شقو اكىمى ەرمەك كوشەربايەۆ ءوڭىردىڭ قوعام مۇشەلەرىمەن بىرگە قوعامدىق كەڭەس جانىنان تۇراقتى تۇردە جۇمىس ىستەيتىن «وسكەمەن تىنىسى» ەكولوگيالىق قورعاۋ بيۋروسىن» قۇرۋ تۋرالى ۇسىنىستى تالقىلادى، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.
جاڭا ۇيىمنىڭ ماقساتى – اۋا ساپاسىنا قاتىستى قوردالانعان ماسەلەلەردىڭ شەشىمىن ىزدەپ، وسكەمەندىكتەردىڭ تۇرمىس جاعدايىن جاقسارتۋ. اتاپ ايتقاندا، قالانىڭ ءار اۋدانىندا اتموسفەراعا مونيتورينگ جاسايتىن قۇرىلعىلاردى ورناتۋ، ونى كاليبرلەۋ، كاسىپورىندارداعى سۇزگىنى جاقسارتۋ، قولدانىستاعى شارالاردىڭ تيىمدىلىگىن باعالاۋ، جاڭا ۇسىنىستار ازىرلەۋ، تۇرعىندارعا اۋا لاستانۋىنىڭ قاۋىپ-قاتەرى مەن ونى ازايتۋدىڭ جولدارىن ءتۇسىندىرۋ ءۇشىن ءبىلىم بەرۋ باعدارلامالارىن ۇيىمداستىرۋ، ەكولوگيالىق ستاندارتتاردىڭ ورىندالۋىن باقىلاۋ.
ايماق باسشىسى «وسكەمەن تىنىسى» ەكولوگيالىق قورعاۋ بيۋروسىنىڭ» جول كارتاسىن جاساقتاۋدان باستاپ، قالانىڭ ەكولوگيالىق جوبالارىن جۇزەگە اسىرۋدى جەدەلدەتۋ جۇمىستارىمەن اينالىساتىنىن العا تارتتى.
– قوعامنىڭ، جەرگىلىكتى اتقارۋشى ورگانداردىڭ جانە تابيعاتتى پايدالانۋشىلاردىڭ ءوزارا قارىم-قاتىناسىنىڭ ءتيىمدى تەتىكتەرى قاجەت ەكەنىن بۇدان بۇرىن دا ايتقان ەدىم. ەكوبەلسەندىلەر مەملەكەتتىك ورگاندار مەن كاسىپورىندارمەن ديالوگ ورناتۋ ارقىلى ماسەلەنى شەشۋ جولدارىن قاراستىراتىن بولادى. ەڭ باستىسى، قوعامدىق باقىلاۋ كۇشەيتىلەدى. قالانىڭ ءاربىر تۇرعىنى وسى ۇيىمنىڭ زاڭدى وكىلى دەپ ايتۋعا نەگىز بار. ارينە ءبارى بىردەن وزگەرىپ كەتپەيتىنى انىق. ءبىراق بىرلەسە وتىرىپ، كەزەڭ-كەزەڭىمەن قالاعان ناتيجەگە قول جەتكىزەتىن بولامىز، – دەدى ەرمەك كوشەربايەۆ.
وسى رەتتە قوعام بەلسەندىلەرى دە باستامانى قولداپ، وزدەرىنىڭ پىكىرىن ءبىلدىردى.
– اتموسفەرانىڭ لاستانۋ دەڭگەيىن انىقتايتىن داچيكتەردىڭ سانىن كوبەيتىپ، ولاردى قالا بويىنشا بىركەلكى ورناتۋ كەرەك. تۇرعىندار دا قانداي كومىر جاعاتىنىمىزدى ءبىلۋى قاجەت. بۇل باعىتتاعى جۇمىستى جەر ۇيلەر ورنالاسقان اۋدانداردا قاراستىرعان ءجون. وڭ وزگەرىستەر ءۇشىن بيۋرو جۇمىسىندا ءار قادام ماڭىزدى، – دەدى سالا مامانى ۆيتاليي چەرنەسكيي.
وبلىس اكىمى جاڭا كەڭەستى ق ر ەكولوگيا جانە تابيعي رەسۋرستار مينيسترلىگى قوعامدىق كەڭەسىنىڭ مۇشەسى، «ECOJER» اسسوسياسياسى شقو بويىنشا فيليالىنىڭ جەتەكشىسى ەلەنا بەرەزينسكايا-ابىلوۆاعا باسقارۋدى ۇسىندى.
– سوڭعى 10 جىلدىڭ ىشىندە العاش رەت قورشاعان ورتانىڭ جاعدايىن تالقىلاپ، ەكولوگيالىق قورعاۋ بيۋروسىن قۇرۋ جونىندە شەشىم قابىلداۋ ءۇشىن ەكولوگتار مەن تاۋەلسىز ساراپشىلار شاقىرىلدى. ەكولوگيالىق ماسەلەلەردى شەشۋدە قوعاممەن بەلسەندى قارىم-قاتىناس ورناتۋ قاجەت. اتقارىلىپ جاتقان جۇمىستار جۇرتشىلىققا اشىق تۇردە كورسەتىلۋى كەرەك، – دەيدى ەلەنا بەرەزينسكايا-ابىلوۆا.
ەكولوگيالىق قورعاۋ بيۋروسىنىڭ قۇرامىنا ەكولوگيالىق، الەۋمەتتىك جانە دەنساۋلىق ساقتاۋ ماسەلەلەرىن شەشۋگە كومەكتەسەتىن ءتۇرلى سالا ماماندارىن قوسۋ جوسپارلانىپ وتىرعانىن اتاپ وتكەن ءجون. سونىمەن قاتار، اتالعان بيۋرو ازاماتتار، كاسىپ پەن بيلىك اراسىنداعى ءوزارا ارەكەتتەسۋ الاڭىنا اينالادى دەپ كۇتىلۋدە.
