قارجى مونيترينگى اگەنتتىگىنىڭ شىمكەنت قالاسى بويىنشا دەپارتامەنتى پروكۋراتۋرانىڭ ۇيلەستىرۋىمەن "ايالا گولد" قارجى پيراميداسىنىڭ قىزمەتىن توقتاتتى. زەرگەرلىك بۇيىمداردى ساتاتىن كومپانيا رەتىندە وزدەرىن بۇركەمەلەگەن كۇدىكتىلەر ازاماتتارعا اي سايىن 50–60% كولەمىندە كەپىلدەندىرىلگەن تابىس ۋادە ەتىپ، ينۆەستيسيا سالۋدى ۇسىنعان.  تولەمدەر ناقتى پايدا ەسەبىنەن ەمەس، جاڭا قاتىسۋشىلاردان تۇسكەن قاراجات ەسەبىنەن جۇزەگە اسىرىلعان، دەپ حابارلايدى Dalanews.kz.

"سالدارىنان قارجىلىق پيراميداعا 400-دەن استام سالىمشى تارتىلىپ، ولار 1 ميلليارد تەڭگەدەن استام قاراجات سالعان. كۇدىكتىلەر قىلمىستىق جولمەن الىنعان تابىسقا بوي كوتەرىپ جاتقان تۇرعىن ءۇي كەشەنىنەن ەكى پاتەر ساتىپ العان. سوت سانكسياسىمەن بۇل پاتەرلەرگە تىيىم سالىندى. بۇدان بولەك، كۇدىكتىلەر ءوز تۋىستارىن قارجىلىق سحەماعا تارتىپ، ولاردى "دروپپەر" رەتىندە پايدالانعان، ياعني باسقا سالىمشىلاردان تۇسكەن قاراجاتتى ولاردىڭ بانك رەكۆيزيتتەرى ارقىلى قولما-قول اقشاعا اينالدىرعان"، دەلىنگەن قما حابارلاماسىندا.

قارجىلىق پيراميدانىڭ ۇيىمداستىرۋشىسى ەكى اي مەرزىمگە قاماۋعا الىندى.

ق ر قپك-نىڭ 201-بابىنا سايكەس، وزگە اقپارات جاريا ەتىلمەيدى.

بۇعان دەيىن الماتىدا تەندەر ماحيناسياسى اشكەرەلەنگەنىن جازعانبىز.