Reseidiń kórshiles shekaralyq óńirinen kelgen delegatsiia «Vo vse veka» halyqaralyq gastroldik jobasy aiasynda Óskemende Uly Jeńistiń 80 jyldyǵyna arnalǵan birqatar is-sharalar ótkizedi.
Delegatsiia músheleri Shyǵys Qazaqstan oblysy ákimdiginde qabyldandy. Jiyn barysynda ekijaqty yntymaqtastyqtyń ózekti máseleleri men basym baǵyttary talqylandy.
ShQO ákimi Nurymbet Saqtaǵanovpen kezdesýden keiin delegatsiia sapar baǵdarlamasy boiynsha jumystaryn jalǵastyrdy.
– Biz Resei Federatsiiasynyń jeti óńirimen tyǵyz bailanystamyz. Alaida Altai ólkesimen qarym-qatynasymyz erekshe, sebebi biz tarihi ári geografiialyq turǵydan ózara tyǵyz bailanysqan aimaqpyz. Biz árdaiym áriptestik rýhta jumys istep kelemiz jáne bir-birimizden úirenerimiz kóp, – dedi ShQO ákiminiń orynbasary Erbol Nurǵaliev.
Ol ShQO kórshiles dostyq qarym-qatynasty saqtap, damytýǵa múddeli ekenin aityp, ózara tiimdi óńiraralyq yntymaqtastyqtyń negizgi baǵyttaryna toqtaldy. Atap aitqanda, ónerkásip, týrizm, mádeniet jáne sport salalary nazarda tur.
Altai ólkesi Úkimeti tóraǵasynyń orynbasary Vitalii Snesar kórsetilgen qonaqjailylyq úshin alǵysyn bildirip, atalǵan salalardyń barlyǵynda yntymaqtastyq ornatýǵa daiyn ekenin jetkizdi.
Sondai-aq, ol Altai ólkesiniń «Bizdiń ortaq úiimiz – Altai» halyqaralyq úilestirý keńesindegi tóraǵalyǵyn ShQO-ǵa tabystaýǵa ázir ekenin málimdedi. Bul birlestik quramyna Resei, Mońǵoliia, Qytai jáne Qazaqstan kiredi.
– Biz osy keńestegi tóraǵalyǵymyzdy aiaqtap jatyrmyz. Endi bastamany jalǵastyrý kezegi Shyǵys Qazaqstan oblysyna kelip otyr, – dedi Vitalii Snesar.
Aita keteiik, sapar barysynda delegatsiia músheleri «Jeńis» memorialdyq keshenine baryp, Uly Otan soǵysynda qaza tapqan jaýyngerlerge arnalǵan Máńgilik alaýǵa gúl shoqtaryn qoidy. Al keshke «Ertis kontsert» sahnasynda «Vo vse veka» atty kontserttik baǵdarlama ótedi. Sharaǵa E. Borisov atyndaǵy Altai memlekettik orys halyq aspaptary orkestri, A. Berezikov atyndaǵy «Altai» memlekettik jastar án-bi ansambli jáne qazaqstandyq solist-ártister qatysady.
