رەسەيدىڭ كورشىلەس شەكارالىق وڭىرىنەن كەلگەن دەلەگاسيا «ۆو ۆسە ۆەكا» حالىقارالىق گاسترولدىك جوباسى اياسىندا وسكەمەندە ۇلى جەڭىستىڭ 80 جىلدىعىنا ارنالعان ءبىرقاتار ءىس-شارالار وتكىزەدى.
دەلەگاسيا مۇشەلەرى شىعىس قازاقستان وبلىسى اكىمدىگىندە قابىلداندى. جيىن بارىسىندا ەكىجاقتى ىنتىماقتاستىقتىڭ وزەكتى ماسەلەلەرى مەن باسىم باعىتتارى تالقىلاندى.
شقو اكىمى نۇرىمبەت ساقتاعانوۆپەن كەزدەسۋدەن كەيىن دەلەگاسيا ساپار باعدارلاماسى بويىنشا جۇمىستارىن جالعاستىردى.
– ءبىز رەسەي فەدەراسياسىنىڭ جەتى وڭىرىمەن تىعىز بايلانىستامىز. الايدا التاي ولكەسىمەن قارىم-قاتىناسىمىز ەرەكشە، سەبەبى ءبىز تاريحي ءارى گەوگرافيالىق تۇرعىدان ءوزارا تىعىز بايلانىسقان ايماقپىز. ءبىز ءاردايىم ارىپتەستىك رۋحتا جۇمىس ىستەپ كەلەمىز جانە بىر-بىرىمىزدەن ۇيرەنەرىمىز كوپ، – دەدى شقو اكىمىنىڭ ورىنباسارى ەربول نۇرعالييەۆ.
ول شقو كورشىلەس دوستىق قارىم-قاتىناستى ساقتاپ، دامىتۋعا مۇددەلى ەكەنىن ايتىپ، ءوزارا ءتيىمدى ءوڭىرارالىق ىنتىماقتاستىقتىڭ نەگىزگى باعىتتارىنا توقتالدى. اتاپ ايتقاندا، ونەركاسىپ، تۋريزم، مادەنيەت جانە سپورت سالالارى نازاردا تۇر.
التاي ولكەسى ۇكىمەتى ءتوراعاسىنىڭ ورىنباسارى ۆيتاليي سنەسار كورسەتىلگەن قوناقجايلىلىق ءۇشىن العىسىن ءبىلدىرىپ، اتالعان سالالاردىڭ بارلىعىندا ىنتىماقتاستىق ورناتۋعا دايىن ەكەنىن جەتكىزدى.
ۇ
سونداي-اق، ول التاي ولكەسىنىڭ «ءبىزدىڭ ورتاق ءۇيىمىز – التاي» حالىقارالىق ۇيلەستىرۋ كەڭەسىندەگى ءتوراعالىعىن شقو-عا تابىستاۋعا ءازىر ەكەنىن مالىمدەدى. بۇل بىرلەستىك قۇرامىنا رەسەي، موڭعوليا، جۇڭگو جانە قازاقستان كىرەدى.
– ءبىز وسى كەڭەستەگى ءتوراعالىعىمىزدى اياقتاپ جاتىرمىز. ەندى باستامانى جالعاستىرۋ كەزەگى شىعىس قازاقستان وبلىسىنا كەلىپ وتىر، – دەدى ۆيتاليي سنەسار.
ايتا كەتەيىك، ساپار بارىسىندا دەلەگاسيا مۇشەلەرى «جەڭىس» مەموريالدىق كەشەنىنە بارىپ، ۇلى وتان سوعىسىندا قازا تاپقان جاۋىنگەرلەرگە ارنالعان ماڭگىلىك الاۋعا گۇل شوقتارىن قويدى. ال كەشكە «ەرتىس كونسەرت» ساحناسىندا «ۆو ۆسە ۆەكا» اتتى كونسەرتتىك باعدارلاما وتەدى. شاراعا ە. بوريسوۆ اتىنداعى التاي مەملەكەتتىك ورىس حالىق اسپاپتارى وركەسترى، ا. بەرەزيكوۆ اتىنداعى «التاي» مەملەكەتتىك جاستار ءان-بي ءانسامبلى جانە قازاقستاندىق سوليست-ارتىستەر قاتىسادى.
