شىمكەنتتە 250 مىڭ حالىقتى ساپالى ەلەكتر جارىعىمەن قامتيتىن "بوزارىق" ەلەكتر ستانسياسى ىسكە قوسىلدى.
كونستيتۋسيا كۇنى اياسىندا شىمكەنت قالاسىندا 220 كۆ ەلەكتر قۋاتىن بەرەتىن «بوزارىق» قوسالقى ەلەكترستانسياسى ىسكە قوسىلدى.
ەنەرگوكەشەننىڭ اشىلۋىنا قالا اكىمى مۇرات ايتەنوۆ قاتىسىپ، بۇقارالىق اقپارات قۇرالدارى وكىلدەرىنە نىساننىڭ ستراتەگيالىق ماڭىزى جونىندە ماعلۇمات بەردى.
قۇرىلىستىڭ سوڭعى ساتىسىندا كەشەنگە ەلەكتر قۋاتى بەرىلىپ، 72 ساعاتتىق مەرزىمدە تەحنيكالىق سىناق جۇمىستارى جۇرگىزىلىپ، ءساتتى وتكەن.
"بوزارىق" قوسالقى ەلەكتر ستانسياسى نەگىزگى كەشەن سانالىپ، ول قۋاتى 110/35/10 كۆ بولاتىن 5 قوسالقى ەلەكتر ستانسيالارىنىڭ قوسىلۋ كوزى بولىپ تابىلادى. وسى كەشەننەن قۋات الاتىن «ءنۇرسات»، «استانا-1»، «استانا-2» قوسالقى ستانسيالارىنىڭ قۇرىلىستارى اياقتالعان. «1-م-1» ستانسياسىنىڭ قۇرىلىسى جالعاسىپ جاتسا، «ىنتىماق» قوسالقى ستانسياسىنىڭ جوبا-سمەتالىق قۇجاتىن ازىرلەۋگە تاپسىرىس بەرىلگەن.
كەشەننىڭ ىسكە قوسىلۋىمەن اسار-2، تۇران، ىنتىماق-2، سولتۇستىك ساياجاي، باتىس، بوزارىق، قايناربۇلاق، شىمكەنتسيتي، دوستىق، ءنۇرسات شاعىن اۋداندارىندا ەلەكتر قۋاتىنىڭ ساپاسى ارتادى.
"مەملەكەت باسشىسىنىڭ تاپسىرماسى بويىنشا سالىنعان بۇل كەشەن 250 مىڭنان استام حالىقتى ساپالى ەلەكتر ەنەرگياسىمەن قامتيتىن بولادى. قالامىز ءىرى وندىرىستىك ورتالىق رەتىندە قالىپتاسىپ وتىر. "بوزارىق" ەلەكتر ستانسياسى ستراتەگيالىق نىسان رەتىندە شاھارداعى ەلەكتر قۋاتىنىڭ جەتىسپەۋشىلىگىن شەشەدى"، - دەدى م.ايتەنوۆ.
ايتا كەتۋ كەرەك، "بوزارىق" قوسالقى ەلەكتر ستانسياسى قالانىڭ قۇرىلىسى قارقىن العان سولتۇستىك بولىگىن ەلەكتر قۋاتىمەن قامتاماسىز ەتپەك. مۇندا جاڭا شاعىن اۋداندار بوي كوتەرىپ، جاڭا وندىرىستىك ايماقتىڭ ىرگەسى قالانعان.
