تالدىقورعان جاستارى بولاشاقتا ءوز ءىسىن اشقىسى كەلەتىن قاتارلاستارىنا ارناپ ءتۇرلى كاسىپتەرگە ۇيرەتەتىن شەبەرلىك ساعاتتارىن وتكىزۋدى قولعا العان. ماسەلەن، ەرتەڭ «Jetisu jastary» كمم مەن جەرگىلىكتى جاس كاسىپكەر بىرلەسىپ شوكولادتاقا سالىنعان قۇلپىناي ازىرلەۋدىڭ قىر-سىرىسىن ۇيرەتەتىن شەبەرلىك ساعاتىن ۇيىمداستىرعالى وتىر، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
اتالمىش مەكەمە مۇنداي الەۋمەتتىك جوبالاردى كاسىپكەرلەرمەن بىرگە وتكەن جىلدان باستاپ وتكىزىپ كەلەدى. ءىس-شارانىڭ باستى ماقساتى – جاستاردىڭ ۋاقىتىن ءتيىمدى وتكىزۋىنە ىقپال ەتۋ، ولاردى جاڭا ماشىقتارعا بەيىمدەۋ، سونىڭ ىشىندە ءوز بيزنەسىن باستاۋىنا سەرپىن بەرۋ.
«Jetisu jastary» كمم ديرەكتورىنىڭ ورىنباسارى ەركەبۇلان اقبولاتوۆتىڭ ايتۋىنشا، وتكەن جىلدان بەرى وسىنداي 10-نان استام شەبەرلىك ساعاتى وتكىزىلگەن.
– بۇگىنگى جاستاردىڭ اراسىندا شەبەرلىك ساعاتتارىنىڭ تانىمالدىعى ارتىپ كەلەدى. مۇنداي شارالاردى بىلتىردان باستاپ وتكىزە باستادىق. بۇل جاستاردىڭ شىعارماشىلىققا، بەلگىلى ءبىر كاسىپكە دەگەن قۇلشىنىسىن ارتتىرادى. ءبىز كاسىپكەرلەرگە تەگىن شەبەرلىك ساعاتتارىن وتكىزۋ تۋرالى ۇسىنىستارىمىزدى ايتامىز.
بۇل شاراعا اسىرەسە «Zhas Project»، «تاۋەلسىزدىك جاستارى» جوبالارىمەن مەملەكەتتىك قولداۋعا يە بولعان جاستاردى تارتۋعا تىرىسامىز. جىل باسىنان بەرى وسىنداي 10-عا جۋىق شەبەرلىك ساعاتىن ۇيىمداستىرىپ، وعان 18 بەن 35 جاس ارالىعىنداعى 500-دەي ادام قاتىستى. سونىڭ ىشىندە قىش قۇمىرا جاساۋ، توقىما، بۇيىمدار جاساۋ، بەت ارلەۋ، تاعام دايارلاۋ قامتىلدى.
وسى جولى ءبىزدىڭ ۇسىنىسىمىزعا تالدىقورعاندىق كاسىپكەر شىرايلىم ساحاريانوۆا كەلىسىمىن بەردى. ول جەكە ءىسىن ءوز كۇشىمەن باستاعان. ازىرگە شەبەرلىك ساعاتىنا 20 ادام جازىلدى. ولاردىڭ دەنى ستۋدەنتتەر، بالا كۇتىمىنە بايلانىستى ۇيدە وتىرعان كەلىنشەكتەر. كاسىپكەر ساباق بارىسىندا مەرەكە قارساڭىندا ءوز قولىمەن قالاي ءتاتتى سىيلىق دايارلاۋعا بولاتىنىن كورسەتەدى. بۇل شارا جاستاردىڭ پايدالى ىسپەن شۇعىلدانۋىنا جول كورسەتە السا، ءبىزدىڭ ماقساتىمىزدىڭ ورىندالعانى، – دەيدى ە. اقبولاتوۆ.
شەبەرلىك ساعاتىن وتكىزگەلى وتىرعان 29 جاستاعى كاسىپكەر شىرايلىم ساحاريانوۆانىڭ ىسكەرلىك الەمىنە كەلگەنىنە ءبىر جىلدىڭ شاماسى بولعان. نەگىزگى ماماندىعى – ينفورماتيكا ءپانىنىڭ ءمۇعالىمى، ءوزى ءۇش بالانىڭ اناسى. بالا كۇتىمىنە بايلانىستى دەمالىستا وتىرعاندا شوكولادتقا سالىنعان قۇلپىناي دايىنداۋمەن اينالىسا باستاعان.
– باسىندا ءتۇرلى باعىتتاردا ءوزىمدى سىناپ كوردىم. سوڭىندا وسى شوكولادقا سالىنعان قۇلپىناي دايىنداۋعا توقتالدىم. ءقازىر بۇل ىسكە ابدەن ماشىقتانىپ الدىم. وعان قاجەتتى بەلگيالىق ساپالى اق شوكولادتى الماتىدان العىزامىن، قوراپتارىن دا الماتىدان ساتىپ الامىن. ەرتەڭگى شەبەرلىك ساعاتىندا بىلگەنىممەن ءبولىسىپ، قاتارلاستارىمدى پايدالى ىسكە ۇيرەتسەم دەيمىن. ونى بىردەن ۇيرەنىپ كەتۋ قيىن، دەگەنمەن بار زەيىنىن سالىپ، كىرىسسە ونىڭ قىر-سىرىن ۇعىپ الۋعا بولادى.
ەڭ باستىسى – شوكولادتى دۇرىس ەرىتە ءبىلۋ. ونى ەرتەڭگى ساباق بارىسىندا ۇيرەتەمىن. قۇلپىناي مەن شوكولادتىڭ ساپالىسىن تاڭداۋ دا ماڭىزدى. ال قۇلپىنايلى ءتاتتىنى ارلەۋگە ازداعان شىعارماشىلىق قابىلەت كەرەك، – دەدى ش. ساحاريانوۆا.
كاسىپكەردىڭ ايتۋىنشا، ونىڭ قولىنان دايىندالعان ونىمىنە دەگەن سۇرانىس مەرەكە كۇندەرى ارتا تۇسەدى ەكەن. اسىرەسە، ەر ادامدار كوپ تاسپىرىس بەرەدى دەيدى ول. شىرايلىم ءوز تاتتىلەرىن ينستاگرامداعى @chokoberry.tdk پاراقشاسى ارقىلى تۇتىنۋشىلارعا تانىستىرىپ كەلەدى.
ەسكە سالساق، اتالعان شەبەرلىك ساعاتى ەرتەڭ تالدىقورعانداعى «جەتىسۋ جاستارى» ورتالىعىنىڭ عيماراتىندا وتەدى.
