– تاكير وسپان ۇلى، قازىرگى پاندەميا كەزىندە ونلاين وقۋ جوعارى وقۋ ورىندارى ءۇشىن دە ماڭىزدى بولىپ تۇرعانى بەلگىلى. جالپى، ءوزىڭىز باسقارىپ وتىرعان وقۋ ورنى ونلاين ءبىلىم بەرۋ ىسىنە قانشالىقتى دايىن؟ ونلاين وقۋدى جەتىلدىرۋدە قانداي شارالار قابىلداپ جاتىرسىزدار؟
– ءبىزدىڭ ۋنيۆەرسيتەتتە قاشىقتان وقىتۋ جۇيەسىن بۇرىننان ىسكە اسىرىپ كەلەدى. ءبىراق ول كەزدە ستۋدەنتتەردىڭ بەلگىلى توپتارىنا عانا قاشىقتان وقىتۋ جۇيەسىن قولداندىق. وسى تۇرعىدان العاندا ءبىزدىڭ وقۋ ورنى قاشىقتان وقىتۋعا ءبىرشاما دايىن بولدى. ال پاندەميا كەزىندە وسى ماشىعىمىزدى دامىتىپ، ستۋدەنتتەرگە قاشىقتان ساپالى ءبىلىم بەرۋگە بار كۇش-جىگەرىمىزدى جۇمسادىق. وتكەن جىلعى وقۋ اياعىندا ستۋدەنتتەرىمىز بەن ماگيسترانتتارىمىز قاشىقتان وقىدى. راس، ۋنيۆەرسيتەت قابىرعاسىندا ءبىلىم الىپ جۇرگەن شاكىرتتەردى جاپپاي قاشىقتان ءبىلىم بەرۋ جۇيەسىنە كوشىرۋ ءبىز ءۇشىن دە، ءبىلىم الۋشىلار ءۇشىن دە ۇلكەن جاڭالىق، ىس-تاجىريبە بولعانى انىق. قاشىقتان وقىتۋعا قاتىستى ءبىرقاتار سۇراقتار دا تۋىندادى.
جالپى، ءبىزدىڭ قاشىقتان وقىتۋعا دايىندىعىمىز جاقسى بولاتىن. ويتكەنى ءبىزدىڭ وقۋ ورنىندا «ۋنيۆەر»، «مودۋل» دەگەن اقپاراتتىق جۇيەلەر بىرنەشە جىلدان بەرى جۇمىس ىستەپ كەلگەن-دى. ءبىراق و باستا اتالعان اقپاراتتىق جۇيەلەردەگى ستۋدەنتتەرگە قاجەتتى وقۋ ماتەريالدارى، تاپسىرمالار مەن قاجەتتى ۆيدەو ماتەريالدار جەتكىلىكسىز بولدى. وسى اقپاراتتىق جۇيەلەردى دەر كەزىندە تولتىرىپ، كەم-كەتىكتەردى رەتتەۋدىڭ ءساتى ءتۇستى. وسىلايشا، پاندەميا كەزىندە ستۋدەنتتەرگە قاشىقتان ءبىلىم بەرۋ جۇيەسىن ابىرويمەن اتقاردىق.
دەسەك تە، وسى رەتتە ەكى ماسەلەگە نازار اۋدارا كەتكەندى ءجون ساناپ وتىرمىن. بىرىنشىدەن، وسى قاشىقتان وقۋعا ۇستازدار مەن ستۋدەنتتەر قانشالىقتى دايىن بولدى دەگەن سۇراق تۋىندايدى. مويىنداۋمىز كەرەك، ونلاين ساباقتار وتكىزۋدە ىس-تاجىريبەسى بولماعان ۇستازدار قاۋىمى العاشقىدا ءبىرشاما قينالدى. بۇل كەمشىلىكتى جويۋ ءۇشىن ۇستازدار اراسىندا جەدەل ۆەبينارلار ۇيىمداستىرىپ، ونلاين وقىتۋدىڭ قىرى مەن سىرىن قىسقا مەرزىم ىشىندە ۇيرەتۋگە تۋرا كەلدى. ۆەبينارلاردان كەيىن ۇستازدارىمىز ساباقتى بەرۋگە دە، ستۋدەنتتەردىڭ العان ءبىلىمىن تەكسەرۋگە دە دايىن بولدى. وسىلايشا، ونلاين ءبىلىم بەرۋگە مۇمكىندىگىمىزدى كەڭەيتتىك.
ەكىنشى قيىندىق ستۋدەنتتەرگە بايلانىستى بولدى. جالپى، جاڭالىق پەن جاڭا تەحنولوگيانى يگەرۋدە جاستار بەلسەندى عوي. بۇل جەردە بار ماسەلە تەحنيكالىق قامتاماسىز ەتۋ مەن ينتەرنەتتىڭ جاعدايىنا بايلانىستى تۋىندادى.
وزدەرىڭىز دە بىلەسىزدەر، قازىرگى تاڭدا كەيبىر اۋىلداردا ينتەرنەت دۇرىس جۇمىس ىستەمەيدى. دەسەك تە، جاستارىمىز قولدارىنداعى ۇيالى تەلەفوندارىمەن ينتەرنەت جاقسى ۇستايتىن كورشى اۋىلدارعا، جەرگىلىكتى جەردەگى مەكتەپتەرگە بارىپ، ساباقتارىنا ونلاين رەجيمدە قاتىسىپ، ءبىلىم الۋعا ۇلكەن جاۋاپكەرشىلىكپەن قارايتىنىن كورسەتتى.
– پاندەميا كوكتەمگى سەسسيا كەزىنە تۋرا كەلدى. جاستاردى جىل بويى العان ءبىلىمىن سىناۋ بارىسىندا قيىندىقتار تۋىندامادى ما؟
– ءيا، ءبىز ءۇشىن سەسسيا وتە ماڭىزدى. جىل بويى العان ءبىلىمىنىڭ ناتيجەسىن انىقتاۋدىڭ ماڭىزى ەرەكشە. ۇستازدار قاۋىمى ونلاين ساباقتاردى وتكىزىپ، ستۋدەنتتەردىڭ تەست سۇراقتارىنا جاۋاپ بەردى. بۇل پروسەستى باقىلاۋ، جالپى سىناقتاردىڭ قالاي وتكەنىن انىقتاۋ ءۇشىن «پروكتەرەنت» جۇيەسىن ەنگىزدىك. قازىرگى تاڭدا بۇل باعىتتاعى جۇمىستاردى جەتىلدىرىپ جاتقان جايىمىز بار. «پروكتەرەنت» جۇيەسى ارقىلى وقۋ بىتىرگەن تۇلەكتەرىمىزدىڭ مەملەكەتتىك سىناقتاردى قالاي تاپسىرعانىن، ديپلومدىق جۇمىستارىن قورعاۋىن ونلاين رەجيمدە باقىلاپ ۇستازدار ءوز باعالارىن بەردى. وسىلايشا، ۋنيۆەرسيتەتتەگى سيفرلاندىرۋ جۇمىستارى پاندەميا كەزىندە بىزگە ايرىقشا كومەگىن تيگىزگەنىن ماقتانىشپەن ايتا الامىن. ارينە، الداعى ۋاقىتتا وسى جۇمىستارىمىزدى ارى قاراي جالعاستىرىپ، اقپاراتتىق جۇيەلەرىمىزدى دامىتا تۇسۋگە كۇش سالامىز.
دايىندىعىمىزدى ۇشتاي ءتۇسۋ ءۇشىن «سيفرلى پەداگوگ» دەگەن جوبامىزدى دامىتىپ جاتقان جايىمىز بار. ۆيدەودارىستەر مەن ۆەبينارلاردى قالاي دايىنداۋدىڭ ءجون-جوباسىن ۇستازدارعا ۇيرەتىپ، كورسەتۋدەمىز.
اكادەميالىق كۇنتىزبەمىزدى دە قاشىقتان وقىتۋعا ىڭعايلاپ دايىندادىق.
– جالپى، وقۋ ورىن ۇستازدارى مەن ستۋدەنتتەر قاشىقتان وقىتۋدىڭ ەرەكشەلىگىن سەزىندى مە؟
– البەتتە، ۇستازدارىمىز دا، ستۋدەنتتەرىمىز دە قاشىقتان وقىتۋدىڭ ءمان-ماڭىزىن ءتۇسىنىپ، سەزىندى دەپ نىق سەنىممەن ايتا الامىن. قاشىقتان وقىتۋدىڭ باستى ەرەكشەلىگى كۇندىزگى وقۋ سەكىلدى ستۋدەنتتەردى كۇندە وقىتىپ، كۇندە تاپسىرما بەرەتىن مۇمكىندىك جوق. سوندىقتان ءبارىمىز كەڭەسە وتىرىپ، قانشا ۋاقىت ءدارىس وقىپ، سەمينار وتكىزدىك، بالالارمەن قالاي تالقىلاۋ وتكىزۋدىڭ كەستەسىن دايىندادىق. تامىز ايىنىڭ سوڭعى اپتاسىندا ۋنيۆەرسيتەت تابالدىرىعىن اتتايىن دەپ وتىرعان ستۋدەنتتەردى قاشىقتان وقۋ جۇيەسىنە دايىندايتىن بولامىز.
– ۇستازدار قاۋىمى مۇنداي وزگەرىستەردى تەز قابىلداپ، تەز بەيىمدەلەتىنىن بىلەمىز. ال وسى قاشىقتان وقۋ جۇيەسىن ستۋدەنت جاستار قالاي قابىلدادى. پسيحولوگيالىق تۇرعىدان قانداي دا ءبىر كەدەرگىلەر بولمادى ما؟
– پاندەميا تۇتاس ەلدىڭ باسىنا تۇسكەن قيىنشىلىق بولعاننان كەيىن ۇستازدار دا، ستۋدەنتتەر دە قاشىقتان وقۋدىڭ ماڭىزىن بىردەن ءتۇسىنىپ، بۇل جۇيەنى بىردەن قابىلدادى. ەشقانداي قارسىلىق بولعان جوق. قاشىقتان وقۋ جۇيەسىنە ءبىر اي وتكەننەن كەيىن بىرنەشە رەت ستۋدەنتتەرمەن ونلاين كەزدەسۋ وتكىزدىم. سول كەزدە ولاردىڭ كوپشىلىگى ۋنيۆەرسيتەتتىڭ قابىرعاسىندا ءبىلىم العاننان ىڭعايلى ەكەنىن ايتتى. ولار ونلاين وقۋ بارىسىندا ۋاقىتتارىن ءتيىمدى پايدالانىپ، وقۋعا دەگەن جاۋاپكەرشىلىگى ارتقاندارىن العا تارتتى. بۇرىندارى كوپ ىشىندە جۋساننان الاسا، بەتەگەدەن بيىك بولىپ جۇرگەن ستۋدەنتتەر وقۋ وقىپ، ءوزىن-وزى كورسەتكەن. وسىلايشا، ونلاين وقۋ ءاربىر ستۋدەنتتىڭ وقۋ وقىپ، ءبىلىم الۋعا دەگەن جاۋاپكەرشىلىگىن ارتتىردى.
ال ونلاين وقۋدىڭ ۇناماعان جاقتارى رەتىندە ستۋدەنتتەر «كۇندەلىكتى وقۋعا بارىپ، دوستارىمىزبەن ارالاسىپ، ۇستازدارىمىزبەن اقىلداسىپ تۇرۋشى ەدىك. ءبىز ونلاين وقۋ كەزىندە وسىنداي ادامي قاتىناستاردىڭ ماڭىزدى ەكەنىن تۇسىندىك» دەپ ءوز ويلارىن جاسىرماي ايتتى. ءبىراق جاستار قاشىقتان وقىتۋ ەلىمىزدىڭ اماندىعى ءۇشىن قاجەتتى شارا ەكەنىن ءتۇسىنىپ وتىر.
– جاقىندا عانا مەكتەپ ءبىتىرۋشى تۇلەكتەر ۇبت تاپسىرىپ، جوعارى وقۋ ورىندارىنا تۇسۋگە تالپىنىس جاسادى. بيىل اباي اتىنداعى قازۇپۋ قانشا ءبىلىم گرانتىنا يە بولدى؟ يە بولعان گرانتتارىڭىز قوعامنىڭ سۇرانىسىمەن ۇيلەسە مە؟
– مەملەكەتتىك گرانتتى جەڭىپ العان بالا قاي وقۋ ورنىندا ءبىلىم الاتىنىن ءوزى تاڭدايدى. سوندىقتان وقۋ ورىندارىنا ارنايى گرانت بولىنبەيدى.
اباي اتىنداعى قازۇپۋ ەلىمىزدەگى پەداگوگيكالىق مامانداردى دايارلايتىن كوشباسشى وقۋ ورىنى بولعاندىقتان، ۇستاز بولۋدى ارمانداعان جاستار ءبىزدىڭ ۋنيۆەرسيتەتتە ءبىلىم العاندى ءجون سانايدى.
بيىل رەسپۋبليكا بويىنشا جالپى 53 800 مەملەكەتتىك گرانت بولىنسە، سونىڭ 7 700ء-ىن پەداگوگيكالىق ماماندىقتاردى قۇراپ وتىر. وسىلايشا، مەملەكەتىمىز بولاشاق پەداگوگ ماماندار دايارلاۋ ىسىنە ايرىقشا كوڭىل بولۋدە. اباي اتىنداعى ءقازۇپۋ-دى قانشا گرانت يەلەرى تاڭدايتىنىن كونكۋرس وتكەننەن كەيىن انىقتالادى. دەسەك تە، جىل سايىن مەملەكەتتىك گرانتتى ۇتقان 1500 جاس ءبىزدىڭ وقۋ ورنىن تاڭدايتىنىن بىلەمىز. بيىل دا وسى دەڭگەيدە گرانت ۇتقان جاستاردى قابىلدايمىز دەپ جوسپارلاۋدامىز.
– الداعى ۋاقىتتا پەداگوگيكالىق ماماندىقتار بويىنشا وقۋعا تۇسەتىن تالاپكەرلەردى مۇعالىمدىك تالانتىنا قاراي ىرىكتەۋ جۇيەسى ەنگىزىلەدى دەگەندى قۇلاعىمىز شالىپ قالىپ ەدى. بۇل ىرىكتەۋ قالاي جۇرگىزىلەدى؟
– وسىدان بىرنەشە جىل بۇرىن قوعامدا پەداگوگيكالىق ماماندىقتاردى تاڭداعان بالالاردىڭ بولاشاقتا ۇستاز بولۋعا دەگەن ەركى، بەيىمى بار ما دەگەن سۇراق تۋىنداعان بولاتىن. ءبىلىم زاڭىنا وزگەرىس ەنگەننەن كەيىن پەداگوگيكالىق ماماندىقتى تاڭداعان تالاپكەرلەردىڭ ءبارى ارنايى سىناق تاپسىرۋدى باستاعان بولاتىن.
مىنە، سودان بەرى ءبىزدىڭ ۋنيۆەرسيتەت سول سىناقتى جىلدا ۇيىمداستىرىپ كەلەدى. سىناق بارىسىندا تالاپكەرلەردىڭ بولاشاقتا ۇستاز بولۋعا پسيحولوگيالىق تۇرعىدان بەيىمىن، پەداگوگيكانى قانشالىقتى تۇسىنەدى جانە پەداگوگيكالىق شەشىمدەردى قابىلداۋعا بەيىمى بار ما دەگەن سۇراقتار توڭىرەگىندەگى سۇراقتارعا جاۋاپ بەرەدى.
بيىل جاعداي وزدەرىڭىزگە ءمالىم. جاستاردىڭ باسىن جيناپ، ونداي سىناق وتكىزۋگە بولمايدى. ءبىراق ولاردىڭ وسى سىناقتى ونلاين رەجيمدە تاپسىرۋىنا مۇمكىندىك بەرىپ وتىرمىز. كۇنى بۇگىنگە دەيىن پەداگوگيكالىق ماماندىقتى تاڭداعان 10 مىڭنان استام تالاپكەر وسى سىناقتى تاپسىرىپ ۇلگەرگەن.
– تاكير وسپان ۇلى، ءسوزىڭىزدى بولەيىن. بۇل سىناقتى اباي اتىنداعى ءقازۇپۋ-دى تاڭداعان تۇلەكتەر عانا تاپسىرا ما الدە جالپى پەداگوگ ماماندار دايىندايىن وقۋ ورىندارىندا وسىنداي سىناق بولا ما؟
– بۇل سىناق ءبىلىم زاڭىندا اتاپ كورسەتىلگەندىكتەن، بارلىق پەداگوگيكالىق وقۋ ورىندارىندا ۇيىمداستىرىلادى.
وسى رەتتە مىنا ءبىر ماسەلەنى ايتا كەتۋ كەرەك. اڭگىمە اراسىندا ءبىزدىڭ ۋنيۆەرسيتەتكە پەداگوگيكالىق بەيىمدىلىگىن انىقتاۋ بويىنشا 10 مىڭنان استام بالا سىناق تاپسىرعانىن ايتتىم عوي. سىناقتى جاقسى تاپسىرعان بالالاردىڭ ءبارى ءبىزدىڭ وقۋ ورىنعا تۇسپەيدى. ولاردىڭ اراسىندا باسقا وقۋ ورىندارىن دا تاڭدايتىن تالاپكەرلەر بار. ءبىزدىڭ ۋنيۆەرسيتەت ولارعا وسى سىناقتى ونلاين تاپسىرۋعا مۇمكىندىك تۋعىزعان سوڭ، ولار وسى مۇمكىندىكتى پايدالاندى.
– ايتپاقشى، ستۋدەنتتەرگە بولىنەتىن مەملەكەتتىك گرانت 2011 جىلدان بەرى ءالى ءبىر تيىنعا وسپەگەنىن ەستىپ ەدىك. سول راس پا؟ بۇگىنگىدەي ينفلياسيا جاعدايىندا ءاربىر شاكىرتكە 448 مىڭ تەڭگە ءبولۋ از ەمەس پە؟
– بۇل ماسەلە بىرنەشە جىلدان بەرى جوعارى ءبىلىم بەرۋ سالاسىنداعى وزەكتى ماسەلەلەردىڭ بىرىنە اينالعان ەدى. جالپى، مۇنى دۇرىس بايقاعانسىز. ءبىراق بيىلدان باستاپ مەملەكەتتىك گرانتتىڭ قارجىسى ءوستى. ايتالىق، وسىعان دەيىن جاي ۋنيۆەرسيتەتتەگى گرانتتاردىڭ كولەمى 448 مىڭ تەڭگە بولسا، ۇلتتىق ستاتۋسى بار ءبىز سياقتى ۋنيۆەرسيتەتتەردەگى گرانتتىڭ مولشەرى 635 مىڭ تەڭگە بولدى. بيىل وسى ماسەلە وڭ شەشىمىن تاۋىپ، 448 تەڭگەنىڭ گرانتتارى 901 مىڭ تەڭگەگە، ال ۇلتتىق ۋنيۆەرسيتەتتەردەگى گرانتتىڭ قۇنى 1 082 000 تەڭگەگە دەيىن ۇلعايدى.
– وسى مەملەكەتتىك گرانتتىڭ قارجىسى قانداي شىعىندارعا جۇمسالاتىنىن تارقاتىپ ايتىپ بەرسەڭىز؟
– مەملەكەتتىك گرانتتىڭ قارجىسى وقىتۋشىلاردىڭ جالاقىسىنا، وقۋ بارىسىن ۇيىمداستىرۋ ىسىنە، وقۋ ورىن عيماراتى مەن جاتاقحانالاردى ۇستاۋعا جانە وقۋ ىسىنە قاجەتتى جابدىقتار مەن جاڭا تەحنولوگيالار الۋعا جۇمسالادى. وسى رەتتە ايتا كەتۋىمىز كەرەك، جاتاقحاناعا تەك ەكسپلۋاتاسياسى ءۇشىن عانا بولىنەدى. ال قالعان جاتاقحانانىڭ جارىعى، جىلۋىنا ستۋدەنتتەردىڭ جامباسپۇلىنان تۇسكەن قارجى جۇمسالادى. بىزدە جاتاقحانانىڭ جامباسپ ۇلى ارزان، جىلىنا 30 مىڭ تەڭگەنىڭ كولەمىندە.
– اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باستاماسىمەن «ءبىلىم بەرۋ اليانسى» كونسورسيۋمى قۇرىلىپ، ونىڭ قۇرامىنا وبلىستار مەن استانا، الماتى، شىمكەنت قالالارىنىڭ ءبىلىم بەرۋ باسقارمالارى كىرگەن بولاتىن. بۇل كونسورسيۋمنىڭ قانداي جۇمىسپەن اينالىساتىنىن تارقاتىپ ايتىپ بەرسەڭىز؟
– 2018 جىلى وبلىستىق ءبىلىم ءبولىمى باسقارمالارىمەن بىرلەسىپ «ءبىلىم بەرۋ اليانسى» كونسورسيۋمىن قۇرۋداعى نەگىزگى ماقساتىمىز مەكتەپ ءبىتىرۋشى تۇلەكتەرگە كاسىبي باعدار بەرىپ، جۇرەك قالاۋىمەن پەداگوگيكالىق ماماندىقتى تاڭداۋىنا كومەك كورسەتۋ بولاتىن. وسى كونسورسيۋمنىڭ ارقاسىندا كوپتەگەن جاستار وزدەرى سۇرانىستاعى ماماندىقتارى جايىندا مول اقپارات الىپ، دۇرىس تاڭداۋ جاساۋىنا مۇمكىندىك الدى.
بۇگىندە كونسورسيۋمنىڭ جۇمىس اۋقىمى كەڭەيە ءتۇستى. قازىرگى تاڭدا ۇيىم اياسىندا وبلىستىق ءبىلىم باسقارمالارى وزدەرىنە قاجەتتى پەداگوگيكالىق ماماندىقتار جايىندا بىزگە سۇرانىس تۇسىرەتىن بولدى. بىزدەر وسى ۇسىناستاردى پايدالانىپ، وقۋ بىتىرگەن جاستارىمىزدى جۇمىسپەن قامتىپ وتىرعان جايىمىز بار. وسىلايشا، از عانا ۋاقىتتىڭ ىشىندە كونسورسيۋم جاستارعا كاسىبي باعدار بەرەتىن جانە وقۋ بىتىرگەن جاس ماماندارعا جۇمىس تاۋىپ بەرەتىن پايدالى ۇيىمعا اينالدى.
بيىلدىڭ وزىندە نۇر-سۇلتان مەن الماتى قالاسىنان جانە الماتى، جامبىل وبلىستارىنان 4 مىڭ جاس مامانعا سۇرانىس جاسالىندى. وسى سۇرانىستى قاناعاتتاندىرۋ ءۇشىن وزگە دە وقۋ ورىندارىنىڭ تۇلەكتەرىن تارتىپ، جاستاردىڭ جۇمىسقا قابىلداۋىنا جاعداي جاساعانىمىزدى ماقتانىشپەن ايتا الامىز.
الداعى ۋاقىتتا «ءبىلىم بەرۋ اليانسى» كونسورسيۋمى اياسىندا ستۋدەنت جاستاردىڭ مەكتەپتەردە وندىرىستىك تاجىريبەدەن ءوتىپ، ودان كەيىن اراداعى بايلانىستارىن جانداندىرا ءتۇسۋ ماسەلەسىن دە شەشۋدى ويلاستىرىپ وتىرمىز.
سونىمەن قاتار كەلەشەكتە ەلىمىزدەگى پەداگوگيكالىق وقۋ ورىنداردىڭ باسىن وسى كونسورسيۋم اياسىندا بىرىكتىرىپ، ورتاق ماسەلەلەرىمىزدى بىرلەسىپ شەشپەك ويىمىز دا بار.
– ق ر «پەداگوگ مارتەبەسى تۋرالى» زاڭى قابىلدانعانىن بىلەمىز، ءبىلىم بەرۋ سالاسىندا ۇزاق جىل جۇمىس ىستەگەن تاجىريبەلى مامان رەتىندە وسى زاڭ جوباسىنا قاتىستىڭىز با؟ جالپى، بۇل زاڭ ۇستازدار مارتەبەسىن قانشالىقتى كوتەرەدى؟
– كەزىندە ەلباسى نۇرسۇلتان نازاربايەۆ وسى ۇستازدار مارتەبەسىنە قاتىستى زاڭ جوباسىن دايىنداۋ تۋرالى ۇسىنىس تاستاعاندا بىزدەر قاتتى قۋاندىق. ويتكەنى قوعامداعى ۇستازدار قاۋىمىنىڭ ورىنى جايىندا كوپ ايتىلعان ەدى. ءبىزدىڭ وقۋ ورىننىڭ عالىمدارى بۇل زاڭنىڭ ءمانى مەن مازمۇنىن جەتە ءتۇسىنىپ، ءوز ۇسىنىستارىن تولىقتاي قاعازعا ءتۇسىرىپ، پەداگوگ مامانداردىڭ مارتەبەسى تۋرالى زاڭنىڭ العاشقى نۇسقاسىن ق ر ءبىلىم جانە عىلىم مينيسترلىگىنە جولدادى. وسىلايشا، ۋنيۆەرسيتەت ماماندارى بۇل ماسەلە كوتەرىلگەن كۇننەن باستاپ جاڭا زاڭدى دايىنداۋعا بەلسەندى تۇردە ارالاستى.
وسى زاڭعا قاتىستى ەكى ماسەلەنى ايتا كەتۋدى ءجون ساناپ وتىرمىن. بىرىنشىدەن، ق ر «پەداگوگ مارتەبەسى تۋرالى» زاڭىنىڭ قابىلدانۋى ءبىزدىڭ قوعام ءۇشىن ۇلكەن وقيعا دەپ باعالايمىن. ويتكەنى بىزدەر وسى زاڭدى قابىلداپ، ەلىمىزدە ۇستازداردىڭ ەڭبەگىن قالاي باعالايتىنىمىزدى كورسەتىپ بەردىك. مۇنداي ارنايى زاڭ كوپتەگەن ەلدەردە جوق. بىزدەر بۇل زاڭ ارقىلى ەلىمىزدە ءبىلىم بەرۋ ءىسىنىڭ باسىم باعىتتارىنىڭ ءبىرى ەكەنىن قولمەن قويعانداي كورسەتىپ بەردىك.
ەكىنشىدەن، زاڭ ارقىلى ۇستازداردىڭ قۇقىقتارى مەن مىندەتتەرىن اشىق كورسەتىلگەندىكتەن، جاڭا زاڭ قازاقستاننىڭ مۇعالىمدەرىنە ۇلكەن جەڭىلدىك اكەلدى دەپ نىق سەنىممەن ايتا الامىن.
زاڭدا ۇستازداردى بوتەن جۇمىسقا ارالاستىرۋعا تىيىم سالىناتىنى تايعا تاڭبا باسقانداي انىق كورسەتىلدى. وتكەن جىلى مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس الداعى ءتورت جىلدا ەلىمىزدەگى ۇستازداردىڭ ايلىعى ەكى ەسە كوبەيەتىن بولدى. بۇدان باسقا ءقازىر پەداگوگيكالىق وقۋ ورىندارىندا ءبىلىم الىپ جاتقان ستۋدەنتتەردىڭ ستيپەندياسىن 1،5 ەسەگە كوتەرۋ – قوعامدا پەداگوگ مامانداردىڭ مارتەبەسىن كوتەرۋگە باعىتتالعان ماڭىزدى شارا دەپ ەسەپتەيمىن.
الداعى بىرنەشە جىلدا جاڭا زاڭ ۇستازداردىڭ كاسىبي دەڭگەيى مەن الەۋمەتتىك جاعدايىنىڭ جوعارىلاۋىنا كەشەندى تۇردە اسەر ەتەتىنە سەنىمدىمىن.
– مەملەكەت باسشىسى قاسىم-جومارت توقايەۆ وقۋلىقتاردى سيفرلى فورماتقا كوشىرۋدى تەزدەتۋدى تاپسىرعانىن بىلەمىز. بۇل باعىتتاعى جۇمىستار قازۇپۋ-دا قالاي ىسكە اسىپ جاتىر؟
– ەلىمىزدەگى جوعارى وقۋ ورىندارى وقۋلىقتاردى سيفرلى فورماتقا كوشىرۋ ماسەلەسىمەن اينالىسىپ جاتىر. بۇل باعىتتاعى جۇمىستارعا دايىنبىز، ءارى جۇزەگە اسىرۋدامىز. جوعارى وقۋ ورىندارىندا ەلەكتروندى وقۋلىقتاردى پايدالانۋ مەكتەپتەرمەن سالىستىرعاندا ءبىرشاما جەڭىل. ستۋدەنتتەر ەلەكتروندى وقۋلىقتاردى قالاۋىنشا پايدالانۋدا. مۇنداي وقۋلىقتار بىزدە بار.
ەگەر مەكتەپ وقۋلىقتارىن تولىقتاي ەلەكتروندى فورماتقا كوشىرەتىن بولساق، بۇدان كەيىن سول وقۋلىقتاردى پايدالاناتىن پلانشەت سەكىلدى وزگە دە قۇرىلعىلارمەن وقۋشىلاردى قامتاماسىز ەتۋىمىزگە تۋرا كەلەدى. دەسەك تە، وقۋلىقتاردى سيفرلى فورماتقا كوشىرۋدىڭ ماڭىزى زور ەكەنىنە پاندەميا كەزىندە كوزىمىز انىق جەتە ءتۇستى.
بۇگىندە ءبىزدىڭ ۋنيۆەرسيتەتتەردىڭ ءبىراز عالىمدارى ورتا ءبىلىم سالاسىنا ارناپ وقۋلىق جازادى. سوندىقتان الداعى ۋاقىتتا سيفرلى وقۋلىقتاردىڭ بولۋى كەرەك ەكەنىن قولدايمىز. مۇنداي وقۋلىقتار مەملەكەتتىڭ قىرۋار قاراجاتىن ۇنەمدەيدى. سوندىقتان بۇل باعىتتاعى جۇمىستار الداعى ۋاقىتتا جالعاسىن تابا بەرەدى.
سۇحباتتاسقان نۇرلان جۇماحان.
