1 قاڭتاردان بەرى وسكەمەندە 150 مىڭنان استام جول قوزعالىسى ەرەجەلەرىن بۇزۋ فاكتىسى تىركەلدى. بۇل ءوز كەزەگىندە 2020 جىلمەن سالىستىرعاندا 40 پايىزعا جوعارى. وتكەن جىلى 115 مىڭ جول ەرەجەسىن بۇزۋ دەرەگى انىقتالعان.
شقو سيفرلاندىرۋ باسقارماسىنىڭ باسشىسى مارينا گاگارينا باسپا ءسوز كونفەرەنسياسى بارىسىندا "سەرگەك" اوك جۇمىسى تۋرالى ايتىپ ءوتتى.
ونىڭ ايتۋىنشا، وبلىس ورتالىعىندا زاڭ بۇزۋشىلىقتى تىركەۋ 159 اپپاراتتىق-باعدارلامالىق كەشەندەردە نەمەسە ءتورت مىڭعا جۋىق كامەرا ارقىلى جۇرگىزىلەدى. شامامەن 1300 كامەرا وسكەمەن قالاسىنىڭ اۋلا اۋماقتارىنداعى ءتارتىپتى قاداعالايدى.
جىل باسىنان باستاپ "سەرگەك" كامەرالارى ارقىلى توعىز مىڭ اكىمشىلىك قۇقىق بۇزۋشىلىقتى انىقتاۋعا كومەكتەستى.
2020 جىلمەن سالىستىرعاندا 17 پايىزعا كوپ. بەينەباقىلاۋ ارقىلى 137 قىلمىستىق ءىس اشىلدى.
شقو-عى ەكىنشى ءىرى شاھار سەمەي قالاسىندادا الداعى ۋاقىتتا "سەرگەك" اوك ىسكە قوسۋ جوسپارلانعان. كامەرالار 74 قيىلىستى، 40 جەلىلىك ۋچاسكەنى قامتۋى ءتيىس. بارلىعى 1 390 كامەرا ورناتىلۋى كەرەك.
«كامەرالاردى ورناتۋ ورىندارىنىڭ تىزبەسى بەكىتىلدى، پيلوتتىق "رەجيمدە 10 لوكاسيادا 20 كامەرا مونتاجدالدى، ولار شقو اكىمىنىڭ سيتۋاسيالىق ورتالىعىمەن بىرىكتىرىلگەن»، دەپ اتاپ ءوتتى مارينا گاگارينا.
بۇدان باسقا، وڭىردە ۇلتتىق بەينەمونيتورينگتىڭ جۇيەسى بويىنشا جوبا ىسكە اسىرىلۋدا، وعان سايكەس پوليسيا دەپارتامەنتى بەينەباقىلاۋ كامەرالارىن ۇلعايتۋ، سونداي-اق بارلىق ورناتىلعان كامەرالاردى ينتەگراسيالاۋ بويىنشا جول كارتاسىن ازىرلەمەك.
مونيتورينگ جۇيەسىنە بارلىق وبەكتىلەر، ونىڭ ىشىندە ساۋدا-ويىن-ساۋىق ورتالىقتارى ەنگىزىلەتىن بولادى. جالپى، بۇگىنگى تاڭدا وبلىس بويىنشا 18 مىڭ بەينەباقىلاۋ كامەرالارى ورناتىلعان.
