قازاقستان Insider Global Education Index رەيتينگىندە 18-ورىنعا يە بولىپ، الەمدەگى ۇزدىك 20 ءبىلىم بەرۋ جۇيەسىنىڭ قاتارىنا ەندى، دەپ حابارلايدى Dala News.

مالىمەتكە سايكەس، قازاقستان 0،092 بالل نەمەسە شامامەن 9،2% دەڭگەيىندەگى كورسەتكىشكە جەتكەن. بۇل كورسەتكىش بويىنشا ەل نيدەرلاندپەن (9،2%) تەڭ ءتۇسىپ، پولشا (8،5%)، ءباا (7،8%)، مەكسيكا (7،8%)، برازيليا (7،1%) جانە وڭتۇستىك افريكا رەسپۋبليكاسىنان (7،1%) وزىپ تۇر.

رەيتينگ كوشىن اقش 99،8% كورسەتكىشپەن باستاپ تۇر. ودان كەيىن ۇلىبريتانيا (57،0%) مەن جۇڭگو (40،1%) ورنالاسقان. ال گەرمانيا (31،7%)، اۋستراليا (25،4%)، جاپونيا (22،5%) جانە وڭتۇستىك كورەيا (21،8%) دا جوعارى پوزيسيادا.

رەيتينگ ءۇش نەگىزگى كورسەتكىش نەگىزىندە جاسالعان. ولار – QS Top 1000 تىزىمىندەگى ۋنيۆەرسيتەتتەردىڭ ۇلەسى، ولاردىڭ ورتاشا پوزيسياسى جانە ءبىلىم بەرۋ سالاسىنا سالىناتىن مەملەكەتتىك ينۆەستيسيالار كولەمى.

قازىرگى تاڭدا قازاقستاننىڭ 10-نان استام جوعارى وقۋ ورنى QS Top 1000 قاتارىنا كىرەدى. ولاردىڭ ىشىندە ءال-فارابي اتىنداعى قازۇۋ، ل.ن. گۋميليەۆ اتىنداعى ەۇۋ جانە Satbayev University بار..

ساراپشىلاردىڭ مالىمەتىنشە، ءبىلىم بەرۋ سالاسىنا ءجىو-نىڭ 3-4%-ى كولەمىندە تۇراقتى قارجىلاندىرۋ ءبولىنۋى جۇيەنىڭ دامۋىنا وڭ اسەر ەتىپ وتىر. سونىمەن قاتار حالىقارالىق ارىپتەستىك كەڭەيىپ، اكادەميالىق ۇتقىرلىق ارتىپ، ۋنيۆەرسيتەتتەر مەن ءوندىرىس اراسىنداعى بايلانىس كۇشەيگەن.

جالپى، قازاقستان جاھاندىق ءبىلىم بەرۋ كەڭىستىگىندە پوزيسياسىن نىعايتىپ، وڭىردەگى جەتەكشى ءبىلىم بەرۋ ورتالىقتارىنىڭ بىرىنە اينالىپ كەلەدى.