Aldaǵy jylytý maýsymyna daıyndyq jumystarynyń barysy Túrkistan oblysynyń ákimi Ómirzaq Shókeevtiń tóraǵalyǵymen ótken aptalyq apparat otyrysynda pysyqtaldy. Mańyzdy másele – baqylaýda. Jylý berý kezeńine daıyndyq barysymen tanysqan oblys ákimi jaýapty basshylarǵa jumys qarqynyn kúsheıtýdi tapsyrdy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Túrkistan oblysynda jeti aýdan men qalada 11 ortalyqtandyrylǵan jylytý qazandyqtary jumys isteıdi. Óńirde 600-ge jýyq kópqabatty turǵyn úı men 2,5 myńǵa jýyq búdjettik mekeme ortalyq jylytý júıesine qosylǵan. Olardyń 85 % jylytý maýsymyna daıyn.

Qatty otynmen qamtý jumystary da júzege asýda. Qyrkúıektiń 1-ne deıin barlyq jumystar tolyq aıaqtalady.

Sondaı-aq, Túrkistan qalasyndaǵy jańadan salynǵan turǵyn úıler úshin 9 qazandyq ornatylýda jáne №1, 2 shaǵyn aýdandardaǵy jylýmen jabdyqtaý jelilerin jańartý jumystary júrgizilip jatyr.

Apparat otyrysynda oblys aýmaǵyndaǵy koronavırýs ınfeksıasy men sanıtarlyq-epıdemıologıalyq jaǵdaı jáne mobıldi toptardyń jumystarynyń nátıjeleri týraly sońǵy málimetter ortaǵa salyndy.

Túrkistan oblysy koronavırýs aýrýshańdyǵynyń kórsetkishi boıynsha jasyl aımaqta ornalasqan. Naýqastar sany boıynsha oblys respýblıkada tómen kórsetkishte. Koronavırýstan aıyqqandardyń sany artyp, buqaranyń kóńilindegi úreıdiń seıile bastaǵanyna qaramastan, bosańsýǵa bolmaıdy. Osylaı degen Ómirzaq Estaıuly tájtajaldan saqtaný úshin karantın talaptarynyń qatań saqtalýyn eskertti.