الماتى وبلىسىندا 900 ورىندىق جاڭا مەكتەپ اشىلدى. جاڭا مەكتەپ وڭىردەگى ءۇش اۋىسىمدى وقىتۋ ماسەلەسىن شەشۋگە سەپ بولادى.
تالعار اۋدانىنا قاراستى جاڭالىق اۋىلىندا 900 وقۋشىعا ارنالعان جاڭا مەكتەپ پايدالانۋعا بەرىلدى. ءۇش قاباتتى، زاماناۋي ءبىلىم وشاعى مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى مەن «AMANAT» پارتياسىنىڭ 2023–2027 جىلدارعا ارنالعان سايلاۋالدى باعدارلاماسىنىڭ جول كارتاسى اياسىندا سالىندى.
مەكتەپتىڭ ىشكى ينفراقۇرىلىمى قازىرگى زامان تالاپتارىنا ساي جابدىقتالعان. ءبىلىم ورداسىندا پاندىك كابينەتتەرمەن قاتار STEM جانە روبوتوتەحنيكا سىنىپتارى، ينكليۋزيۆتى ءبىلىم بەرۋ ورتالىعى، كىتاپحانا، شەبەرحانا، سپورت جانە اكت زالى، كەڭ اسحانا مەن ءماجىلىس زالى قاراستىرىلعان.
اشىلۋ سالتاناتىندا الماتى وبلىسىنىڭ اكىمىنىڭ ورىنباسارى بولات كۇرەڭبەكوۆ ءسوز سويلەپ، بۇل نىساننىڭ وڭىردەگى وزەكتى الەۋمەتتىك ماسەلەنىڭ شەشىمىنە اينالعانىن اتاپ ءوتتى.
«بۇل ءبىلىم ورداسى – پرەزيدەنت باستاماسىمەن جۇزەگە اسىپ جاتقان «كەلەشەك مەكتەپتەرى» جوباسى اياسىندا بوي كوتەرگەن العاشقى زاماناۋي مەكتەپتەردىڭ ءبىرى. مەملەكەت باسشىسىنىڭ «ءبىز قازاقستانداعى بارلىق بالالاردىڭ باقىتتى بولاشاعىن قامتاماسىز ەتۋىمىز كەرەك» دەگەن ءسوزى بۇگىنگى ءىستىڭ ءمان-ماڭىزىن اشا تۇسەدى»، – دەدى ول.
اكىمنىڭ ايتۋىنشا، تەك وتكەن جىلى وڭىردە 9 جاڭا مەكتەپ قولدانىسقا بەرىلسە، بيىل تاعى 17 نىساننىڭ قۇرىلىسى جۇرگىزىلىپ جاتىر. بۇل باعىتتا مەملەكەتتىك-جەكەمەنشىك ارىپتەستىك تەتىكتەرى قولدانىلىپ، جەكە ينۆەستيسيالار دا تارتىلۋدا.
بۇل ناتيجەلەرگە قول جەتكىزۋدە جەرگىلىكتى اتقارۋشى ورگاندارمەن قاتار، پارتيالىق باقىلاۋ مەن ساياسي قولداۋدىڭ دا ماڭىزى زور. «AMANAT» پارتياسى وڭىرلەردەگى ينفراقۇرىلىمدىق باستامالاردىڭ جۇزەگە اسۋىنا تىكەلەي ارالاسىپ كەلەدى.
«ەكى جىل بۇرىن ءبىز مەكتەپ تاپشىلىعى ماسەلەسىن شەشەمىز دەپ ۋادە بەردىك. سول كەزدە وبلىستا ءۇش اۋىسىمدى 52 مەكتەپ بولعان. ءقازىر بۇل سان 30-عا دەيىن قىسقاردى. جاڭالىقتاعى مەكتەپ – جول كارتاسىندا كوزدەلگەن 63 مەكتەپتىڭ قاتارىنداعى ناقتى جۇزەگە اسقان جوبا. قۇرىلىس باستالعان كۇننەن باستاپ پارتيالىق باقىلاۋدا بولدى. ۋادە بەرگەن سوڭ، سول پروسەستىڭ ىشىندە بولۋ – ءبىزدىڭ مىندەت»، – دەدى «AMANAT» پارتياسى الماتى وبلىستىق فيليالىنىڭ ءتوراعاسى قۋات بايعوجايەۆ.
ايتا كەتۋ كەرەك، وڭىردە ءبىلىم بەرۋ ينفراقۇرىلىمىن جاڭارتۋ – «AMANAT» پارتياسىنىڭ باسىم باعىتتارىنىڭ ءبىرى. جول كارتاسىندا بەلگىلەنگەن ماقساتتار جۇيەلى تۇردە ورىندالىپ كەلەدى. جاڭا مەكتەپتەردىڭ اشىلۋى ءۇش اۋىسىمدى وقىتۋدى ازايتىپ قانا قويماي، مۇعالىمدەر ءۇشىن تۇراقتى جۇمىس ورىندارىن كوبەيتىپ، جىل سايىن مىڭداعان بالاعا قولايلى وقۋ جاعدايىن جاساۋعا مۇمكىندىك بەرۋدە.
