ناۋرىزدىڭ 18ء-ى كۇنى وسكەمەن مەن ريددەر قالالارىندا ۇلتتىق كيىم كۇنىنە ارنالعان دۋماندى شارالار ءوتتى. بۇل مەرەكە قازاقتىڭ باي مادەنيەتى مەن ءسالت-داستۇرىن دارىپتەۋگە ارنالدى،- دەپ حابارلايدى Dalanews.kz
وسكەمەن قالاسىنداعى رەسپۋبليكا الاڭىندا تىگىلگەن باس كيىز ۇيدە جەرگىلىكتى شەبەرلەردىڭ ۇلتتىق كيىمدەر ءسان كورسەتىلىمى ءوتتى. قازاقى ناقىشتا بەزەندىرىلگەن ەرەكشە ۇلگىلەر قالا تۇرعىندارىنىڭ قىزىعۋشىلىعىن وياتتى. شارا بارىسىندا ءداستۇرلى كيىم ۇلگىلەرى مەن زاماناۋي ءساننىڭ ۇيلەسىم تاپقان جاڭا توپتامالارى ۇسىنىلدى. كەلگەن قوناقتار قازاق مادەنيەتىنىڭ باي مۇراسىن بەينەلەيتىن ەرەكشە قولونەر تۋىندىلارىن تاماشالادى.
- ءبىزدىڭ باستى ماقساتىمىز – ۇلتتىق كيىمنىڭ تەك وتكەننىڭ ءبىر بولشەگى عانا ەمەس، كۇندەلىكتى ومىردە دە كيۋگە بولاتىن ءساندى ۇلگى ەكەنىن كورسەتۋ. ءبىز ءداستۇرلى ويۋ-ورنەكتەر مەن پىشىمدەردى ساقتاي وتىرىپ، ولاردى زاماناۋي ستيلگە ساي بەيىمدەيمىز، - دەيدى ديزاينەرلەر.
ال ريددەر قالاسىندا وتكەن «ەتنو Fashion Show» بايقاۋى دا كوپشىلىكتىڭ نازارىن اۋداردى. بايقاۋعا قاتىسۋشىلار قازاقتىڭ ءداستۇرلى كيىمىن جاڭاشا ۇلگىدە ۇسىنىپ، تاريحي ەرەكشەلىكتى قازىرگى سانمەن ۇيلەستىرە ءبىلدى. مادەنيەت سارايىندا وتكەن شاراعا ءارتۇرلى ۇيىم وكىلدەرى قاتىسىپ، قازاق حالقىنىڭ بولمىسىن ايقىندايتىن كيىم ۇلگىلەرىن پاش ەتتى.
- ءاربىر كيىم – بۇل ماتالار، كەستەلەر مەن ءپىشىم ارقىلى باياندالاتىن تۇتاس ءبىر تاريح. ءبىز ءۇشىن اتا-بابامىزدىڭ مۇراسىن ساقتاۋ عانا ەمەس، ونى جاڭعىرتىپ، زاماناۋي ومىرگە بەيىمدەۋ دە ماڭىزدى، - دەپ ءبولىستى مودەلەرلەر.
بايقاۋعا قالانىڭ قوعام بەلسەندىلەرىنەن قۇرالعان قازىلار القاسى باعاسىن بەردى. كيىمدەردىڭ تەك داستۇرگە ساي كەلۋى عانا ەمەس، ولاردىڭ ەرەكشەلىگى، ساندىك ۇيلەسىمى جانە ورىندالۋ ساپاسى دا ەسكەرىلدى. اسىرەسە، وبرازدىڭ اسەمدىگى مەن جاراسىمدىلىعىنا ءمان بەرىلىپ، قازاقى ناقىشتى ايقىن جەتكىزگەن قاتىسۋشىلارعا قوسىمشا ۇپاي بەرىلدى.
شارانىڭ شارىقتاۋ شەگى – فينالدىق ءسان كورسەتىلىمى بولدى. پوديۋمدا ۇلتتىق كيىم ۇلگىلەرىن كيگەن نازىك جاندىلار ءجۇرىپ ءوتتى. كەش سوڭىندا جەڭىمپازدارعا ارنايى ديپلومدار مەن باعالى سىيلىقتار تابىستالدى.
