تۇركىستان وبلىسىندا جەتى اۋدان مەن قالادا 11 ورتالىقتاندىرىلعان جىلىتۋ قازاندىقتارى جۇمىس ىستەيدى. وڭىردە 600-گە جۋىق كوپقاباتتى تۇرعىن ءۇي مەن 2،5 مىڭعا جۋىق بيۋدجەتتىك مەكەمە ورتالىق جىلىتۋ جۇيەسىنە قوسىلعان. ولاردىڭ 85 % جىلىتۋ ماۋسىمىنا دايىن.
قاتتى وتىنمەن قامتۋ جۇمىستارى دا جۇزەگە اسۋدا. قىركۇيەكتىڭ 1-نە دەيىن بارلىق جۇمىستار تولىق اياقتالادى.
سونداي-اق، تۇركىستان قالاسىنداعى جاڭادان سالىنعان تۇرعىن ۇيلەر ءۇشىن 9 قازاندىق ورناتىلۋدا جانە №1، 2 شاعىن اۋداندارداعى جىلۋمەن جابدىقتاۋ جەلىلەرىن جاڭارتۋ جۇمىستارى جۇرگىزىلىپ جاتىر.
اپپارات وتىرىسىندا وبلىس اۋماعىنداعى كوروناۆيرۋس ينفەكسياسى مەن سانيتارلىق-ەپيدەميولوگيالىق جاعداي جانە ءموبيلدى توپتاردىڭ جۇمىستارىنىڭ ناتيجەلەرى تۋرالى سوڭعى مالىمەتتەر ورتاعا سالىندى.
تۇركىستان وبلىسى كوروناۆيرۋس اۋرۋشاڭدىعىنىڭ كورسەتكىشى بويىنشا جاسىل ايماقتا ورنالاسقان. ناۋقاستار سانى بويىنشا وبلىس رەسپۋبليكادا تومەن كورسەتكىشتە. كوروناۆيرۋستان ايىققانداردىڭ سانى ارتىپ، بۇقارانىڭ كوڭىلىندەگى ۇرەيدىڭ سەيىلە باستاعانىنا قاراماستان، بوساڭسۋعا بولمايدى. وسىلاي دەگەن ءومىرزاق ەستاي ۇلى ءتاجتاجالدان ساقتانۋ ءۇشىن كارانتين تالاپتارىنىڭ قاتاڭ ساقتالۋىن ەسكەرتتى.
