شىعىس قازاقستان وبلىسىنىڭ اكىمى نۇرىمبەت ساقتاعانوۆ جۇمىس ساپارىمەن ومبى قالاسىنا بارىپ، ومبى وبلىسىنىڭ گۋبەرناتورى ۆيتاليي حوسەنكومەن كەزدەسۋ وتكىزدى. كەلىسسوز بارىسىندا تاراپتار ەكىجاقتى ىنتىماقتاستىقتى نىعايتۋعا باعىتتالعان ءبىرقاتار ستراتەگيالىق ماسەلەلەردى تالقىلادى،- دەپ حابارلايدى Dalanews.kz
ءوڭىر باسشىلارى ساۋدا-ەكونوميكالىق، عىلىمي-تەحنيكالىق، الەۋمەتتىك-گۋمانيتارلىق جانە مادەني بايلانىستاردى ودان ءارى دامىتۋعا نيەتتى ەكەندەرىن راستادى. كەزدەسۋ بارىسىندا جاستار مەن گۋمانيتارلىق باستامالاردى جانداندىرۋ، مادەني-تاريحي ءتۋريزمدى دامىتۋ بويىنشا بىرلەسكەن جۇمىس توبىن قۇرۋ جانە 2028 جىلعا دەيىنگى ەكىجاقتى ءىس-شارالار جوسپارىن ازىرلەۋ ماسەلەلەرىنە ەرەكشە كوڭىل ءبولىندى.
تالقىلانعان نەگىزگى تاقىرىپتاردىڭ ءبىرى – جۇڭگو حالىق رەسپۋبليكاسىنان باستالاتىن جانە شىعىس قازاقستان ارقىلى ءوتىپ، اباي جانە پاۆلودار وبلىستارىن، ومبى وبلىسى مەن باسقا دا رەسەيلىك وڭىرلەردى قامتي وتىرىپ، سولتۇستىك مۇزدى مۇحيتقا دەيىن جەتەتىن كەمە جۇرەتىن جاڭا باعىت اشۋ بولدى.
سونداي-اق رەسەيلىك ينۆەستورلاردىڭ شىعىس قازاقستاندا جۇزەگە اسىرىلاتىن جوبالارعا قاتىسۋ مۇمكىندىكتەرى ءسوز بولدى. نۇرىمبەت ساقتاعانوۆ رەسەيلىك سەرىكتەستەردى «Altay Invest-2025» حالىقارالىق ينۆەستيسيالىق فورۋمىنا قاتىسۋعا شاقىردى. بۇدان بولەك، ءبىلىم بەرۋ، دەنساۋلىق ساقتاۋ جانە سپورت سالالارىنداعى ىنتىماقتاستىقتىڭ بولاشاعى تالقىلاندى.
ساپار سوڭىندا قازاقستاندىق دەلەگاسيا ومبى قالاسىنىڭ 309 جىلدىعىنا ارنالعان سالتاناتتى ءىس-شارالارعا قاتىستى.
