023 جىلعى 1 قىركۇيەكتە قابىلدانعان. ونىڭ مىندەتىنە مەكتەپتىڭ ىشكى-سىرتقى تازالىعىن قاداعالاۋ، تەحنيكالىق قىزمەتكەرلەردىڭ جۇمىسىن ۇيىمداستىرۋ جانە ءورت قاۋىپسىزدىگىن ساقتاۋ كىرەدى. ونىڭ جۇبايى اتالعان مەكتەپتە باستاۋىش سىنىپ ءمۇعالىمى.

ديرەكتوردىڭ شارۋاشىلىق جونىندەگى ورىنباسارى بۇرىن ماتەريالدىق جاۋاپكەرشىلىكتى، ەسەپ جۇرگىزۋ، كوممۋنيكاسيا جۇيەلەرىنىڭ جۇمىسىن قامتاماسىز ەتۋ جانە شارۋاشىلىق شىعىندارىن باقىلاۋ جۇمىستارىن اتقارعان.

تەكسەرۋلەر ناتيجەسى

بەكمۇراتوۆ بىرنەشە رەت ءارتۇرلى ورگاندارعا شاعىم تۇسىرگەن. ءبىراق بارلىق اۋديت پەن قۇجاتتىق تەكسەرۋلەر ونىڭ ايتقان دەرەكتەرىن راستاعان جوق. ءبىلىم ءبولىمى باسشىسىنىڭ ايتۋىنشا، ول ارىزدانۋشى ازاماتتى بۇرىن كورمەگەن جانە جەكە تانىستىعى جوق.

سونىمەن قاتار، سەرىكجان بەكمۇراتوۆ 2025 جىلدىڭ ءساۋىر–تامىز ايلارىندا بەس اي بويى ەڭبەككە جارامسىزدىق پاراعىمەن ەم قابىلداپ، جۇمىسقا شىقپاعان.

ەسكە سالايىق، بۇعان دەيىن الماتى وبلىسى تالعار اۋدانىنا قاراستى اقتاس اۋىلىنداعى №36 جالپى ءبىلىم بەرەتىن ورتا مەكتەپتىڭ شارۋاشىلىق ءبولىمىنىڭ قىزمەتكەرى سەرىكجان بەكمۇراتوۆ ءبىلىم ورداسىنداعى بىلىقتار تۋرالى ايتىپ بەرگەن بولاتىن.