Almaty oblysynda 900 oryndyq jańa mektep ashyldy. Jańa mektep óńirdegi úsh aýysymdy oqytý máselesin sheshýge sep bolady.
Talǵar aýdanyna qarasty Jańalyq aýylynda 900 oqýshyǵa arnalǵan jańa mektep paidalanýǵa berildi. Úsh qabatty, zamanaýi bilim oshaǵy Memleket basshysy Qasym-Jomart Toqaevtyń tapsyrmasyna sáikes júzege asyrylyp jatqan «Keleshek mektepteri» ulttyq jobasy men «AMANAT» partiiasynyń 2023–2027 jyldarǵa arnalǵan sailaýaldy baǵdarlamasynyń Jol kartasy aiasynda salyndy.
Mekteptiń ishki infraqurylymy qazirgi zaman talaptaryna sai jabdyqtalǵan. Bilim ordasynda pándik kabinettermen qatar STEM jáne robototehnika synyptary, inkliýzivti bilim berý ortalyǵy, kitaphana, sheberhana, sport jáne akt zaly, keń ashana men májilis zaly qarastyrylǵan.
Ashylý saltanatynda Almaty oblysynyń ákiminiń orynbasary Bolat Kúreńbekov sóz sóilep, bul nysannyń óńirdegi ózekti áleýmettik máseleniń sheshimine ainalǵanyn atap ótti.
«Bul bilim ordasy – Prezident bastamasymen júzege asyp jatqan «Keleshek mektepteri» jobasy aiasynda boi kótergen alǵashqy zamanaýi mektepterdiń biri. Memleket basshysynyń «Biz Qazaqstandaǵy barlyq balalardyń baqytty bolashaǵyn qamtamasyz etýimiz kerek» degen sózi búgingi istiń mán-mańyzyn asha túsedi», – dedi ol.
Ákimniń aitýynsha, tek ótken jyly óńirde 9 jańa mektep qoldanysqa berilse, biyl taǵy 17 nysannyń qurylysy júrgizilip jatyr. Bul baǵytta memlekettik-jekemenshik áriptestik tetikteri qoldanylyp, jeke investitsiialar da tartylýda.
Bul nátijelerge qol jetkizýde jergilikti atqarýshy organdarmen qatar, partiialyq baqylaý men saiasi qoldaýdyń da mańyzy zor. «AMANAT» partiiasy óńirlerdegi infraqurylymdyq bastamalardyń júzege asýyna tikelei aralasyp keledi.
«Eki jyl buryn biz mektep tapshylyǵy máselesin sheshemiz dep ýáde berdik. Sol kezde oblysta úsh aýysymdy 52 mektep bolǵan. Qazir bul san 30-ǵa deiin qysqardy. Jańalyqtaǵy mektep – jol kartasynda kózdelgen 63 mekteptiń qataryndaǵy naqty júzege asqan joba. Qurylys bastalǵan kúnnen bastap partiialyq baqylaýda boldy. Ýáde bergen soń, sol protsestiń ishinde bolý – bizdiń mindet», – dedi «AMANAT» partiiasy Almaty oblystyq filialynyń tóraǵasy Qýat Baiǵojaev.
Aita ketý kerek, óńirde bilim berý infraqurylymyn jańartý – «AMANAT» partiiasynyń basym baǵyttarynyń biri. Jol kartasynda belgilengen maqsattar júieli túrde oryndalyp keledi. Jańa mektepterdiń ashylýy úsh aýysymdy oqytýdy azaityp qana qoimai, muǵalimder úshin turaqty jumys oryndaryn kóbeitip, jyl saiyn myńdaǵan balaǵa qolaily oqý jaǵdaiyn jasaýǵa múmkindik berýde.
