ال 1-ورىندى قانجىعاسىنا بايلاعان كومانداعا 20 ميلليون تەڭگە كولەمىندە قارجىلاي سىياقى بەرىلدى. قالا اكىمى مۇرات ايتەنوۆتىڭ باستاماسىمەن جۇزەگە اسىرىلىپ، ءۇش ايعا سوزىلعان سايىس سپورتتىڭ 4 تۇرىنەن وتكىزىلدى. ونىڭ قاتارىندا ۆولەيبول، باسكەتبول، شاحمات جانە فۋتبول دا بار. بۇل كۇنى «قاجىمۇقان» ورتالىق ستاديونىندا فۋتبولدان فينالدىق ويىن ءوتتى. ءبىرىنشى ورىنعا №65 مەكتەپ كومانداسى مەن №90 مەكتەپ كومانداسى تالاستى. ءبىرىنشى تايم 1:1 ەسەبى بويىنشا اياقتالدى.
ال ويىننىڭ ەكىنشى جارتىسىندا №65 مەكتەپ كومانداسى 3:1 ەسەبىمەن جەڭىسكە جەتىپ، فۋتبولدان جاستار ليگاسى - 2022 جىلدىڭ كۋبوگىن ۇتىپ الدى.
“ويىن وتە تارتىستى ءوتتى. مەن №65 مەكتەپتى قولداپ كەلىپ وتىرمىن. ولاردىڭ جەڭىسكە جەتەتىنىنە سەنىمدى بولدىم. سەبەبى ولار كەرەمەت ويىن كورسەتتى. كومانداداعى وقۋشىلار ءبىراز ۋاقىت دايىندالدى”، – دەيدى جانكۇيەر اقمەرەي ايدارقۇلوۆا.
جوبانىڭ جابىلۋ راسىمىنە قالا اكىمى مۇرات ايتەنوۆ ارنايى قاتىسىپ، بالالاردى جەتكەن جەڭىسىمەن قۇتتىقتادى.
شاھار باسشىسى چەمپيون اتانعان كوماندا ءوزىنىڭ ءبىلىم وشاعىنا 20 ميلليون تەڭگە كولەمىندە سىيلىق سىيلاۋ مۇمكىندىگىنە يە بولعانىن دا اتاپ ءوتتى.
“شىمكەنت جاستار ليگاسى” مەملەكەت باسشىسىنىڭ تاپسىرماسىنا سايكەس، بۇقارالىق سپورتتى دامىتۋعا باعىتتالعان كەشەندى باعدارلاماسىن جۇزەگە اسىرۋ ماقساتىندا قالامىزدا ەكىنشى رەت ۇيىمداستىرىلىپ وتىر.
بۇل جوبا جاستاردى پاتريوت، وتانسۇيگىش، ەلجاندى ەتىپ تاربيەلەۋگە سەپتىگىن تيگىزەدى. سەبەبى سپورت دەنساۋلىقتىڭ عانا كەپىلى ەمەس، ول ادامدى تاباندىلىققا باۋلي وتىرىپ، ەرىك-جىگەرىن شىڭداي تۇسەدى.
بۇگىنگى جارىستا جەڭىسكە جەتكەن وقۋشىلار تەك سپورتتا عانا ەمەس، ولار ءوز مەكتەبىنىڭ ابىرويى مەن بەدەلى ءۇشىن اتسالىستى.
بۇگىن ءوزى ءبىلىم الاتىن التىن ۇيا مەكتەبىنىڭ نامىسىن قورعاعان جاس جەتكىنشەكتەر ەرتەڭ ەر جەتكەندە ەلىنىڭ دە نامىسىن قورعايتىن، وتانىنا ادال قىزمەت ەتەتىن ازامات بولادى دەپ سەنەمىن. سوندىقتان بۇگىنگى جەڭىستەرىڭىز ءومىر جولدارىڭىزدىڭ ۇلكەن باستاۋى بولسىن!”، – دەپ تىلەك ءبىلدىردى قالا باسشىسى مۇرات ايتەنوۆ.
...
جوبا مەكتەپ وقۋشىلارىنىڭ بوس ۋاقىتىن ۇيىمداستىرۋ، بۇقارالىق سپورتتى دامىتۋ جانە ق ر چەمپيوناتتارىنا كوماندا جاساقتاۋ ماقساتىندا ۇيىمداستىرىلىپ وتىر. جوباعا دەگەن قىزىعۋشىلىق جىلدان جىلعا ارتىپ كەلەدى. وتكەن جىلى اتالعان سپورتتىق دوداعا 140 مەكتەپ قاتىسقان بولسا، بيىلعى بىرىنشىلىككە سپورتتىڭ ءتورت تۇرىنەن قالاداعى 151 ورتا مەكتەپتەن 6 مىڭعا جۋىق وقۋشى قاتىستى.
جالپى، جاستار ليگاسىنىڭ جۇلدە قورى 80 ميلليون تەڭگەنى قۇرايدى. ءبىرىنشى ورىندى قانجىعاسىنا بايلاعان كوماندالارعا 20 ميلليون تەڭگە كولەمىندە قارجىلاي سىيلىق تابىستالدى.
وسى سپورتتىق سايىستارعا تورەلىك ەتۋگە جانە ۇيىمداستىرۋ جۇمىستارىن جۇرگىزۋگە 400-گە جۋىق دەنە شىنىقتىرۋ جانە سپورت سالاسىنىڭ ماماندارى جۇمىلدىرىلعان. ولاردىڭ قاتارىندا قالالىق ءبىلىم باسقارماسى باسشىسىنىڭ ورىنباسارى ءارى شاحماتتان جەتى دۇركىن چەمپيون گۇلىسحان ناحبايەۆا دا بار.
“ءوزىم شاحماتشى قىز بولعاننان كەيىن، ماعان سپورتتىڭ وسى ءتۇرى بويىنشا وتكەن سايىس وتە قىزىقتى بولدى. بۇل سايىستا ءبىرىنشى ورىندى ءو.جولداسبەكوۆ اتىنداعى №9 IT مەكتەپ-ليسەيى جەڭىپ العان بولاتىن. ەستەرىڭىزدە بولسا، ولار وتكەن جىلى 1 مەكتەپپەن سايىسىپ، 2-ورىنعا يە بولعان ەدى. وسى جىلى مەكتەپ ىشىنەن ارنايى ۇيىرمە اشىپ، جاتتىقتىرۋشىنى دا جالداپ، دايىندىقتى كۇشەيتكەن.
ناتيجەسىندە، جۇلدەلى ءبىرىنشى ورىندى قانجىعاسىنا بايلاپ، مەكتەپكە 20 ميلليون تەڭگە كولەمىندە قارجى سىيلاپ وتىر. بۇل وقۋشىلاردىڭ ءبىلىمىنىڭ ناتيجەسىندە جەتكەن جەتىستىگى دەپ بىلەمىن”، – دەيدى قالالىق ءبىلىم باسقارماسى باسشىسىنىڭ ورىنباسارى گۇلىسحان ناحبايەۆا.
“ءبىز IT-ليسەي بولعاندىقتان، بۇل قارجىعا مەكتەپكە ينتەللەكتۋالدى تاقتا الىپ، ماتەريالدىق بازانى جاقسارتامىز دەگەن نيەتىمىز بار. دەگەنمەن ناقتى شەشىم كوميسسيا وتىرىسىنان كەيىن بەلگىلى بولماق. ءبىزدىڭ مەكتەپتە شاحماتتان ساباق تا، ۇيىرمە دە بولادى. بالالارىمىز دا ەرەكشە دارىندى”، دەپ شاكىرتتەرىمەن ماقتاندى №9 IT مەكتەپ-ليسەيىنىڭ ديرەكتورى انار امانقۇلوۆا.
تارتىستى باسەكەدە شاحماتتان جۇلدەلى ءىى-ورىن ى.التىنسارين اتىنداعى №65 مەكتەپ-گيمنازياسىنا بۇيىردى. ال ءىىى-ورىندى ت.تاجىبايەۆ اتىنداعى №47 مەكتەپ-گيمنازياسى يەلەندى.
باسكەتبول ويىنى بويىنشا ءى-ورىن - م.ح. دۋلاتي اتىنداعى №8 مەكتەپ – گيمنازياسىنا بۇيىردى. ايتا كەتەيىك، اتالعان ءبىلىم ورداسىنىڭ شاكىرتتەرى وتكەن جىلى دا “شىمكەنت جاستار ليگاسىندا” باسكەتبولدان چەمپيون اتانعان ەدى.
“ءبىز كوپ دايىندالدىق. سەبەبى بيىل دا جەڭىسكە جەتۋ ماقساتىمىز بولدى. وتكەن جىلى دا باسكەتبولدان 1-ورىندى يەلەنىپ، مەكتەپكە 20 ميلليون تەڭگە سىيلاعان بولاتىنبىز. وسى جىلى دا سونداي مۇمكىندىككە قول جەتكىزدىك. وسىلايشا، ءبىز جاستار ليگاسىنان جالپى 40 ميلليون تەڭگەلىك ۇتىستى قانجىعاعا بايلاپ وتىرمىز. جەڭىستى بەرمەيمىز ەشكىمگە.
كەلەسى جىلى دا باسكەتبولدان جەڭىمپاز اتانامىز دەپ سەنەمىن. بۇل سايىس بىزگە ۇلكەن موتيۆاسيا بەردى. ءبىزدىڭ كوماندا سپورتپەن شۇعىلدانۋدى جالعاستىراتىن بولادى، دەدى م.ح. دۋلاتي اتىنداعى №8 مەكتەپ – گيمنازياسى كومانداسىنىڭ كاپيتانى ەرسۇلتان احمەتبەك.
سپورتتىق دودادا باسكەتبولدان جۇلدەلى ءىى-ورىندى ءال-فارابي اتىنداعى №113 جالپى ورتا ءبىلىم بەرەتىن مەكتەبى يەلەندى.
ءىىى-ورىن بولسا، ى.التىنسارين اتىنداعى №65 مەكتەپ-گيمنازياسىنا بۇيىرىپ وتىر.
سپورتتىڭ ۆولەيبول تۇرىنەن 129 كوماندا، 1458 وقۋشى قاتىسىپ، ناتيجەسىندە:
ءىىى-ورىن - ج.ايماۋىتوۆ اتىنداعى №64 مەكتەپ-گيمنازياسى؛
ءىى-ورىن - احمەت بايتۇرسىنوۆ اتىنداعى №50 مەكتەپ-گيمنازياسى
ءى-ورىن - ءال-فارابي اتىنداعى №113 جالپى ورتا ءبىلىم بەرەتىن مەكتەبىنىڭ وقۋشىلارى جەڭىسكە جەتتى. وسىلايشا، ولار 20 ميلليون تەڭگەنى ءوز مەكتەبىنە سىيلاۋعا مۇمكىندىك الدى.
“ويىن ءبىرشاما قيىنعا سوقتى. ءبىراق ءبىز سوڭىنا دەيىن كۇرەستىك. ءبىزدىڭ ۆولەيبول كومانداسىندا 10 قىز بار. ءبارى دە مەكتەپكە جەڭىس اكەلۋ ءۇشىن بارىن سالدى. ال ءال-فارابي اتىنداعى №113 جالپى ورتا ءبىلىم بەرەتىن مەكتەبىندە ۆولەيبولدان دايىندالۋعا بارلىق مۇمكىندىك بار. وتكەن جىلى دا وسى تارتىستى دوداعا قاتىستىق. ول كەزدە ەكىنشى ورىندى يەلەندىك. ال بيىل جەڭىس ءبىزدىڭ قولدا. ءوز ءبىلىم ۇيامىزعا 20 ميلليون تەڭگە سىيلاعانىمىزدى ماقتان ەتىپ تۇرمىز. بۇل ماڭگى ەستە قالاتىن ءسات دەپ ويلايمىن، – دەپ قۋانىشىمەن ءبولىستى ۆولەيبولدان ءبىرىنشى ورىن العان كوماندا كاپيتانى ءديلورا حاۆازماتوۆا.
دەگەنمەن دەمەۋشىلەر ەسەبىنەن بەرىلگەن قوماقتى قاراجاتتى تەك ءبىلىم ورداسىنىڭ ماتەريالدىق بازاسىن جاڭارتۋعا عانا جۇمساۋعا بولادى. ءتىپتى مەكتەپكە قارجى تۇسكەن سوڭ، ونى ماقساتتى پايدالانعاندىعى دا تەكسەرۋدەن وتەدى.
“بۇل جاستار ليگاسى ەل بويىنشا العاش رەت شىمكەنت قالاسىندا قولعا الىندى. قالا اكىمى مۇرات ايتەنوۆتىڭ باستاماسىمەن ەكىنشى جىل قاتار ىسكە اسىپ وتىرعان رەسپۋبليكاداعى جالعىز جوبا.
وتكەن جىلى سايىسقا 140 مەكتەپ قاتىسسا، ەندى بيىل 151-دەن اسىپ وتىر. سونداي-اق جۇلدە قورى 80 ميلليون تەڭگە بولعاندىقتان وسى جولى وقۋشىلار ارنايى دايىندىقپەن كەلگەنىن بايقادىق.
مەكتەپكە جاتتىقتىرۋشى الىپ، سپورتتىق دوداعا تىڭعىلىقتى جىل دويى دايىندالعان. وسىلايشا، ءبىز العا قويعان ماقساتىمىزدى ورىندادىق.
ياعني وقۋشىلاردىڭ جاپپاي سپورتپەن اينالىسۋىنا موتيۆاسيا بەرىپ وتىرمىز. ال دەمەۋشىلەر ەسەبىنەن بەرىلگەن قارجى قاي ماقساتتا جۇمسالعانى تەكسەرىلەدى. مەكتەپ ۇجىمى ءوزارا كوميسسيا قۇرىپ، ءبىلىم ۇياسىنا نە قاجەت ەكەنىن ايتادى. دەمەۋشىلەر سۇرانىسقا ساي 20 ميللون تەڭگە اياسىندا قاجەتتى قۇرال-جابدىقتى ساتىپ الىپ بەرەدى.
بۇل چەمپيونات بالالاردىڭ سپورتپەن اينالىسۋىنا سەپ بولدى دەپ ويلايمىن. الداعى ۋاقىتتا جاستار ليگاسى جوباسى جالعاسىن تابادى، – دەدى قالا اكىمىنىڭ ءبىرىنشى ورىنباسارى شىڭعىس مۇقان.
جارىستىڭ نەگىزگى ماقساتى مەكتەپ وقۋشىلارىنىڭ بوس ۋاقىتىن ءتيىمدى پايدالانىپ، بالالار مەن جاسوسپىرىمدەر اراسىنداعى ناشاقورلىقتىڭ الدىن الۋ جانە ولاردى سالاۋاتتى ءومىر سالتىن ۇستانۋعا ناسيحاتتاۋ بولىپ تابىلادى. اتالعان سپورتتىق دودا 2021 جىلدىڭ 23 قازان ايىندا باستاۋ الىپ، 1 ماۋسىم كۇنى مارەسىنە جەتىپ وتىر.
سونىمەن قاتار، كوماندالارعا قولداۋ كورسەتۋگە 151 مەكتەپتەن فان – كلۋب كوماندالارى جاساقتالىپ 2265 وقۋشى قامتىلدى. دەسە دە، ولاردىڭ اراسىنان ۇزدىكتەردى انىقتاۋ قالا كۇنى اياسىندا ىسكە اسپاقشى.
“ءاربىر سپورتشىلاردى قولداۋ كەزىندە فان كلۋب كومانداسى دا قۇرىلعان. ياعني ولار جانكۇيەر رەتىندە بي بيلەپ سپورتشىلارعا ويىن كەزىندە قولداۋ كورسەتتى. راسىندا، ءبىزدىڭ وقۋشىلار اراسىندا قۇرىلعان ءاربىر كوماندا ونەرىمەن ءبىزدى تاڭعالدىردى. ولاردىڭ اراسىندا دا جەڭىسكە جەتكەن كومانداعا دەمەۋشىلەر ەسەبىنەن ۆەلوسيپەد سىيعا تارتۋ جوسپاردا بار”، – دەيدى قالالىق جاستار رەسۋرستىق ورتالىعىنىڭ ديرەكتورى ماعجان يساحوۆ.
جاستار ليگاسىنىڭ سالتاناتتى جابىلۋ ءراسىمى كونسەرتتىك باعدارلاماعا ۇلاستى. ءىس-شاراعا قايرات تۇنتەكوۆ، زاتتىبەك، ايگەرىم قالاۋبايەۆا سەكىلدى ەسترادا جۇلدىزدارى ارنايى شاقىرتىلدى.
ازيزا ماديار قىزى
ارنايى «قالا مەن دالا» گازەتى ءۇشىن
