جاس اقىنداردىڭ ولەڭ جازىپ، شىعارماشىلىق تۇرعىدان شىڭدالۋىنا، ءوز مۇمكىندىكتەرىن، قابىلەتتەرىن كورسەتۋ ماقساتىندا ۇيىمداستىرىلعان ءمۇشايراعا 18 ۇمىتكەر قاتىسىپ، جىردان شاشۋ شاشتى.
ورالحان بوكەي اتىنداعى ورتالىق قالالىق كىتاپحانادا وتكەن شارانىڭ شىمىلدىعىن ۇلان اۋدانىنىڭ ىشكى ساياسات ءبولىمىنىڭ باسشىسى نۇرحات توقتارحان ۇلى ءتۇرىپ، اقىندارعا ساتتىلىك تىلەي كەلە، ءوز ويىن بىلاي جەتكىزدى.
"تاۋەلسىزدىك كۇنى-بۇل ءبىز ءۇشىن باستى مەرەكە. بۇگىن ايتۋلى كۇنگە وراي جانە جەرلەسىمىز سەرىك عابدوللا ۇلى اعامىزدىڭ 85 جىلدىق مەرەيتويىنا ارنالعان وبلىستىق ءمۇشايرانى وتكىزىپ، جاس اقىندارعا قۇرمەت ءارى قولداۋ كورسەتكىمىز كەلدى.
بەرەكە-بىرلىكتى، بابالار ارمانداعان تاۋەلسىزدىكتى ولەڭدەرىنە ارقاۋ ەتكەن اقىندار جاۋھار جىرلارىن تىڭداپ، پاي-پاي شىركىن، دەگىڭ كەلەدى"، – دەدى نۇرحات سادىقوۆ مىرزا.
اتالعان ءمۇشايراعا شقو-نىڭ قۇرمەتتى ازاماتى، بەلگىلى اقىن جازۋشى، جۋرناليست الىبەك قالي ۇلى قاڭتاربايەۆ، جانە اقىن، قازاقستان جازۋشىلار وداعىنىڭ مۇشەسى، وسكەمەن قالاسىنىڭ مادەنيەت جانە تىلدەردى دامىتۋ ءبولىمىنىڭ باسشىسى قالقامان سارين سىندى تۇلعالار قازىلىق ەتتى.
اقىنداردىڭ ءسوز ساپتاۋى مەن ورامدى ويلارى قازىلارىن القاسىن ءتانتى ەتتى. باس جۇلدە قىزىربەك دۇرگىنبايۇلىنا بۇيىردى.
ال 2 ورىن ورازاي جەڭىس ۇلى، 3 ورىنعا - باعجان ەلسىنبەك قىزى، دانا يساعۇل قىزى يە بولدى. ءمۇشايراعا بەلسەنە قاتىسىپ، جۇلدەلى ورىندار العان جاس اقىندار باعالى سىيلىقتارمەن ماراپاتتالدى.
