بيىلعى جىلعى ماۋسىمنىڭ اياقتالۋىنا وراي ايماقتا ءبىرقاتار شارالار ءوتتى. سونىڭ ىشىندە، ءار ايماقتان كەلگەن 100-دەن استام وكىل جانە شىعىسقازاقستاندىق «جاسىل ەل» جاستار قوزعالىسىنىڭ مۇشەلەرى «Green city» اتتى تيمبيلدينگتە باس قوسىپ، تاجىريبە الماستى. كەيىن «قازاقستانداعى جاسىل تەحنولوگيا دامۋى» تاقىرىبىندا پىكىر تالاسىپ، ويلارىمەن ءبولىستى.
– «جاسىل ەل» قاتارىنا قوسىلىپ جاتقان جاستاردىڭ سانى ءار جىل سايىن ءوسىپ كەلەدى. بيىلعى ماۋسىمنىڭ وزىنە 18 مىڭنان استام بەلسەندى قاتىستى. بۇگىنگى كۇنى الەمدە جاسىل تەحنولوگيا، جاسىل ەكونوميكا ماسەلەرى وزەكتى بولعاندىقتان، وسىنداي ءىرى باعدارلامالار قولعا العان جوبالار ىسكە اسۋى قاجەت، – دەدى ق ر ءدىن جانە ازاماتتىق قوعام مينيسترلىگىنىڭ جاستار ساياساتى جونىندەگى دەپارتامەنت ديرەكتورى عابيدۋللا وسپانقۇلوۆ.
ماۋسىم قورىتىندىسىنا ارنالعان شارالار سالتاناتتى جيىنمەن جالعاسىن تاپتى. بيىلعى ماۋسىمدا ۇزدىك بولىپ تانىلعان «جاسىل ەل» مۇشەلەرىن ماراپاتتاعان شقو ىشكى ساياسات باسقارماسىنىڭ باسشىسى نەللي كراسنوبايەۆا اتالمىش قوزعالىستى جاستاردىڭ قولدايتىندىعىنا سەنىمدى ەكەنىن جەتكىزدى.
