Naýryzdyń 18-i kúni Óskemen men Ridder qalalarynda Ulttyq kiim kúnine arnalǵan dýmandy sharalar ótti. Bul mereke qazaqtyń bai mádenieti men salt-dástúrin dáripteýge arnaldy,- dep habarlaidy Dalanews.kz
Óskemen qalasyndaǵy Respýblika alańynda tigilgen bas kiiz úide jergilikti sheberlerdiń ulttyq kiimder sán kórsetilimi ótti. Qazaqy naqyshta bezendirilgen erekshe úlgiler qala turǵyndarynyń qyzyǵýshylyǵyn oiatty. Shara barysynda dástúrli kiim úlgileri men zamanaýi sánniń úilesim tapqan jańa toptamalary usynyldy. Kelgen qonaqtar qazaq mádenietiniń bai murasyn beineleitin erekshe qolóner týyndylaryn tamashalady.
- Bizdiń basty maqsatymyz – ulttyq kiimniń tek ótkenniń bir bólshegi ǵana emes, kúndelikti ómirde de kiiýge bolatyn sándi úlgi ekenin kórsetý. Biz dástúrli oiý-órnekter men pishimderdi saqtai otyryp, olardy zamanaýi stilge sai beiimdeimiz, - deidi dizainerler.
Al Ridder qalasynda ótken «Etno Fashion Show» baiqaýy da kópshiliktiń nazaryn aýdardy. Baiqaýǵa qatysýshylar qazaqtyń dástúrli kiimin jańasha úlgide usynyp, tarihi erekshelikti qazirgi sánmen úilestire bildi. Mádeniet saraiynda ótken sharaǵa ártúrli uiym ókilderi qatysyp, qazaq halqynyń bolmysyn aiqyndaityn kiim úlgilerin pash etti.
- Árbir kiim – bul matalar, kesteler men pishim arqyly baiandalatyn tutas bir tarih. Biz úshin ata-babamyzdyń murasyn saqtaý ǵana emes, ony jańǵyrtyp, zamanaýi ómirge beiimdeý de mańyzdy, - dep bólisti modelerler.
Baiqaýǵa qalanyń qoǵam belsendilerinen quralǵan qazylar alqasy baǵasyn berdi. Kiimderdiń tek dástúrge sai kelýi ǵana emes, olardyń ereksheligi, sándik úilesimi jáne oryndalý sapasy da eskerildi. Ásirese, obrazdyń ásemdigi men jarasymdylyǵyna mán berilip, qazaqy naqyshty aiqyn jetkizgen qatysýshylarǵa qosymsha upai berildi.
Sharanyń sharyqtaý shegi – finaldyq sán kórsetilimi boldy. Podiýmda ulttyq kiim úlgilerin kigen názik jandylar júrip ótti. Kesh sońynda jeńimpazdarǵa arnaiy diplomdar men baǵaly syilyqtar tabystaldy.
